Diosqa respetanmi y precisaqpaqmi churan warmikunata

JESUSQA Patsachö këkarnin alleqmi rikätsikurqan ciëlochö Teytan imanö kanqanta y imatapis imanö ruranqanta. “Cuentata qocuriyanqui[m] [...] quiquïllapita imatapis mana rurashqäta, sinoqa Dios Yaya yachatsimashqanllata parlashqäta” nirqanmi. Jina “pe gustanqantam noqaqa imatapis siempri rurä” nirqanmi (Juan 8:28, 29; Colosenses 1:15). Tsëmi warmikunapaq Dios imata pensanqanta musyanapaq y, pë munanqannö warmikunata tratanapaqqa, alläpa precisan Jesuspita yachakunantsik.

Mateo, Marcos, Lucas y Juan librokunata estudiaqkunam niyan, wakinkunapitaqa alläpa jukläya Jesus warmikunata tratanqanta. ¿Imakunachö? Y, ¿yachatsikïninkuna yanapantsuraq kanan witsan warmikunata?

¿Imanötaq warmikunata Jesus tratarqan?

Jesusqa manam pensaqtsu warmikunapa culpan ollqukuna jutsaman chäyanqanta. Mëtsikaq yachatsikoq religioso judïokunam niyaq warmikunaqa juk jatun tentación kayanqanta, y pëkunawan ichikllapis juntakïqa jutsaman raslla chätsikunqanta. Tsëmi warmikunata permitiyaqtsu mëchöpis ollqukunawan parlayänanta o vëlonnaq puriyänanta. Pero Jesusqa manam michaqtsu ollqukunawan juntakuyänanta. Tsëpa rantinqa, ollqukuna mana alli munëninkunata alli tsaräyänampaq y warmikunata respetayänampaqmi yachatsikurqan (Mateo 5:28).

Juk kutim kënö nirqan: “Meqan nunapis warminpita diborsiacurir jucwan casacorqa, punta caq warminta jalucurmi [desonrarmi] jutsaman ishquirin” (Marcos 10:11, 12). Yachatsikoq judïokunaqa creiyaq ‘ima achäquirëcurllapis’ ollqukuna warminkunapita rakikäkurita puëdeyanqantam, pero Jesusqa manam tsënötsu pensaq (Mateo 19:3, 9). Casi llapan judïokunapaqmi juk ollqu mana majanwan punukunqanqa jutsatsu kaq. Yachatsikoq judïokunapaqqa warmikunallash majankunata traicionayaq, pero ollqukuna jukwan punukuyanqanqa manash traiciontsu kaq. Bibliapita juk yachaq nuna ninqannöpis, “warmikunallatsu, sinöqa ollqukunapis jutsa rurëpita cuidakuyänan precisanqanta Jesus rikätsikurqa, warmikunatam respetëkätsirqan y precisaqpaq churëkarqan”.

Kanan witsan warmikunata imachö yanapanqan: Jehoväpa testïgonkunapa congregacionninkunachöqa warmipis ollqupis shumaqmi tratanakuyan, warmikunaqa musyayanmi ollqukuna respëtowan rikäyänampaq kaqta, y alläpa confianzawanqa mana tratayänampaq kaqta. Cristiano ollqukunaqa kallpachakuyan Biblia kënö ninqanta wiyakuyänampaqmi: “Chacwancunatanäqa riquequï imeca mamequitano, y shipashcunatapis imeca paniquitano limpiu shonqiquiwan respetacunqui” (1 Timoteu 5:2).

Jesusqa warmikunata yachatsirqanmi. Tsë witsan yachatsikoq judïokunaqa manam munayaqtsu warmikuna yachakuyänanta. Pero Jesusqa rasumpa kaqtam yachatsirqan, y animarqanmi pensayanqankunata parlayänampaqpis. Jina manam pensarqantsu warmikunapa rurëninqa cosinakïlla kanqanta. Tsëmi Maria yachakïta munaptin shumaq yachatsirqan (Lucas 10:38-42). Y Lazaru wanushqa këkaptin Jesus tapunqanta contestarninmi Mariapa nanan Martapis rikätsikurqan Jesuspa yachatsikïnin yanapanqanta (Juan 11:21-27).

Jesusqa procuraqmi warmikunata yachatsita. Tsë witsan judía warmikunaqa casi llapanmi munayaq wamrayoq këta, y wamrankuna profeta o precisaq nuna kanantam munayaq. Tsëmi Jesusta juk warmi “allapa cushiquiyoqchi wachashoqniqui” niptin, pëqa yachatsirqan más kushikïpaqqa Diosta wiyakï kanqanta (Lucas 11:27, 28). Awmi, tsë witsan warmikunaqa munar o mana munarpis costumbrekunatam más precisaqpaq churayaq, pero Jesusqa rikëkätsirqan tsëpitapis más precisaq rurëninkuna kanqantam (Juan 8:32).

Kanan witsan warmikunata imachö yanapanqan: Jehoväpa testïgonkunapa reunionninkunachöqa tapukïkunawan y respuestakunawanmi yachakuyan, y tsëchöqa warmikuna parlakuriyanqanta alläpa precisaqpaqmi churayan. Tsë reunionchö yachatsikoqkunaqa alläpa respëtowanmi tratayan “alli rurenincunawan juc ejempluno” poqu cristiänakunata (Titu 2:3). Jina pëkunapa yanapakïninwanmi Diospa Gobiernompita alli willakïkunatapis musyatsikïkäyan (Salmo 68:11; rikäri 9 kaq päginachö “¿Apóstol Pablu micharqanku warmikuna parlayänanta?” neq recuadrota).

Jesusqa precisaqpaqmi warmikunata churarqan. Unë witsankuna ollqu wamrayoq këta alläpa precisaqpaq churayanqantam Biblia rikätsikun. Judïokunapa libronchömi kënö neq: “Kushikuyätsun ollqu wamrayoq kaqkuna, pero allaw, warmi wamrayoq kaqkuna”. Wakin teytakunapaqqa alläpa sasam kaq warmi wamrayoq këqa: majankunam ashipuyaq, nïkurmi casakuyänampaq pagakuyaq, y manam shuyäyaqnatsu edäyëninkunachö cuidayänantapis.

Pero Jesusqa warmi wamrapa y ollqu wamrapa kawënintapis precisaqpaqmi churarqan. Nain markapita viuda warmipa ollqu wamranta kawaritsinqannöllam, Jairopa warmi wamrantapis kawaritsirqan (Marcos 5:35, 41, 42; Lucas 7:11-15). Juk kutinam, “chunca puwaq (18) watana” qeshyaq warmita jampirqan. Y hasta “Abrahampita castantsicmi” nirqanmi, y tsënö palabrakunaqa manam yureqllatsu judïokuna qellqayanqan librokunachöqa (Lucas 13:10-16). Tsënö nirqa warmikunapis derëchoyoq kayanqantam rikätsikïkarqan, y markäkïninkunatam precisaqpaq churëkarqan (Lucas 19:9; Galatas 3:7).

Kanan witsan warmikunata imachö yanapanqan: Asiachömi niyan warmi wamrata winatsiqa vecïnopa huertanta reguë cuenta kanqanta. Pero kuyakoq cristiano teytaqa manam tsënötsu pensan. Tsëpa rantinqa, shumaqmi llapan wamrankunata, warmi o ollqu kayaptimpis cuidan, y wamrankuna alli yachakuyänanta y alli saludyoq kayänantam procuran.

Jesusqa warmikunaman markäkoqmi o yärakoqmi. Judïokunapa juzgädonkunachöqa, juk warmipa testimoniontaqa, juk esclävopa testimoniontanömi precisaqpaqtsu churayaq. Tsëmi unë pasanqankunata qellqaq Josefo kënö nirqan: “Warmikuna testificäyanqanqa manam välinqatsu, porque warmikunaqa mana precisaqkunatam parlayan y niyanqankunaqa mana markäkïpaqmi [yärakuypaqmi]”.

¡Imanö jukläyam Jesusqa karqan! Pëqa warmikunatam akrarqan kawarinqanta musyatsikuyänampaqpis (Mateo 28:1, 8-10). Kë markäkoq warmikuna Jesus wanunqanta y pampayanqanta rikashqa këkäyaptimpis, apostolkunaqa manam creiyarqantsu pëkuna niyanqanta (Mateo 27:55, 56, 61; Lucas 24:10, 11). Pero kawarinqanta puntata musyayänampaq y willakuyänampaq warmikunata akrarqa, Jesus rikätsikurqan warmikunata precisaqpaq churanqanta y wakin qateqninkunanölla testigo këta puëdeyanqantam (Hechos 1:8, 14).

Kanan witsan warmikunata imachö yanapanqan: Congregacionta cargonkunachö katseqkunaqa warmikuna pensayanqanta precisaqpaqmi churayan. Warmiyoq ollqukunanam majankuna ninqanta cuentaman churarnin respetayanqanta rikätsikuyan (1 Pedru 3:7; Génesis 21:12).

Bibliapa musyatsikïninkunaqa warmikuna kushishqa kayänampaqmi yanapakun

Cristuta qateqkunaqa warmikunata respetayanmi y libre kayänantam dejayan, tsënömi rikätsikuyan warmikunata kamarnin Dios pëkunapaq munanqanta cuentaman churayanqanta (Génesis 1:27, 28). Cristiano ollqukunaqa manam pensayantsu warminkunapita más precisaq kayanqanta. Tsëpa rantinqa, Bibliapa musyatsikïninkunata wiyakurmi warminkunawan kushishqa kawakuyan (Efesios 5:28, 29).

Yelënam Bibliata yachakur qallanqan witsankuna majan mana alli tratëkaptimpis upällalla aguantakoq. Majanqa winashqa kanaq alläpa maqanakuyanqan wayichömi, jina täranqan markachöqa noviatapis suwayaqmi y alläpam warmikunata maltratayaq. Yelënaqa kënömi nin: “Bibliam kallpata qomarqan. Rasumpa kuyamaq, precisaqpaq churamaq y noqapaq yarpachakoq Dios kanqantam yachakurqä. Bibliapita yachakurqa nunäpis jukläya nuna tikrëta puëdenqantam cuentata qokurqä”. Y tsënömi pasarqan, tiempowanqa bautizakurirmi nunanqa Jehoväpa testïgon tikrarirqan. Kënömi Yelena nin: “Peqanta alli tsarëtam yachakurqan. Y ishkäkunam perdonanakïta yachakuyarqä”. Nïkurnam kënö nin: “Bibliapa musyatsikïninkunam yanapamashqa casado kawakïnïchö más kuyashqa y cuidashqa sientekunäpaq” (Colosenses 3:13, 18, 19).

Kënöqa manam Yelënallatatsu pasashqa. Mëtsika millón cristiänakunam majankunawan alläpa kushishqa kawakuyan Bibliapa musyatsikïninkunata wiyakuyänampaq kallpachakurnin. Jinamampis shoqashqa, respetashqa y librem sientekuyan cristiano mayinkunawan paqta Diosta sirwirnin (Juan 13:34, 35).

Llapan cristiänokunam, ollqupis y warmipis, alleq musyayan jutsasapa kayanqanta y tsëpa culpan “imeca mana alli rureman” chäyanqanta. Tsënö kaptimpis, markäkuyanmi kuyakoq Teytankuna Jehová Diosman witirqa, shamoq tiempochö tsë tukï mana alli rurëkunapita ‘librashqa’ kayänampaq kaqta. ¡Imanö shumaq shuyäkïmi këqa Diospa tsapäkïninchö këkaq ollqukunapaq y warmikunapaq! (Romanos 8:20, 21.)