• Jesusta qatinëkipita ama imapis michäshïtsu
    Täpakoq (Yachakunapaq)—2021 | Mäyu

    • 3) JESUSQA MANAM JUDÏUKUNAPA COSTUMBRINKUNATA QATIRQANTSU

      ¿Imanirtan Jesusta mëtsikaq chaskiyarqantsu? Nunakunapa costumbrinta mana qatinqanrëkur. ¿Manaku kanan witsampis Jesuspa qateqninkunataqa tsë asuntukunarëkurlla mana allipa rikämantsik? (Rikäri 13 kaq pärrafuta).d

      13. ¿Imanirtan Jesuspa contran mëtsikaq churakäyarqan?

      13 Jesus kë Patsachö kanqan witsanqa, qateqninkuna mana ayunayaptinmi, Bautizakoq Juanpa qateqninkuna mantsakäkuyarqan. Kawëkaptinraqqa, imanir mana ayunayänampaq kaqtam Jesusqa pëkunata entienditsirqan (Mat. 9:14-17). Tsënö kaptimpis, fariseukuna y Jesuspa wakin chikeqninkunaqa, costumbrinkunata mana qatiptinmi condenayarqan. Qeshyëkaqkunata säbaduchö kachakätsiptinmi, alläpa cölerakuyarqan (Mar. 3:1-6; Juan 9:16). Tsë santu tukoq nunakunaqa, säbadupaq ley ninqanta cumpliyanqampitam alabakuyaq. Peru tsënö kaptimpis, tsë junaqqa templuchömi negociuta rurayaq. Tsëmi Jesus mana allita rurëkäyanqanta niptin, ni ichikllapis gustayarqantsu (Mat. 21:12, 13, 15). Y unë israelïtakunapaq parlarnin pëkunallapaq imatapis ashiyanqanta y Diosman mana markäkuyanqanta, Nazaret markachö këkaq Diosta adorayänan wayichö Jesus cläru rikätsiptinmi, masraq cölerakuyarqan (Lüc. 4:16, 25-30). Munayanqanta Jesus mana ruraptinmi qatiyarqannatsu (Mat. 11:16-19).

      14. ¿Imanirtan Jesusqa Bibliapa contran costumbrikuna mana alli kanqanta nirqan?

      14 ¿Imatatan Bibliachö nin? Willakoqnin Isaïaswanmi Jehovä kënö nirqan: “Kë nunakunaqa janan shonqullam alabayäman. Shiminkunallawanmi respetamaq tukuyan. Shonqunkunachöqa manam yarpäyämanpistsu. ‘Diostam mantsakïkä’ nirpis kikinpa yarpëninllapita yachatsiyashqantam rurëkäyan” (Is. 29:13). Bibliachö qellqarëkanqampa contran këkaq costumbrikuna mana alli kayanqantam Jesusqa nirqan. Diospa Palabrampitapis nunakunapa costumbrinkunata y kikinkuna patsätsiyanqan leykunata mas välitseq nunakunaqa, Jehoväpa y mandamunqan Akrashqampa contranmi këkäyarqan.

  • Jesusta qatinëkipita ama imapis michäshïtsu
    Täpakoq (Yachakunapaq)—2021 | Mäyu

    • 4) JESUSQA MANAM POLÏTICAMAN MËTIKURQANTSU

      ¿Imanirtan Jesusta mëtsikaq chaskiyarqantsu? Polïticaman mana mëtikunqanrëkurmi. ¿Manaku kanan witsampis Jesuspa qateqninkunataqa tsë asuntukunarëkurlla mana allipa rikämantsik? (Rikäri 17 kaq pärrafuta).e

      17. ¿Diospa Akrashqan ima ruranantatan mëtsikaq nunakuna shuyaräyarqan?

      17 Jesus kawanqan witsan gobiernu mana alli kaptinmi, juk gobiernuta munayarqan. Röma gobiernupita Diospa Akrashqan librayänantam shuyaräyarqan. Tsëmi Jesusta reyninkuna kanampaq niyarqan, peru pëqa manam munarqantsu (Juan 6:14, 15). Wakinnam sacerdötikunanöpis, Röma gobiernuta cöleratsinanta mantsar y tsërëkur pushakoq religiösukunata cargunkunapita jorqariyänanta pensar, polïticaman Jesus yëkunanta mantsayarqan. Tsëmi mëtsika judïukuna polïtica asunturëkur Jesuspita rakikäkuriyarqan.

      18. Diospa Akrashqampaq willakuykunapitaqa, ¿imatatan judïukuna cuentaman churayaqtsu?

      18 ¿Imatatan Bibliachö nin? Diosqa musyatsikushqanam karqan, pëpa Akrashqan juk guërrachö pelyar gananampaq kaqta. Peru musyatsikushqam karqan, puntataqa jutsantsikrëkur wanunampaq kaqtapis (Is. 53:9, 12). Tsëqa, ¿imanirtan nunakunaqa jukta rurananta shuyaräyarqan? Problëmankuna tsë witsan altsakänampaq Diospa willakoqninkuna qellqayanqanta nirnin, y wakin willakuykunata cuentaman mana churarninmi (Juan 6:26, 27).