Ciëluchö pikuna kawayanqanta rikätsikoq visionkuna

JEHOVÄQA LLAPAN KALLPAYOQMI

“Ciëluchömi juk gobernar täkuna këkarqan, y tsë gobernar täkunachömi juk tëkarqan. Y tsëchö tëkaqpa rikëninqa imëka jaspi ruminö y cornalina ruminömi karqan, y tsë gobernar täkunapa entëru jiruroqninchömi esmeralda niraq turmanyë këkarqan” (Revelacion [Apocalipsis] 4:2, 3).

“Y llapan jiruroqnimpam alläpa chipapëkarqan. Y alläpa tamyaptin pukutë jananchö turmanyë chipapëkaqnömi karqan. Y tsënömi rikakurqan pëpa jiruroqnimpa chipapanqan. Y tsëqa karqan Jehoväpa alläpa puëdeq rikakïninnömi” (Ezequiel 1:27, 28).

Jehoväpa alläpa shumaq rikakïninta y Entëru Ciëlu Janampa kanqantaqa, këkunawanmi rikätsimantsik: alläpa espantëpaq shumaq rumikunawan, juk turmanyëwan y juk alläpa shumaq gobernar täkunawan, y tsëkunataqa apostol Juan y profëta Ezequielmi visionkunachö rikäyarqan. Këqa rikätsimantsik Jehoväpa rikakïnin alläpa espantëpaq shumaqllan y yachanëpaq kanqantam.

Tsë ishkan willakïkunaqa Salmus libruchö ninqanwanmi igualan: “Jehoväqa jatunmi y alläpa alabashqam kanan. Llapan dioskunapitapis pëllam mas puëdeq. Porqui llapan markakunapa diosninkunaqa manam ni imapaqpis välintsu, peru Jehovä Diosqa, kikin ciëlutam rurashqa. Limpiu y chipapaq këninqa pëpa nöpanchömi këkan; kallpa y shumaq këpis pë këkanqanchömi këkan” (Salmu 96:4-6).

Jehovä Llapan Kallpayoq këkarnimpis, pëman witinantsiktam munan. Jinamampis, wiyamänantsikpaq kaqta änimarnintsikmi pëman mañakunapaq nimantsik (Salmu 65:2). Diosqa alläpam kuyamantsik y noqantsikpaqmi yarpachakun, tsëmi apostol Juanqa nirqan, ‘Diosqa kuyakï’ kanqanta (1 Juan 4:8).

JESUSQA DIOSPA DERËCHANCHÖMI KËKAN

Jesuspa qateqnin Estëban ‘santu espïrituwan junta këkarmi ñukirkur ciëluman rikarëkarqan, y Diospa chipapäkïninta y Jesustam Diospa derëcha kaq lädunchö rikëkurqan, y kënömi nirqan: “¡Rikäyë! Ciëlutam kicharëkaqta, y Diospa Tsurintam derëcha kaq lädunchö shëkaqta rikëkä”’ (Hëchus 7:55, 56).

Estëban tsë visionta manaraq rikaptinmi, tsë parlapëkanqan pushakoq religiösukunaqa Jesusta wanutsiyänampaq yanapakushqa kayarqan. Y tsë visionchöqa rikëkarqan Jesus kawarishqana këkanqanta y juk precisaq sitiuman Teytan tätsishqa kanqantam. Tsëmi apostol Pablupis kënö qellqarqan: ‘Wanushqampita sharkatsirnin y ciëluchö derëcha kaq lädunman tätsirninmi, llapan gobiernupa, autoridäpa, puëdeq këpa, mandakoq këpa y llapan jutikuna janampa kanampaq, y kanan witsanllachötsu, sinöqa shamoq kaqchöpis’ Jesusta churarqan (Efesius 1:20, 21).

Juk precisaq sitiuchö Jesus këkanqanta Biblia willakurpis, Jehovänölla alläpa kuyamanqantsiktam willamantsik. Jesus kë Patsachö këkarninqa, qeshyëkaqkunatam kachakätsirqan y wanushqakunatam kawaritsirqan. Y wanunqanwanmi rikätsikurqan Diosta y nunakunata alläpa kuyanqanta (Efesius 2:4, 5). Kanan witsanqa Diospa derëchanchömi këkan y ichikllachönam autoridäninta utilizanqa wiyakoqkunata bendicinampaq.

ANGELKUNAQA DIOSTAM SIRWIYAN

Profëta Danielmi qellqarqan: “Y rikarmi sïguirqä gobernar täkunakuna churakaqta y mana yupëpaq watakunapa kawaq Awkinmi [Jehovämi] täkurirqan. [...] Y kayarqan waranqa kuti waranqa sirwikaqkunam, y chunka waranqa kuti chunka waranqam nöpanchö shëkäyarqan” (Daniel 7:9, 10).

Kë visionchöqa manam juk angel-llatatsu Danielqa rikarqan, sinöqa mëtsikaqtam. ¡Imanö mantsakäkïpaqraq tsëqa karqan! Angelkunaqa Dios kamashqan espïritukunam kayan, alläpa yachaq y poderösu. Y tukï carguman churashqam kayan, tsëchöqa këkäyan serafinkuna y querubinkunam. Angelkunapaqqa, ishkë pachak pitsqa chunka (250) kutipitapis masmi Bibliaqa parlan.

Angelkunaqa manam kë Patsachö kawashqa nunakunatsu kayan. Nunakunatapis manaraq kamarninmi pëkunataqa puntata kamarqan. Patsata Dios kamaqta rikarmi, pëkunaqa alläpa kushikurnin paqchiyarqan (taqllayarqan) (Job 38:4-7).

Jina angelkunaqa, Diospa Gobiernumpita willakïchömi Diosta sirwirnin kanan witsan yanapakïkäyan (Mateu 24:14). Tsëtaqa musyantsik apostol Juan juk visionchö rikanqampitam, tsëmi kënö qellqarqan: “Y ciëlupa chowpinchö volëkaqtam juk angelta rikarqä, y mana ushakaq alli willakïkunatam katsirqan patsachö täraqkunata willanampaq, llapan nacionkunata, kastakunata, idiömakunata y markakunata” (Revelacion 14:6). Angelkunaqa manam unë witsanchönötsu kanan witsan nunakunata parlapäyan, peru alli shonquyoq nunakunata tariyänampaqmi Diospita yachatsikoqkunataqa pushëkäyan.

MILLONYËPAYAN NUNAKUNATA ENGAÑAQ DIABLU

‘Ciëluchömi guërra qallëkurqan: Miguelwan angelninkunam mantsanëpaq jatun culebrawan pelyayarqan, y jatun culebrawan angelninkunam pëkunawan pelyayarqan, peru manam tsarakuyarqantsu, ni manam pëkunapaq ciëluchö sitiu karqannatsu. Tsënöpam jatun culebra urëpa qarpushqa karqan, Diablu y Satanas jutiyoq, entëru patsata engañëkaq; patsamanmi qarpushqa karqan, y angelninkunam pëwan juntu qarpushqa kayarqan’ (Revelacion 12:7-9).

Ciëluchöqa manam yamë këllatsu kashqa. Nunakuna manaraq kayaptinmi, ciëluchö juk angel, pëta adorayänanta munar Jehoväpa contran churakarnin Satanasman tikrarirqan, y tsë jutiqa “Contrakoq” ninanmi. Tsëpitanam, wakin angelkunapis Satanasta qatir Diospa contran tikrariyarqan, tsënöpam supë këman chäriyarqan. Kë mana allikunaqa alläpa piñashqam Diospa contran këkäyan, y imëkatam rurëkäyan mëtsikaq nunakuna Jehoväta mana cäsukuyänampaq.

Satanaswan supëkunaqa mana alli y rumi shonqum kayan. Nunakunatam chikiyan y entëru Patsachö sufrimientukunapitam culpayoq kayan. Satanasqa Jehoväta mana jaqishpa sirweq Jobpa llapan animalninkunata y sirwipaqninkunatam wanuratsirqan. Tsëpitanam chunka tsurinkuna këkäyanqan wayita ‘alläpa vientuwan’ juchuratsir tsurinkunata wanuratsirqan. Jina “Jobtam chaki paltampita peqanyaq mana kachakaq qeriwan qeshyatsirqan” (Job 1:7-19; 2:7).

Diabluqa ichikllachönam ushakätsishqa kanqa. Ciëlupita Patsaman weqaparkayämunqampita patsëmi, wallka tiempullana kawanampaq kaqta musyan (Revelacion 12:12). Pëqa condenashqam këkan ushakänampaq, ¡tsëqa juk alläpa alli noticiam!

PATSACHÖ KAWASHQA NUNAKUNA

“[Jesus], yawarnikiwanmi llapan kastakunapita, idiömakunapita, markakunapita y nacionkunapita Diospaq nunakunata rantirqëki, y Diosnintsikpaq gobernaqkuna y sacerdötikuna kayänampaqmi rurarqëki, y pëkunaqa patsatam gobernayanqa” (Revelacion 5:9, 10).

Jesus kawarinqannömi, mëtsikaq nunakuna kawariyämunqa ciëluchö kawayänampaq. Jesusmi apostolninkunata nirqan: “Qamkunapaq juk sitiuta alistaqmi nänipa ëwëkä. [Y] [...] yapëmi kutimushaq y kikïmi wayichö chaskiyashqëki, tsënöpa qamkunapis noqa këkanqächö kayänëkipaq” (Juan 14:2, 3).

Jesuswan Patsata gobernayämunampaq y tsëchö täraqkunata atska bendicionkunata qoyänampaqmi, ciëlutaqa ëwayanqa. Tsë gobiernuta mañakuyänampaqmi qateqninkunata Jesus kënö yachatsirqan: “Teytalläkuna, jutiki alläpa respëtuwan rikashqa katsun. Gobiernïki shamutsun. Ciëluchö y patsachö munëniki rurakätsun” (Mateu 6:9, 10).

¿IMATARAQ RURAYANQA CIËLUTA ËWAQKUNAQA?

Apostol Juanmi qellqarqan: “Kënö neqtam wiyarqä: ‘¡Rikë! Diospa carpa wayinmi nunakunawan këkan [...]. Y nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam’” (Revelacion 21:3, 4).

Këqa juk visionmi, tsëqa rikätsikun Jesuswan ciëluta ëwaqkuna Diabluta imë ushakätsiyänampaq kaqta y tärëkanqantsik Patsata shumaqyätsiyänampaq kaqtam. Llapan sufrimientukuna, nanëkuna y wanïpis ushakärinqam.

Peru ¿imaraq pasakunqa ciëluta mana ëwaqpaq kaq wanushqakunawanqa? Pëkunaqa Shumaq Patsachö kushishqa kawayänampaqmi kawariyämunqa (Lücas 23:43).