Humildi kë alläpa precisanqanta Jesus yachatsikun

Cesarëa de Filïpu markachö jukläya tikrarir y supëyoq jövinta kachakäratsirmi, Jesusqa Capernaumman ëwarqan. Peru kë kutichöqa qateqninkunallawanmi ëwëkarqan (Marcus 9:30). Tsë ëwëkäyanqanchömi, wanuriptin imata rurayänampaq kaqta y yachatsikurnin sïguiyänampaq kaqta nirqan. Kënömi entienditsirqan: “Nunapa Tsurinqa nunakunapa makinmanmi rantikushqa kanqa, y wanutsiyanqam, y kima junaqtam sharkatsishqa kanqa” (Mateu 17:22, 23).

Tsënö parlanqampitaqa qateqninkuna musyayarqannam. Pëdru mana creikaptimpis, Jesusqa wanutsiyänampaq kaqta nishqanam karqan (Mateu 16:21, 22). Jina kiman apostolninkunaqa, jukläya tikraqtam rikäyarqan y “ëwakunampaq” parlëkäyanqantam wiyayarqan (Lücas 9:31). Jesus ninqanrëkurmi qateqninkunaqa alläpa llakishqa sientikuyarqan, peru manaran alleqllaqa entiendiyarqantsu ima nita munëkanqanta (Mateu 17:23). Peru tsënö kaptimpis manam tapuyarqantsu.

Tsëpitanam Capernaumman chäriyarqan, tsë markachöqa atska kutim Jesus quedakushqa karqan y wakin apostolninkunaqa tsë markapitam kayarqan. Tsëchömi templupaq impuestuta cobrakoq nunakuna Pëdru kaqman witiyarqan, itsa Jesusta acusëta munarnin. Tsëmi kënö tapuyarqan: “¿Manaku maestrïkikunaqa impuestupita ishkë dracma qellëta pagakun?” (Mateu 17:24).

Pëdruqa awmi nirqanmi. Peru wayiman chäriyaptinnam, Jesusqa tsë asuntupita kënö tapurqan: “¿Ima ninkitaq Simon? ¿Pikunapitataq patsachö reykuna tribütuta y impuestuta chaskiyan? ¿Tsurinkunapitaku o juk nunakunapitaku?”. “Juk nunakunapitam” nirmi Pëdruqa contestarqan. Tsënam Jesusqa kënö nirqan: “Rasumpa kaqchöqa, tsurikunaqa manam impuestuta pagayanmantsu” (Mateu 17:25, 26).

Ciëluchö y Patsachö llapan kaqkunaqa Jesuspa Teytampam, y templuchöpis pëllatam adorayaq. Jesusqa Diospa Tsurin karninmi, templupaq impuestuta pagakunampaqqa obligädutsu karqan. Tsëmi Pëdruta kënö nirqan: “Peru mana parlamänapaq, qochaman ëwë y anzuëluta jitë, y puntata tsarimunqan kaq pescäduta jorqaramur, shiminta kichë, tsëchömi pläta metal qellëta tarinki. Tsëta tsarirkur noqapita y qampita qoykï” (Mateu 17:27).

Tsëpitanam, qateqninkunaqa Gobiernunchö pï mas precisaq kanampaq kaqta tapuyarqan. Wanunampaq kaqpitaqa manam tapushqaraqtsu kayarqan, peru tsë kutichöqa, shamoq tiempuchö pëkunawan ima pasanampaq kaqta musyëta munarmi tapuyarqan. Capernaumman kutiyanqanchö qateqninkuna imata parlëkäyanqantaqa Jesusqa musyarqannam. Tsëmi kënö tapurqan: “¿Ima asuntupaqtaq nänichö discutikäyarqëki?” (Marcus 9:33). Pëkunapita mëqan mas precisaq kanqampitam discutikäyarqan, tsëmi Jesus tapuriptin penqakurnin upälla quedakuyarqan. Tsëpitanam imapita parlëkäyanqanta rikätsiyänampaq kënö tapuyarqan: “Rasumpa kaqchöqa, ¿pitaq ciëluchö Gobiernuchö mas precisaq?” (Mateu 18:1).

Kima watapa Jesus yachatsikunqanta rikashqa y wiyashqa këkarnin, tsë asuntupaq qateqninkuna discutikäyanqanqa mana creipaqnömi karqan. Peru rasumpa kaqchöqa jutsasapa nunam kayarqan, jina qellëyoq y autoridäyoq këta precisaqpaq churayanqan religionchömi winashqa kayarqan. Jinamampis, Diospa Gobiernumpa “llävinkunata” qonampaq Pëdruta Jesus äninqampitaqa manam alläpa unëraqtsu pasashqa karqan. ¿Tsërëkurtsuraq Pëdruqa wakinkunapita mas precisaq kanqanta pensarqan? Itsa Santiäguwan Juanpis Jesus jukläya tikrashqa kanqanta rikäyanqanrëkur tsënölla pensayarqan.

Imanö kashqa kaptimpis, Jesusqa qateqninkunata consejarqanmi. Juk wamrata chowpinkunaman shëkatsirmi kënö nirqan: “Imanöpis pensayanqëkita mana cambiar y wamrakunanö mana karqa, manam ni imanöpapis ciëluchö Gobiernuman yëkuyankitsu. Tsëmi, pipis kë wamranö qollmi shonqu kaq, ciëluchö Gobiernuchöqa mas precisaq, y pipis kë wamratanö jutïchö chaskeq kaqqa, noqatapis chaskikämanmi” (Mateu 18:3-5).

¡Imanö shumaq yachatsikïmi karqan! Jesusqa manam piñakurqantsu, ni manam kikinkunallapaq imatapis asheq kayanqantsu nirqan. Tsëpa rantinqa, juk precisaq yachatsikïtam juk wamrawan pëkunata yachatsirqan. Wamrakunapaqqa manam qellëyoq kë ni jukkunapita mas precisaq këpis precisantsu. Jesusqa wamrakunanö kayänantam munarqan, tsëmi kënö nirqan: “Qamkunachö pipis mana precisaqnölla portakoq kaqmi, mas precisaq kaq” (Lücas 9:48).