Bautizakunëkipaqmi kallpachakunëki

Jesuspa qateqnin o discïpulun kanapaqqa bautizakunantsikmi (leyi Mateu 28:19, 20). Këchömi yachakunki bautizakuy ima kanqanta y bautizakunëkipaq imata ruranëkipaq kaqta.

1 KAQ: ¿Imanötan bautizakushwan?

Bauticë ninanqa griëgu idiömachö “tullpuy” ninanmi. Tsënö nirqa yakuman tullpuypaqmi parlëkan. Jesustapis Jordan mayuchömi yakuman tullpur bautizayarqan, tsëmi Bibliachö nin ‘yakupita yarqaramunqanta’ (Marcus 1:9, 10). Tsëmi pitapis bautizarqa entëru cuerpunta yakuman tullpuyänan.

2 KAQ: ¿Imanirtan bautizakushwan?

Pipis bautizakurqa Jehovällatana sirwinampaq änikunqantam rikätsikun. Tsëmi manaraq bautizakurnin Jehoväman mañakur pëllata imëpis sirwinampaq y munanqannö kawanampaq Jehoväta ninan. Bautizakoqkunaqa Jesus mandakunqankunatam cäsukuyänan, y kënö ninqantam yarpäyänan: “Pï nunapis qatimaqnï këta munarqa, amana kikimpaqqa kawatsunnatsu, sinöqa [...] qepäta shamutsun” (Mateu 16:24). Bautizakoqkunaqa Jehoväwan y sirweqninkunawanmi amïgu këta puëdiyan.

3 KAQ: ¿Imatataq rurankiman bautizakunëkipaq?

Bautizakuyta munarqa, Jehoväta alli reqinëkipaqmi yachakunëki y pëmanmi markäkunëki o yärakunëki (leyi Hebrëus 11:6). Jehoväpita mas yachakurqa masmi pëta kuyanki y masmi pëman confiakunki. Tsëmi yanapashunki Diospita mas yachatsikunëkipaq y llapan mandakunqankunata cäsukunëkipaq (2 Timoteu 4:2; 1 Juan 5:3). ‘Jehovä [...] alabashqa kanampaqnö’ portakurqa bautizakuyta puëdinkinam (Colosensis 1:9, 10).a

MASLLA YACHAKUSHUN

4 KAQ: Jesus imanö bautizakunqan

Jesus imanö bautizakunqanta maslla musyanëkipaq leyiyë Mateu 3:13-17 ima ninqanta y këkunapaq parlayë:

• ¿Jesustaqa llullullaraq këkaptinku bautizayarqan?

• ¿Jesusta bautizarqa peqanman o umanmanku yakuta jichayarqan, o imanötan bautizayarqan?

Jesus bautizakurirqa Jehovä mandanqantam rurar qallëkurqan. Leyiyë Lücas 3:21-23 y Juan 6:38 ima ninqanta y këpaq parlayë:

• Jesus bautizakurirqa, ¿imata ruranampaqtan mas kallpachakurqan?

5 KAQ: Bautizakunëkipaq kallpachakuy

Bautizakuyta decidinanqa capazchi fäciltsu kanman. Peru Jehoväpita mas yachakunqëkim yanapashunki bautizakuyta decidinëkipaq. Jehoväta mas sirwiyänampaq wakin jövinkunata ima yanapanqanta VIDEUCHÖ rikäyë.

VIDEU: Jehoväwan mas amïgu kanëkipaq kallpachakuy (1:11)

Leyiyë Juan 17:3 y Santiägu 1:5 ima ninqanta y këpaq parlayë:

• Pipis bautizakuyta munarqa, ¿imatataq ruranan?

1. Manaraq bautizakurmi Jehoväman shonqupita mañakur pëllatana imëpis sirwinapaq äninantsik.

2. Bautizakunqantsik höraqa Jehovällatana sirwinapaq kaqtam llapankunapa puntachö rikätsikuntsik.

6 KAQ: Bautizakurirqa Jehoväpa familiannam kantsik

Bautizakurirqa entëru Patsachö Jehoväpa sirweqninkunawanmi juk familianöllana kantsik. Jehoväta sirweqkunaqa mëpita karpis o imanö kashqa karpis Jehovä munanqannömi sirwintsik y llapan mandamanqantsiktam cäsukuntsik. Leyi Salmus 25:14 y 1 Pëdru 2:17 ima ninqanta y këpaq parlayë:

• Kë versïculukunachö ninqannöpis, ¿bautizakunqantsikqa imanötan yanapamantsik?

KËTAM YACHAKURQUNKI

Jesuspa qateqnin kanapaqqa bautizakunantsikmi. Tsëpaqqa Jehovämanmi llapan shonquntsikwan confiakunantsik, mandakunqankunatam cäsukunantsik y pëllatana imëyaqpis sirwinapaqmi äninantsik.

¿Yarpankiku?

• ¿Imanötan bautizakushwan? ¿Imanirtan bautizakushwan?

• ¿Imanirtan manaraq bautizakur Jehoväman mañakunantsik?

• Pipis bautizakuyta munarqa, ¿imatataq ruranan?

MASTA YACHAKUY

Bautizakuypaq mana rasumpa kaqta yachatsikuyanqanta y Bibliachö ima ninqanta leyi.

“¿Imatan bautizakuyqa?” (jw.org päginachö yarqamoq)

Bautizakunëkipaq imakunata ruranëkipaq kaqta yachakuy.

“Jehoväta kuyarninmi bautizakunantsik” (Täpakoq, marzu 2020)

Juk nuna bautizakunampaq kikin cuentata qokunqanta leyi.

“Kikïlla rasumpa kaqta cuentata qokunätam munayarqan” (Täpakoq, 1 de marzu 2013)

Bautizakuy imanir alli kanqanta y bautizakunëkipaq imata ruranëkipaq kaqta yachakuy.

“¿Bautizakunäpaq listunaku këkä?” (Jövinkuna musyëta munayanqan [2 kaq], 37 yachatsikuy)