Jesusqa mas consëjukunatam apostolninkunata qorqann

Jesusqa juk igualatsikïwanmi, imanö portakuyänampaq kaqta yachatsirqan. Qateqninkunaqa wamrakunanö humildim kayänan karqan, porqui wamrakunaqa manam precisaq këman yarpachakuyantsu. Jinamampis, Jesuspa imanö kënintam qatiyänan karqan (Mateu 18:5).

Apostolkunaqa pï mas precisaq kanqampitam discutikäyarqan, tsëmi Jesus yachatsikunqampita masraq yachakïta wanayarqan. Tsëpitanam Juanqa juk pasakunqampita kënö nirqan: “Juk nunatam rikäyarqö jutikichö supëkunata qarqïkaqta, y michëtam tïrayarqö, porqui manam noqakunawantsu qatishunki” (Lücas 9:49).

¿Apostolkunalla qeshyëkaqkunata kachakätsita y supëkunata qarqïta puëdiyanqantaku Juanqa pensarqan? Tsënö kaptinqa, ¿imanirtaq juk judïu nuna supëkunata qarqïta puëdirqan? Itsa Juanqa pensarqan, Jesusta mana qatikarninqa tsë milagruta rurëta mana puëdinqanta.

Peru Jesusqa kënömi nirqan: “Ama michëta tïrayëtsu, porqui manam pipis kantsu jutïchö milagrukunata rurarir, jinan höra noqapaq mana allita parlaqqa. Porqui pipis contrantsikchö mana këkaqqa, noqantsikwanmi këkan. Y Cristupa kayanqëkirëkur pipis juk väsu yakuta qarayäshoqnikikuna kaqqa, [...] manam ni imanöpapis premiunta oqranqatsu” (Marcus 9:39-41).

Tsë nunaqa, manam Cristupa lädunchö kanampaq obligädutsu karqan. Porqui Jesusqa creikoqninkunata manaran patsakätsishqaraqtsu karqan. Tsëmi pëwan mana ëwanqanrëkurqa, chikeqnin kanqantatsu ni mana alli religionta patsëkätsinqantatsu rikätsikurqan. Tsë nunaqa Jesusmanmi markäkurqan, y tsërëkurmi premiuta chaskinampaq kaqta Jesusqa nirqan.

Peru apostolkuna rurëninkunawan y parlëninkunawan tsë nunata ishkitsiyaptinqa, alläpa mana allitam rurëkäyanman karqan. Tsëmi Jesus kënö nirqan: “Pipis markäkoq pishi wamranö kaqkunapita mëqanllatapis ishkitseq kaqpaqqa, mas allim kanqa ashnu tumatsinqan mulinu rumita kunkanman warkurkur, lamarman jitarpuyanqan” (Marcus 9:42). Tsëmi pishi wamranö kaqkunata makinwan, chakinwan o nawinwan ishkitsiyaptinqa jorquriyänampaq kaqta nirqan. Tsëninnaq Diospa Gobiernunman yëkunantsikmi masqa precisan, porqui manam imapaqpis välinqatsu cuerpuntsikchö katsinqantsikkunawan Gehënaman jitashqa kanqantsikqa. Itsachi apostolkunaqa Jerusalenpa amänunchö Hinon pampataqa rikäyashqa kayarqan, tsëchöqa imëkapis mana väleq kaqkunatam kayayaq y tsëqa rikätsikun chipyëpa ushakëtam.

Jina Jesusqa kënömi nirqan: “Paqtataq pishi wamranö kaqkunapita mëqantapis despresyayankiman, porqui ciëluchö këkaq angelninkunaqa, ciëluchö këkaq Teytäpa qaqllanta rikëkäyanqantam qamkunata niyaq”. “Pishi wamranö” kaqkunaqa Jehoväpaq alläpa precisaqmi kayan. Jesusqa willakurqan 100 üshayoq mitsikoq nunapaqmi y pëpaqa juk üshanmi oqrakashqa karqan. Tsë nunaqa 99 üshankunata jaqirïkurmi oqrakashqa kaqta asheq ëwakurqan, y taririrqa alläpam kushikurqan. Jina Jesusqa kënömi nirqan: “Tsënöllam ciëluchö këkaq Teytäpis pishi wamranö kaqkunapita jukllaqllapis ushakärinantaqa munantsu” (Mateu 18:10, 14).

Tsëpitanam, itsa pï mas precisaq kanqampaq discutishqa kayanqanman pensarnin Jesusqa kënö consejarqan: “Kikikikunachö kachita katsiyë, y juknikikuna juknikikunawan yamë kawakuyë” (Marcus 9:50). Kachiqa mikï mas alli kanampaqmi yanapakun. Tsënöllam yamë kawakï kanampaqqa, imatapis shumaq parlanqantsikqa kachi cuenta alläpa yanapakun, peru discutipa parlanqantsikqa manam (Colosensis 4:6).

Tsëpitanam jatun problëma kaptin imata ruranapaq Jesus kënö nirqan: “Sitsun creikoq mayiki contrëki jutsallakurinqa, tsëqa ëwë y japallanwan parlar mana allita ruranqanta rikätsi. Wiyashuptikiqa, alli kaqta ruranampaqmi creikoq mayikita yanaparqunki”. ¿Y cäsukïta mana munaptinqa? “Juk o ishkaq mas testïgukunata pushë, tsënöpa ishkaq o kimaq testïgukuna musyatsikuyanqanwan ima asuntupis cläru musyakänampaq”. Peru tsënöpis mana altsakaptinqa, “tsëqa congregacionchö creikoqkunata” rikaqkunatam willanantsik. ¿Imaraq pasakunqa pëkunatapis mana cäsukuptinqa? “Tsëqa juk nacion nunakunanö y impuestu cobrakoqkunanö qampaq katsun”. Judïukunaqa manam pëkunawan juntakuyaqtsu (Mateu 18:15-17).

Creikoqkunata rikaqkunaqa Diospa Palabranwanmi yanapakuyänan. Sitsun pëkuna decidiyan tsë nuna culpayoq kanqanta y piñapashqa këta wananqanta, tsënö decidiyanqanqa ciëluchöpis watashqanam kanqa. Peru jutsannaq kanqanta decidiyaptinqa, tsëqa ciëluchöpis paskakashqam kanqa. Jesus tsënö ninqanqa alläpam yanapakunan karqan. Tsënö asuntu rikaqkunatam Jesus kënö nin: “Porqui mëchöpis ishkaq o kimaq jutïchö ëllurëkäyanqanchöqa, noqapis tsëchömi këkä, pëkunapa chowpinchö” (Mateu 18:18-20).