17 KAQ YACHAKUNËKIPAQ

¿Imanötan Diospa Tsurin Jesus?

Imprimishqa kaq

Jesus yachatsikunqankunata y ruranqankunata yachakurmi pëta y Teytan Jehoväta mas reqita puëdinki. ¿Jesus imanö kanqantaq mas yachanëpaq karqan? ¿Imatataq noqantsikpis rurashwan Jesusnö kanapaq?

1 KAQ: ¿Imanirtan Jesusqa Teytannölla?

Jesusqa mëtsika watapam Teytan Jehoväwan ciëluchö kawarqan, tsëchömi imëkata yachakurqan, y Teytan kuyakoq kanqantam rikarqan (leyi Juan 5:19). Jesusqa Jehovänömi imatapis pensaq y ruraq, tsëmi nirqan: “Noqata rikämaqqa, Teytatapis rikashqam” (Juan 14:9). Jesusqa imëpis kuyëpa y allim nunakunata tratarqan, tsënömi rikätsikurqan Teytantsik Jehovä kuyamanqantsikta. Tsëmi Jesuspita yachakunqantsikqa yanapamantsik Teytantsik Jehoväta mas reqinapaq y kuyanapaq.

2 KAQ: ¿Imanötan Jesusqa rikätsikurqan Teytanta kuyanqanta?

Jesusmi kënö nirqan: “Teytata kuyanqäta nunakuna musyayänampaqmi, Teyta mandamanqannölla llapantapis rurëkä” (Juan 14:31). Jesusqa Teytanta kuyanqanta rikätsikurqan mana fäcil kaptimpis llapan mandanqankunata cäsukurmi. Y nunakunatam Diosnintsikpita imëpis yachatseq, tsënömi jukkunatapis yanapaq Jehoväwan amïgu kayänampaq (Juan 14:23).

3 KAQ: ¿Imanötan Jesusqa rikätsikurqan nunakunata kuyanqanta?

Bibliachömi willakun Jesusqa nunakunata alläpa kuyanqanta (Proverbius 8:31). Jesusqa kuyakoq karmi imëkanöpa nunakunata yanaparqan. Milagrukunata ruranqampis manam poderyoq kanqanllatatsu rikätsikurqan, sinöqa llakipäkoq y kuyakoq kanqantam (Marcus 1:40-42). Jesusqa yachanëpaqmi karqan y llapantapis igualpam trataq. Shumaq parlaptin y yachatsikuptinmi wiyaqninkunaqa llakishqa këkarpis kushishqa y kallpayoq tikrariyaq. Nunakunata kuyarmi pëkunarëkur sufrir wanurqan, peru llapan nunakunata kuyarpis, yachatsikunqankunata wiyakoqkunata y cäsukoqkunatam Jesusqa mas kuyan (leyi Juan 15:13, 14).

MASLLA YACHAKUSHUN

Jesus imanö kanqanta, y pënö kuyakoq y alli nuna kanantsikpaqmi yachakushun.

4 KAQ: Jesusqa Teytantam kuyarqan

Jesusqa ruranqankunawanmi yachatsimarquntsik noqantsikpis Jehoväta kuyanantsikpaq. Leyiyë Lücas 6:12; Juan 15:10 y 17:26 ima ninqanta. Cada textuta leyirir këpaq parlayë:

¿Imanötan noqantsikpis Jesusnö Jehoväta kuyanqantsikta rikätsikushwan?

Jesus mañakuykan. — Jesusqa Teytan Jehovätam kuyarqan, y imëpis pëmanmi mañakoq.

5 KAQ: Jesusqa jukkunapaqmi masqa yarpachakoq

Jesusqa kikinllaman pensanampa rantinmi jukkunapaq masqa yarpachakurqan, tsëmi pishipashqa o utishqa këkarpis jukkunata yanapanampaq imëpis kallpachakoq. Leyiyë Marcus 6:30-44 ima ninqanta y këkunapaq parlayë:

¿Imanötan Jesus rikätsikurqan jukkunapaq yarpachakunqanta? (Rikäyë 31, 34, 41 y 42 kaq versïculukunata).
¿Imanirtan Jesusqa tsë nunakunata yanaparqan? (Rikäyë 34 kaq versïculuta).
Jesus ruranqankunata rikar, ¿imatataq Jehoväpita yachakunki?
¿Imanötan Jesusnö jukkunapaq yarpachakunqantsikta rikätsikushwan?

Pitsqa tantapita y ishkë pescädullapitam Jesus milagruta rurashqa mëtsika ollqukuna, warmikuna y wamrakuna pachankuna juntanqanyaq mikuyänampaq.

6 KAQ: Jesusqa alli nunam karqan

Jesusqa manam atska qellëyoqtsu karqan, peru alli nuna y kuyakoqmi karqan. Noqantsikpis pënömi kanantsik. Leyiyë Hëchus 20:35 ima ninqanta y këpaq parlayë:

¿Imata rurar kushishqa kanapaq kaqtataq Jesusqa nirqan?

VIDEUTA rikäyë y këkunapaq parlayë:

VIDEU: “Jukkunata yanaparmi mas kushishqaqa kantsik” (wakin kaqlla) (4:00)

Pobrilla karpis, ¿imanötan wakinkunata yanapashwan?

¿Musyarqëkiku?

Bibliachömi nin Jesuspa jutinchö Jehoväman mañakunapaq (leyi Juan 16:23, 24). Tsënömi agradecikuntsik Jehoväwan amïgu kanapaq Jesus yanapamanqantsikta.

WAKIN IMA NIYANQAN: “Diosqa manam yarpachakuntsu nunakuna sufriyaptin”.