Këkanqantsik paraïsuta shumaqyätsishun
“Chakï jarukunantam shumaqyätsishaq.” (ISAÏAS 60:13)
1, 2. ¿Imapaqtaq Escritüras Hebrëaschöqa chaki jarukuna nin?
CHAKI jarukunaqa, täkurnin chakinkunata churakuyänampaq takshalla bancam. Isaïas 66:1 textuchömi Jehovä nin ciëluqa imëka trönunnö kanqanta y Patsana chaki jarukunannö kanqanta. Isaïas 60:13 textuchönam, “chakï jarukunantam shumaqyätsishaq” nin. ¿Imanötaq Jehovä chakin jarukunanta shumaqyätsin? ¿Y këqa imatataq rikätsimantsik Patsachö kawaq kaqkunata?
2 Jina Escritüras Hebrëaschöqa, unë Israelchö templupaqmi chaki jarukuna nin (1 Crönicas 28:2; Salmu 132:7). Jehoväpaqqa, templuqa alläpa shumaqmi karqan, porqui tsëchömi Patsachö sirweqninkuna pëta adorëta y alabëta puëdiyaq.
3. (1) ¿Imataq yanapamantsik Diosta kanan witsan adoranapaq? (2) ¿Imëtaq espiritual kaq templu patsakärirqan?
3 ¿Imataq yanapamantsik Diosta kanan witsan adoranapaq? Manam nuna ruranqan templu wayitsu, sinöqa espiritual kaq templum. Tsë templuqa, Jesus wanunqanrëkur imanö adoranapaq kaqta Dios patsätsinqanmi. ¿Imëtaq kë templu patsakarqan? 29 watachö Jesus bautizakuriptin y Jehoväpa templunchö mas principal kaq sacerdöti kanampaq akrakäriptinmi (Hebrëus 9:11, 12).
Kanan witsanmi Jehoväta alabanantsik precisan
4, 5. (1) Salmu 99 ninqannö, ¿imatataq rurayanman Jehoväpa sirweqninkuna? (2) ¿Ima tapukïtataq rurakushwan?
4 Alläpam Jehoväta agradecikuntsik, Jesus wanunqanrëkur imanö adoranapaq kaqta patsätsimunqampita. Tsëtaqa rikätsikuntsik, Diospa jutinqa Jehovä kanqanta y noqantsikrëkur wanunampaq Jesusta kachamunqampita nunakunata yachatsirninmi. Alläpam kushikuntsik 8 millonpitapis masna Testïgukuna llapan junaqkuna Jehoväta alabayaptin. Mëtsikaq nunakunam creiyan wanurirnin ciëluta ëwarninraq Diosta alabayänampaq kaqta. Peru noqantsikqa musyantsikmi, kanan witsan Jehoväta alabanantsik precisanqanta.
5 Jehoväta alabarninqa, unë witsan sirweqninkunanömi rurëkantsik (leyi Salmu 99:1-3, 5-7a). Mëtsikaqmi Moisesnö, Aaronnö y Samuelnöpis imanö adorayänampaq Jehovä patsätsinqannö adorayarqan (Salmu 99:6, 7). Kanan witsampis ishkë grüpu nunakunam Jehoväta juknölla adorëkäyan. Punta kaq grüpuqa, kë Patsallachöraq këkaq ciëlupaq akrashqakunam, pëkunam kë Patsachö Jehovä patsätsinqan templuchö sirwikäyan. Juk kaq grüpunam, ciëlupaq akrashqakunata yanapaq kë Patsachö quedaqpaq kaqkuna kayan (Juan 10:16, NM). Tsënö kaptimpis, cada ünum kënö tapukunantsik: “¿Yanapakïkäku Jesus wanunqanrëkur imanö adoranapaq kaqta Dios patsätsinqanta?”.
¿PIKUNATAQ JEHOVÄPA ESPIRITUAL KAQ TEMPLUCHÖ SIRWIKÄYAN?
6, 7. (1) ¿Imataq pasakurqan congregacion patsakärinqampita ichik tiempukunallata? (2) ¿Y imataq pasakurqan 1919 watapaq?
6 Apostol Pablum willakurqan, wakinkunaqa alli kaq religionpa contran churakärir mana allikunata congregacionchö yachatsikur qallëkuyänampaq kaqta (Hëchus 20:28-30; 2 Tesalonicensis 2:3, 4). Y tsëqa cumplikärirqan congregacion patsakanqampita manaraqpis 100 wata cumpliptinmi. Rasumpa kaq cristiänukunata reqinanqa manam fäciltsu karqan. Peru atska pachak watakuna pasariptinmi, Jehoväqa Jesusta utilizarqan espiritual kaq templunchö pikuna sirwikäyanqanta rikätsikunampaq.
7 1919 watapaqmi cläru rikärirqan templunchö pikuna sirwikäyanqanta. Pëkunaqa, Jehovä munanqannö adorayänampaqmi munëninkunata jaqirishqa kayänaq (Isaïas 4:2, 3; Malaquïas 3:1-4). Tsëpitanam juk visionchö Pablu rikanqan cumplikar qallëkurqan. Rikärishun ima kanqanta.
8, 9. ¿Imataq juk visionchö Pablu rikanqan ‘paraïsuqa’?
8 Jehovämi Pabluta yanaparqan shamoq tiempuchö pasakunampaq kaqta rikänampaq (leyi 2 Corintius 12:1-4b). Pabluqa rikarqan juk ‘paraïsutam’. ¿Imataq tsë paraïsuqa? Itsa këkuna kayan. Juk, ichik tiempullachöna kë Patsa shumaq huertaman tikranampaq kaq (Lücas 23:43, NM). Ishkë, kë Patsa shumaq huertaman tikrashqachö alläpa shumaq kawakuyänampaq kaq. Y kima, Diospa paraïsun, juk parlakïchöqa, ciëluchö Jehoväwan juntu kë (Apocalipsis 2:7).
9 ¿Imanirtaq Pabluqa nirqan nuna parlëta mana puëdinqan palabrakunata wiyanqanta? Porqui manam tsë hörachötsu tsë alläpa shumaq rikanqankunata entienditsikunan karqan. Peru kananmi sïqa Diospa markanchö allikunata chaskinqantsikkunapita willakïta puëdintsik.
10. ¿Espiritual kaq paraïsuwan espiritual kaq templuqa igualku kayan?
10 Publicacionnintsikkunaqa, seguïdum parlamun espiritual kaq paraïsupaq. Peru ¿espiritual kaq paraïsuwan espiritual kaq templuqa igualku kayan? Manam. Rikanqantsiknömi espiritual kaq templuqa, Jesus wanunqanrëkur imanö adoranapaq kaqta Dios patsätsinqan. Peru espiritual kaq paraïsuqa, Jehovä markanta qonqan yamë y juknölla kawakïmi. Kë paraïsum cläru rikätsikun espiritual kaq templuchö pikuna sirwikäyanqanta (Malaquïas 3:18).
11. ¿Ima shumaq rurëyoqtaq kantsik?
11 Alläpa kushikïpaqmi 1919 watapita patsë, espiritual kaq paraïsuta cuidayänampaq, miratsiyänampaq y sinchita katsiyänampaq jutsasapa nunakunata Jehovä permitinqanqa. ¿Y qamqa tsë rurëchö yanapakïkankiku? ¿Precisaqpaqku churanki kë Patsachö respetashqa kanampaq Jehoväwan trabajëta?
JEHOVÄQA MARKANTAM SHUMAQYÄTSIN
12. ¿Imanirtaq nintsik Isaïas 60:17 textu cumplikëkanqanta? (Rikäri kë yachatsikïpa qallananchö këkaq dibüjuta.)
12 Profëta Isaïas willakunqannömi, Jehoväpa kë Patsachö këkaq markanqa watakuna pasanqanmannö atska cambiukunata rurashqa y mas alliyashqa (leyi Isaïas 60:17c). Jövinkuna y tsëllaraq Testïgu tikraqkunaqa itsa tsë cambiukunapita musyayan jukkuna willayaptin o publicacionkunachö leyirnin. Peru unëpitana Testïgu kaqkunaqa kikinkunam rikäyashqa kë cambiukunata. Y alleqmi musyayan markanta diriginampaq Jesusta Jehovä utilicëkanqanta. Pëkuna willamanqantsikta wiyashqaqa Jehoväman markäkïnintsikmi mas miranqa.
Espiritual kaq paraïsuqa, Jehovä markanta qonqan yamë y juknölla kawakïmi
13. ¿Imatataq ruranantsik Salmu 48:12-14 textu ninqannö?
13 Jehoväpa markampitaqa llapantsikmi willakunantsik. Kë mana alli munduchö më tsë nacionkunapita cristiänukuna yamë y juknölla kawakuyanqanqa juk milagrum. Tsëmi jövin kaqkunata y mushoq kaqkunata Diospa markampita y espiritual kaq paraïsupita parlapänantsik (leyi Salmu 48:12-14d).
14, 15. (1) ¿Ima cambiukunataq karqan 1970 watakuna witsanchö? (2) ¿Imanirtaq kë cambiukunaqa alli kashqa?
14 Mëtsikaq Testïgukunam cambiukuna kanqanrëkur Jehoväpa markan shumaqyaqta rikäyashqa. Tantiyarinapaq, unëqa cada congregacionpam siervu de congregacion kaq y cada sucursalpanam siervu de sucursal y Jehoväpa testïgunkunapa principal oficïnanta rikaqtanam presidenti niyaq. Kë wawqikunapa yanapaqninkuna kaptimpis, congregacionchö kar, sucursalchö y principal oficïnachö karpis, kikinkunallam imatapis decidiyaq. Peru 1970 watakunachöqa cambiakärirqanmi, y juk grüpu anciänukunanam imatapis decidiyaq. Kanan witsanqa cada congregacionpam juk grüpu anciänunkuna kan, cada sucursalpanam, sucursalta rikaq juk grüpu anciänunkuna kayan y Jehoväpa testïgunkunata pushaqkunapis ciëlupaq akrashqakunapita juk grüpu anciänukunam kayan.
15 Biblia ninqanta maslla entiendirmi Diospa markanqa cambiukunata rurashqa. Y alläpa allim, porqui manam jukllaqllanatsu decidin. Tsëpa rantinqa, Jehovä qomanqantsik llapan anciänukunam yachayanqanmannö yanapakïta puëdiyan (Proverbius 24:6; Efesius 4:8).
Jehovämi entëru Patsachö nunakunata wanayanqan yanapakïta qoykan (Rikäri 16 y 17 kaq pärrafukunata)
16, 17. Kë qepa watachö cambiukunapitaqa, ¿mëqantaq mas gustashurqunki y imanir?
16 Kananqa parlarishun qepa watakunachö cambiukunapita. Pensarishun publicacionnintsikkunallaman, kananqa mas shumaqmi rikakun y fäcil utilizänallam. Jina, qepa yarqamoq cösaskunatam utilizantsik yachatsikunapaq. Mëtsikaq nunakunam yanapakïta chaskikäyan jw.org päginantsik kanqanrëkur. Kë cambiukunam rikätsikun nunakunata Jehovä kuyanqanta y pëkunapaq yarpachakunqanta.
Kushikuntsikmi Bibliapita yachakunapaq escuëlakunachö yachakunqantsikpita
17 Jina kushikuntsikmi reunionkunachö cambiukuna kanqampita, tsënöpam japallantsik o familiantsikwan karpis Bibliapita mas yachakunapaq tiempuntsik kan. Jina kushikuntsikmi, asamblëakunachö yachatsikï cada wata mas alliyanqampita y Bibliapita yachakunapaq escuëlakunachö yachakunqantsikpitapis. Kë llapanmi rikätsikun Jehovä markanta dirigikanqanta y espiritual kaq paraïsuta mas shumaqyëkätsinqanta.
¿IMANÖTAQ ESPIRITUAL KAQ PARAÏSUNTSIKTA SHUMAQYÄTSISHWAN?
18, 19. ¿Imanötaq espiritual kaq paraïsuntsikta shumaqyätsichö yanapakushwan?
18 Jehovämi permitimantsik espiritual kaq paraïsuta shumaqyätsichö yanapakunapaq. ¿Imanötaq rurashwan? Juknöpaqa kanman yachatsikurnin y estudiu biblicuta qorninmi. Jehoväpa testïgun kanampaq pitapis yanaparninqa, espiritual kaq paraïsutam jatunyëkätsintsik (Isaïas 26:15; 54:2).
19 Jina juknöpaqa espiritual kaq paraïsuta shumaqyätsintsik Dios munanqannö kawakunapaq sinchikurninmi. Tsënöpam espiritual kaq paraïsuqa, wakinkunapaq kuyanëllapaq rikakurin. Alleq pensashqaqa, ¿imata rikartaq nunakunaqa Jehoväpa markanman shamur Jehoväpita y Jesuspita yachakïta munayan? Masqa alli portakoqta rikämarnintsikmi.
Espiritual kaq paraïsu mas jatun kanampaqqa yanapakïta puëdinkim (Rikäri 18 y 19 kaq pärrafukunata)
20. ¿Imatataq ruranantsik Proverbius 14:35 textu ninqannö?
20 Jehoväwan Jesusqa alläpachi kushikuyan espiritual kaq paraïsuntsikta shumaqta rikarnin. Noqantsikpis alläpam kushikuntsik shumaqyätsichö yanapakurnin. Peru masqa kushikushun, kë Patsata juk shumaq huertaman tikratsirninmi. Proverbius 14:35 textum nin sirweqnin yachaq kaptinqa rey alläpa kushikunqanta. Tsënö këkaptinqa, yachaq kashun y espiritual kaq paraïsuta shumaqyätsinapaq kallpachakushun.
a Salmu 99:1-3, 5-7: “Kikin Jehovämi rey këman chashqa. Markakuna karkaryayë. Querubinkuna janachömi jamarëkan. Alläpa feyupa patsa kuyutsun. Sionchöqa Jehovä alläpa jatunmi, y llapan markakunapa janankunapam këkan. Pëkuna jutikita alabayätsun. Pëqa jatun, mantsanëpaqnö y santum. [...] Alabayë Jehovä Diosnintsikta, y qonqurikuyë chakin jarukunanman, pëqa limpium. Sacerdötinkunachömi këkäyarqan Moiseswan Aaron, y jutinta parlaqkunachönam Samuel këkarqan. Jehovämanmi mañakur këkäyarqan, y pënam contestëkämurqan. Shëkaq pukutëpitam parlar sïguimurqan. Y pëkunanam yarpätsikïninkunata y mandakïninkunata wiyakuyarqan”.
b 2 Corintius 12:1-4 (NM): “Manam pipis, ni imata jorqantsu alabakunqanwan. Peru imanö kaptimpis, Dios revelamashqanta willakaramushaq. Chunka chusku watanam pasashqa reqinqä nuna, -cuerpuchötsuraq o manatsuraq, manam musyätsu, Diosllam musyan- kima kaq ciëluyaq apashqa kanqanta. Awmi, reqïmi tsë nunata, -cuerpuchötsuraq o manatsuraq, manam musyätsu, Diosllam musyan- paraïsuman apashqa kanqanta, y wiyarqan nuna parlëta mana puëdinqan palabrakunatam”.
c Isaïas 60:17: “Broncipa rantinmi öruta apamushaq, y hiërrupa rantinmi plätata apamushaq, y qerupa rantinmi cobrita, y rumipa rantinmi hiërruta apamushaq; y yamë kawakïta y justiciatam mandakoqnikitanö churamushaq”.
d Salmu 48:12-14: “Sionpa jiruroqnimpa tumayë, y entërumpa ëwayë, törrinkunata yupayë. Alleq rikäyë perqankunata. Y shamoqpaq kaqkunata willayänëkipaq, täräyänan törrinkunata rikapäyë. Porqui kë Diosllam imëyaqpis Diosnintsikqa kanqa. Kikinmi pushamäshun wanunqantsikyaq”.