51 KAQ YACHAKUNËKIPAQ
Parlakunqantsikqa Jehovä kushikunampaq imëpis allilla katsun
Jehoväqa parlë yachaqtam kamamarquntsik. Tsëmi pëqa lluta parlanataqa munantsu, sinöqa shumaq y alli parlanatam munan (leyi Santiägu 1:26). Tsëmi, Jehovä munanqannö parlanëkipaq këchö yachakunki.
1 KAQ: ¿Jukkunata imanö parlapänatataq Jehoväqa munan?
Bibliachömi kënö nin: “Jukniki juknikikuna kallpayoq kayänëkipaq y alli këkäyänëkipaq yanapanakur këkäyë” (1 Tesalonicensis 5:11). ¿Pillapis llakishqa këkanqanta musyankiku? ¿Imataraq alli sientikunampaq nirinkiman? Capazchi yarpätsinkiman alli warmi o alli nuna kanqanta, y alläpa kuyanqëkitapis nirinkimanmi. Alli sientikunampaqqa, ¿ima textutaraq leyipärinkiman? Mëtsika textukunam kan jukkunata animanapaq. Tsëmi pitapis yanapëta munarqa shumaq y kuyëpa parlapänantsik (Proverbius 15:1).
2 KAQ: ¿Imanö parlëpitataq cuidakunantsik?
Bibliachömi kënö nin: “Ama shimikikunawan llutankunata parlayëtsu” (leyi Efesius 4:29). Tsëmi noqantsikqa llutaqa imatapis parlanantsiktsu, ni jukkuna mana alli sientikuyänanta munar mana alliqa parlanantsiktsu. Manam pipaqpis wasan rimanantsiktsu, ni manam pitapis tumpanantsiktsu (leyi Proverbius 16:28).
3 KAQ: ¿Imatan yanapamäshun mana allikunata mana parlanapaq?
Imatapis pensanqantsikta y shonquntsikchö kanqantam imëpis parlantsik (Lücas 6:45). Tsëmi imëpis kallpachakunantsik alli kaqkunaman, limpiu kaqkunaman y alabëpaq kaqkunaman pensanapaq, y jukkunawan kuyanakunapaq ima yanapamänapaq kaqmanmi pensanantsik (Filipensis 4:8). Peru tsëpaqqa, alli amïgukunawanmi juntakunantsik y jamapanqantsik hörakuna imata ruranapaq o rikänapaq kaqtapis allim akranantsik (Proverbius 13:20). Imatapis manaraq parlarmi alli pensanantsik y cuentachömi katsinantsik parlanqantsik jukkunata yanapanqanta o mana yanapanqanta. Bibliachömi kënö nin: “Shumaq mana pensar parlayanqanqa tuksikoq espädanömi, peru alli pensëta yachaq nunakuna parlayanqanqa jampinömi” (Proverbius 12:18).
MASLLA YACHAKUSHUN
Parlanqantsikwan Jehoväta kushitsinapaq y jukkunata animanapaqmi yachakushun.
4 KAQ: Imatapis manaraq parlarmi alliraq pensanëki
Manaraq alli pensar lluta parlëkurqa alläpam llakikuntsik (Santiägu 3:2). Leyiyë Gälatas 5:22, 23 ima ninqanta y këpaq parlayë:
Kë textuchö ninqampitaqa, ¿imatataq Jehoväta mañakunkiman lluta mana parlanëkipaq? Y tsë mañakunqëkiqa, ¿imanötan yanapashunkiman?
Leyiyë 1 Corintius 15:33 ima ninqanta y këpaq parlayë:
Imëpis alli kaqllata parlanapaqqa, ¿imanirtan pikunawan juntakunqantsikchö, imata rikanqantsikchö y imata wiyanqantsikchö cuidakunantsik?
Pikunawan juntakunqantsik, imakunata rikanqantsik y wiyanqantsikqa allipaq o mana allipaqpis kanmanmi.
Leyiyë Eclesiastes 3:1, 7 ima ninqanta y këpaq parlayë:
¿Imëtan parlanantsik o upälla kanantsik?
5 KAQ: Jukkunapaq imëpis allita parlashun
Mana allikunata y llutanta mana parlanapaqqa, ¿imatan yanapamäshun? VIDEUTA rikäyë y këkunapaq parlayë:
Videuchö rikanqantsik wawqiqa wakinkunapaqmi mana allita parlaq, peru ¿imanirtan tsënö parlëtaqa dejëta munarqan?
¿Imatataq rurarqan mana allikunata manana parlanampaq?
Leyiyë Eclesiastes 7:16 ima ninqanta y këpaq parlayë:
¿Imatan yanapamäshun jukkunapaq mana allita mana parlanapaq?
Leyiyë Eclesiastes 7:21, 22 ima ninqanta y këpaq parlayë:
Pipis mana allita qampaq parlaptinqa, ¿kë versïculukunachö ninqan yanapashunkimantsuraq? ¿Imanir?
6 KAQ: Familiëkita shumaq y respëtuwan parlapë
Jehoväqa munan familiantsikta kuyëpa y respëtuwan parlapänatam. VIDEUTA rikäyë y këpaq parlayë:
¿Imatan yanapashunkiman familiëkita imëpis kuyëpa parlapänëkipaq?
Leyiyë Efesius 4:31, 32 ima ninqanta y këpaq parlayë:
Familiantsikwan kushishqa kawakunapaqqa, ¿imanötan parlakuynintsik kanman?
Jehoväqa Tsurin Jesusta alläpa kuyanqantam nirqan. Leyiyë Mateu 17:5 ima ninqanta y këpaq parlayë:
¿Imanötan Jehovänölla qampis familiëkita parlapankiman?
Allita rurayanqankunapita jukkunata felicitë.
WAKIN IMA NIYANQAN: “Wakinkunata mana gustaptimpis noqaqa munanqänömi parlakü”.
¿Tsënö pensë alliku kanman? ¿Imanir?
KËTAM YACHAKURQUNKI
Manaraq parlarmi alli pensanëki imata, imanö o imë parlanëkipaq kaqta.
¿Yarpankiku?
¿Imanötan parlapänëki pitapis animëta munarqa?
¿Imanö parlëpitataq cuidakunantsik?
¿Imatan yanapamäshun pitapis kuyëpa y alli parlapänapaq?
MASTA YACHAKUY
¿Imatan yanapamäshun jukkunapaq allita parlanapaq?
Mana allikunata mana parlanëkipaq ima yanapashunëkipaq kaqta yachakuy.
“¿Imanirtan allitsu kanman lluta parlëqa?” (jw.org päginachö yarqamoq)
Pipaqpis wasan mana rimanëkipaq ima yanapashunëkipaq kaqta rikë.
Mana allikunata manana parlanampaq juk nunata ima yanapanqanta leyi.
“Vïdächö imakunata rurëkanqämanmi pensar qallëkurqä” (Täpakoq, 1 de agostu 2013)