Capernaumchö espantëpaq milagrukunata Jesus ruran

Jesusqa Pëdruta, Andresta, Santiäguta y Juantam nunakunata pescaq kayänampaq akrarqan. Säbadu junaqnam Capernaumchö këkaq Diosta adorayänan wayiman ëwarqan. Tsëchömi Jesusqa yachatsikurqan y yachatsikunqampitaqa yapëmi espantakuyarqan, pëqa manam Leyta qellqaqkunanötsu yachatsikoq, sinöqa autoridäyoq nunanömi.

Tsë junaqmi Diosta adorayänan wayichö supëyoq juk nuna këkarqan y pëmi sinchipa kënö nirqan: “¿Imatataq noqakunapita munanki Nazaret markapita Jesus? ¿Ushakätsiyämaqnïku shamurqunki? Alleqmi musyä pï kanqëkita, ¡qamqa Diospa Santu Tsurinmi kanki!”. Tsënam Jesusqa sinchipa piñaparnin kënö nirqan: “¡Upälla kë, y pëpita yarqï!” (Marcus 1:24, 25).

Tsënam tsë mana alli espïrituqa nunata seqirir tapsikacharkurqan y qaparïkurmi “mana imanarlla” pëpita yarqurirqan (Lücas 4:35). Tsëchö këkaq nunakunaqa rikëkäyanqanta manam creiriyarqantsu, tsëmi, “¿imanataq këqa? [...] Autoridäwantaq mana alli espïritukunatapis mandan, y ninqantapis cäsukuyantaq” niyarqan (Marcus 1:27). Tsë pasakunqantaqa entëru Galilëa provinciapam willakuriyarqan.

Diosta adorayänan wayipita yarqurirqa, Pëdrupa wayinmanmi ëwayarqan. Tsëchönam fiebriwan qeshyëkaq Pëdrupa suegranta kachakëkatsinampaq Jesusta rogakuyarqan. Tsënam Jesusqa pëman witirir makipita tsarirkur sharkatsirqan. Tsë höram warmiqa kachakärirqan, y Jesusta, qateqninkunata y pëwan këkaqkunatam atiendir qallëkurqan, itsachi mikïninkuna qararirqan.

Tardiyäriptinnam wayipa punkunman mëtsika nunakuna charnin qallëkuyarqan. Qeshyëkaqkunatam Jesusman apayarqan, y pënam “cada ünuman makinta churarnin llapankunata kachakätsirqan” (Lücas 4:40). Diospa Palabran unëpitana willakunqannömi, Jesusqa ima qeshyayoq kayaptimpis llapankunata kachakätsirqan (Isaïas 53:4). Jina mëtsikaq nunakunapitam supëkunata qarqurqan. Tsë supëkunaqa, “qamqa Diospa Tsurinmi kanki” nirmi nunakunapita yarquyarqan (Lücas 4:41). Peru Jesusqa piñaparmi masta parlayänantaqa jaqirqantsu. Tsë supëkuna pë Cristu kanqanta musyayaptimpis, Jesusqa manam Diosta sirweq tukur tsënö parlayänantaqa munarqantsu.