Juk suëñuchönömi Cristuta precisaqpaq churashqata rikäyarqan

Cesarëa de Filïpu markachömi Jesusqa yachatsikïkarqan, tsëqa Hermon jirkapita 25 kilömetru karuchönömi këkarqan. Tsëchömi juk alläpa precisaq willakïta apostolninkunata kënö nirqan: “Këchö shëkaqkunapita wakinnikikunaqa manam ni imanöpapis wanuyankitsu, puntata nunapa Tsurinta Gobiernunchö shamïkaqta rikäyanqëkiyaq” (Mateu 16:28).

Itsachi apostolninkunaqa Jesus ima nita munëkanqanta tapukuyarqan. Y juk semäna pasariptinmi, Jesusqa kima apostolninkunawan juk jirkata ëwayarqan. Itsachi paqaspa ëwayarqan, porqui qateqninkunaqa pununëkäyarqanmi. Teytanman mañakïkarmi Jesusqa Pëdrupa, Santiägupa y Juanpa puntachö jukläya tikrarirqan. Y tsë höram, qaqllan Intinö chipapaqta y yulaq röpampis chipapaqta rikäriyarqan.

Jina tsëllachömi ishkaq nunakuna Jesuswan parlëkäyarqan; pëkunaqa “Moiseswan Elïasmi” kayarqan. Y Jesus ewkunampaq kaqta y Jerusalenchö ima pasakunampaq kaqtam parlëkäyarqan (Lücas 9:30, 31). “Jesus ewkunampaq” parlëkäyanqanqa, wanunampaq y kawarimunampaq kaqtam rikätsikïkarqan (Mateu 16:21). Tsënö parlayanqanqa Jesus wanunampaq kaqtam rikätsikurqan, y tsënömi pasakunan karqan Pëdru mana munëkaptimpis.

Tsëpitanam kiman apostolkunaqa ima pasakïkanqanta alläpa mantsakashqa rikäyarqan y wiyayarqan. Suëñuchönö pasakïkanqanta rikëkäyaptimpis, rasumpanö kaptinmi Pëdruqa kënö nirqan: “Maestru, alläpa allim këchö këkäyämunqäqa. Kima carpakunata sharkaratsiyämushaq: jukta qampaq, jukta Moisespaq, y juktana Elïaspaq” (Marcus 9:5). Itsa tsënöqa nirqan suëñïninchönö rikëkanqan mana ushakänanta munarnin.

Pëdru parlëkaptinllaraqmi juk chipapaq pukutë llapankunata tsapärirqan, y kënö neqtam wiyayarqan: “Këmi Tsurï, kuyë Tsurï, pëpitam alläpa kushikü. Pëta wiyayë”. Dios parlanqanta wiyëkurnam apostolkunaqa alläpa mantsakar patsaman kukukïkuyarqan, peru Jesusnam kënö nirqan: “Sharkuyë. Ama mantsakäyëtsu” (Mateu 17:5-7). Sharkurirqa Jesusllatanam rikäyarqan. Waräriptinnam jirkapita urärëkämur Jesusqa qateqninkunata kënö mandarqan: “Rikäyanqëkitaqa ama pitapis willayankitsu nunapa Tsurin wanushqakunapita sharkatsimushqa kanqanyaq” (Mateu 17:9).

Suëñuchönö Elïasta rikashqa karninmi, apostolkunaqa Jesusta kënö tapuyarqan: “Tsëqa, ¿imanirtaq Ley qellqaqkunaqa Elïasraq puntata shamunampaq kaqta niyan?”. Jesusnam kënö nirqan: “Elïasqa shamushqanam, peru pëkunaqa manam reqiyashqatsu” (Mateu 17:10-12). Elïas ruranqanta Bautizakoq Juan rurashqa kaptinmi, Jesusqa pëpaq parlëkarqan. Elïasqa Eliseupaqmi nänita alistashqa karqan y Bautizakoq Juannam Jesuspaq.

Tsë pasakunqanqa Jesustawan apostolninkunata alläpam yanaparqan, tsëqa Diospa Gobiernunchö Cristu gobernanampaq kaqtam rikätsikurqan. Jesus änikunqannömi qateqninkunaqa rikäyarqan “nunapa Tsurinta Gobiernunchö shamïkaqta” (Mateu 16:28). Pëkunaqa “podernimpita y këkämunampaq kaqpita[m]” jirkachö rikäyarqan. Dios akranqan Rey kanqanta rikätsinanta fariseukuna mañayaptimpis, Jesusqa manam ima señaltapis rurarqantsu. Peru kiman apostolninkunaqa rikäyarqanmi suëñuchönö pasakunqanta y tsëchömi Diospa Gobiernumpita musyatsikïkuna cläru rikakärirqan. Tiempu pasariptinnam, Pëdruqa kënö qellqarqan: “Diospa musyatsikïninkunaman[mi] markäkïnintsikqa mas sinchi tikrashqa” (2 Pëdru 1:16-19).