21 KAQ YACHAKUNËKIPAQ
Mëtsëchömi alli noticiakunata yachatsikuykäyan
Diospa Gobiernunqa ichikllachönam llapan mana allikunata ushakätsimunqa. ¡¿Tsëqa manaku alli noticia?! ¡¿Manaku tsëtaqa llapankunata willarita munantsik?! Jesusqa Diospa Gobiernumpita llapan nunakunata yachatsiyänampaqmi discïpulunkunata mandarqan (Mateu 28:19, 20). Jesus mandakunqanta cäsukur, ¿imatataq Jehoväpa testïgunkunaqa rurëkäyan?
1 KAQ: Mateu 24:14 willakunqanqa, ¿imanötan cumplikëkan?
Jesusmi kënö nirqan: ‘Teyta Diospa Gobiernumpita alli noticiakunatam entëru patsachö willakuyanqa’ (Mateu 24:14). Jehoväpa testïgunkunaqa entëru Patsachömi mil idiömapitapis maschö alli noticiakunata yachatsikuykäyan. Tsënö yachatsikuyänampaqqa alliran kallpachakuyänan, y shumaqmi patsätsiyänan. Jehovä mana yanapaptinqa manachi tsëta rurëta puëdiyanmantsu.
2 KAQ: ¿Imatataq rurayä llapan nunakunata Diospita yachatsiyänäpaq?
Punta cristiänukuna rurayanqannöllam “wayin wayin” y mëchöpis nunakunata tariyanqächö yachatsikuyä (Hëchus 5:42). Tsënö yachatsikurmi llapan nunakunaman chëta puëdiyä. Peru hörataqa manam llapan nunakunatatsu wayinkunachö tariyä, tsëmi cällikunachö, pläzakunachö y mas sitiukunachö yachatsikuyä. Tsë llapantaqa rurayä Diospa Gobiernun imata ruramunampaq kaqta nunakuna musyayänampaqmi.
3 KAQ: ¿Pikunatan Diospita yachatsikuyänan?
Jehoväpa sirweqninkunaqa llapankunam Diospita yachatsikuyänan. Tsëmi Jehoväpa testïgunkunaqa nunakuna salvakuyänanta munar Diospa Gobiernumpita yachatsikuyänäpaq imëkanöpa kallpachakuyä (leyi 1 Timoteu 4:16). Jesusmi nirqan: “Grätisllam chaskiyarqunki, y grätislla rurayë”. Tsëmi nunakunata yachatsiyanqäpita cobrayätsu (Mateu 10:7, 8). Wakinkuna wiyakuyta mana munayaptimpis, Jehoväta kuyar y cäsukurmi yachatsikur sïguiyä.
MASLLA YACHAKUSHUN
Mëtsëchö yachatsikuyänäpaq Testïgukuna imata rurëkäyanqäta y Jehovä imanö yanapëkäyämanqantam yachakushun.
Entëru Patsachömi Diospita yachatsikuykäyä: A) Costa Rïcachö; B) Estädus Unïduschö; C) Beninchö; D) Tailandiachö; E) Yapchö (Micronesia); F) Sueciachö.
4 KAQ: Llapan nunakunata Diospita yachatsiyänäpaqmi kallpachakuyä
Mëtsëchö yachatsikuyänäpaqmi Jehoväpa testïgunkunaqa kallpachakuyä. VIDEUTA rikäyë y këpaq parlayë:
¿Imanö yachatsikuyanqätan masqa gustashunki?
Leyiyë Mateu 22:39 y Romänus 10:13-15 ima ninqanta y këkunapaq parlayë:
Diospita yachatsikunqantsikqa, ¿imanötan nuna mayintsikta kuyanqantsikta rikätsikun?
Gobiernumpita yachatsikoqkunapaq, ¿imatataq Jehovä nin? (Rikäyë 15 kaq versïculuta).
5 KAQ: Jehoväpita yachatsikurqa pëtam yanapëkantsik
Nueva Zelanda nacionchöshi Paul jutiyoq Jehoväpa testïgun wayin wayin yachatsikuykänaq. Juk wayiman chäriptinshi juk warmi yarqamunaq. Tsë warmish Jehoväman jutimpa mañakushqa kanaq Jehoväta reqinampaq pillapis yanapëkunampaq. Tsënö mañakunqampita kima höra pasarinqanllachöshi wawqi Paulqa chärinaq. Kë pasanqanmi rikätsikun yachatsikushqa kikin Jehovä dirigimanqantsikta.
Leyiyë 1 Corintius 3:9 ima ninqanta y këpaq parlayë:
Nuëva Zelandachö pasanqanqa, ¿imanötan rikätsikun yachatsikoqkunata Jehovä diriginqanta?
Leyiyë Hëchus 1:8 ima ninqanta y këpaq parlayë:
¿Imanirtan necesitantsik nunakunata yachatsinapaq Jehovä yanapamänantsikta?
¿Musyarqëkiku?
Reunionkunachömi yachatsiyäman Diospita imanö yachatsikuyänäpaq. Ëwashqa karqa tsëta rikarqunkichi. ¿Ima ninkitan nunakunata yachatsiyänäpaq alliraq yachakuyanqäpaq?
6 KAQ: Dios mandakunqanta cäsukurmi nunakunata yachatsiyä
Jesusta chikeqkunaqa manam munayarqantsu punta cristiänukuna Diospita yachatsikuyänanta. Peru michäkuyaptimpis imëkanöpam yachatsikuyarqan, y ‘leykuna yanapaptinmi’ autoridäkunachö defendikuyarqan yachatsikuyta mana dejayänampaq (Filipensis 1:7). Kanan witsampis punta cristiänukunanöllam Jehoväpa testïgunkunaqa rurëkäyan.a
Leyiyë Hëchus 5:27-42 ima ninqanta y këpaq parlayë:
¿Imanirtan michäkuyaptimpis Diospita yachatsikur sïguiyä? (Rikäyë 29, 38 y 39 versïculukunata).
WAKIN IMATA TAPUMANQANTSIK: “¿Imanirtan Jehoväpa testïgunkunaqa wayin wayin yachatsikur puriyan?”.
Tsënö tapuyäshuptiki, ¿imataraq ninkiman?
KËTAM YACHAKURQUNKI
Jesusmi mandakurqan entëru Patsachö alli noticiakunata willakuyänampaq, y Jehovämi tsëta ruraqkunata yanapëkan.
¿Yarpankiku?
¿Imatataq Testïgukuna rurëkäyan mëtsëchö Diospita yachatsikuyänampaq?
Diospita yachatsikuyanqächöqa, ¿imanötan rikakun nunakunata kuyayanqä?
¿Imanirtan Diospita yachatsikunqantsik kushishqa kanapaq yanapamantsik?
MASTA YACHAKUY
Jehoväpa testïgunkuna jatusaq markakunachö yachatsikuyanqanta rikë.
Paris markachö mas puriyanqan sitiukunachö yachatsikuyan (5:11)
Guërrapita qeshpir juk markaman ëwaqkunata Testïgukuna Diospita yachatsiyanqanta rikë.
Nacionninkunapita escapakushqa nunakunata Diospita yachatsiyan (5:59)
Diospita llapan tiempunwan yachatsikur kushishqa kanqanta juk pani willakunqanta rikë.
Diospita yachatsikuyänanta autoridäkuna michäkuyaptin Testïgukuna juiciuchö ganayanqanta leyi.
a Diosmi Gobiernumpita yachakuyänanta munan, tsëmi Jehoväpa testïgunkunaqa autoridäkuna michäkuyaptimpis yachatsikur sïguiyä.