Atska waranqa nunakunatam Jesus mikïnin qorqan

Jesuspa 12 apostolninkunaqa kushishqam Galilëachö yachatsikuyarqan y tsëpita kutirirnam willayarqan imëkata rurayanqampita y yachatsikuyanqampita. Utishqam këkäyarqan, y manam mikuyänanllapaqpis tiempunkuna karqantsu, porqui nunakunaqa pëkuna kaqman imëpis ëwëkäyaqllam. Tsëmi Jesusqa kënö nirqan: “Japallëkikunalla shayämï juk tsunyaq sitiuman, y ichikllapis jamariyë” (Marcus 6:30, 31).

Tsëpitanam itsa Capernaumpa amänunchö këkäyanqampita, Jordan mayupa Betsaida markapa mas karunta barcuwan ewkuyarqan. Peru rikaqninkuna y ewkunqanta musyaqkunaqa lamar kuchumpam ras ëwayarqan, y Jesus manaraq chaptinmi puntata chäriyarqan.

Barcupita bajarirqa alläpam ankuparqan tsëchö këkaqkunata, porqui mitseqninnaq üshakunanömi këkäyarqan. Tsëmi Diospa Gobiernumpita ‘yachatsirnin qallëkurqan’ (Marcus 6:34). Jina qeshyëkaqkunatapis kachakätsirqanmi (Lücas 9:11). Tardiyäriptinnam qateqninkunaqa kënö niyarqan: “Kë sitiuqa tsunyanmi, y alläpa tardinam, despachëkïna këchö këkaq mëtsika nunakunata caserïukunaman ëwar mikïninkuna rantiyänampaq” (Mateu 14:15).

Peru Jesusqa kënömi nirqan: “Manam precisantsu ëwakuyänan; qamkuna imallatapis mikuyänampaq qoyë” (Mateu 14:16). Jesusqa imata ruranampaq kaqta musyëkarpis, Felïpitam kënö tapurqan: “¿Mëpitaraq tantata rantishun kë nunakuna mikuyänampaq?”. Tsënöqa tapurqan, Felïpi Betsaida markapita kaptinmi. Atska tantata rantinanqa alläpa sasam karqan. Porqui ollqukunallam 5.000 kayarqan, y llapanqa itsa 10.000 kayarqan. Tsëmi Felïpiqa kënö nirqan: “Ishkë pachak (200) denariupa tantata rantishqapis manachi tinkunmantsu ichikllatapis mikuriyänampaq” (Juan 6:5-7). Tsë tiempuchöqa juk denariutam juk junaqchö ganayaq.

Tsërëkurchi Andresqa kënö nirqan: “Këchömi juk wamrapa kapun pitsqa cebäda tantan y ishkë taksha pescädun. Peru ¿imatam tsëtsikaqpaqqa tinkunqa?” (Juan 6:9).

Juk ishkë junaqkunallanam pishikarqan 32 wata Pascua fiestapaqqa y tsëllaraq tamya witsan pasarishqa kaptinmi, jirkakunapis verdi këkäyarqan. Jesusqa qateqninkunatam nirqan, nunakunata 50 y 100 grüpupayan jamatsiyänampaq. Tsëpitanam Jesusqa pitsqa tantata y ishkë pescäduta tsarirkur Diosman mañakurqan. Y tantata pakirirnam pescädutawan juntu qateqninkunata qorqan nunakunata qoyänampaq. Awmi, llapankunam pacha junta mikuyarqan.

Tsëpitanam Jesusqa qateqninkunata kënö nirqan: “Llapan katuyanqanta ëlluyë, ichikllapis mana perdinampaq” (Juan 6:12). Y pëkunaqa 12 canasta juntatam ëlluyarqan.