Jerusalenman ëwëkarnin yachatsikun

Jesusqa unëpanam Diospita yachatsikïkarqan, peru masqa Galilëachömi, tsëchöqa Judëa provinciapita mas allim yachatsikunqanta wiyakuyarqan. Jerusalenchö këkar juk nunata Säbaduchö kachakäratsiptinmi, judïukunaqa imëkanöpa wanutsita procurayarqan (Juan 5:18; 7:1).

32 watachö Ramäda fiestaqa ichikllachönam kanan karqan. Tsë fiestaqa cosëchata ëllupakï usharinqantam rikätsikoq, tsërëkurmi nunakunaqa alläpa kushikur Diosta agradecikuyaq. Qanchis junaqpam kaq, y puwaq junaqnam juk alläpa precisaq asamblëata rurayaq.

Jesuspa wawqinkuna Santiägu, Simon, Josë y Jüdasqa kutin kutinmi kënö niyarqan: “Këpita yarqurnin Judëa provinciata ëwë”. Jerusalenqa Diosta adorayänan markam karqan, y watachö kima fiestanmanqa mëtsikaqmi ëwayaq. Tsëmi wawqinkunaqa kënö niyarqan: “Pipis reqishqa këta munaqqa manam imatapis pakëllapaqa rurantsu. Tsëkunata rurëkarqa, llapan nunakunapa rikëninchö rurë” (Juan 7:3, 4).

Wawqinkunaqa manam Diospa Akrashqan kanqanta creiyarqantsu. Tsënö kaptimpis, tsë fiestachö milagrukunata ruranantam munayarqan. Peru Jesusqa kënömi nirqan: “Mana cäsukoq nunakunaqa manam imarëkurpis qamkunataqa chikiyäshunkitsu, peru noqataqa chikiyämanmi, porqui noqaqa rurëninkuna alläpa mana alli kanqantam musyatsikü. Qamkuna fiestaman witsäyë; noqaqa manaran kë fiestamanqa witsäshaqraqtsu, porqui noqapaq dispunishqa tiempuqa manam chämushqaraqtsu” (Juan 7:5-8).

Wakin viajaqkunawan wawqinkuna ewkuyanqampita juk ishkë junaqkuna pasariptinmi, Jesuswan qateqninkunaqa pitapis mana mäkatsishllapa ëwakuyarqan. Manam Jordan mayu kuchumpa nunakuna ëwaräyanqampatsu ëwayarqan, sinöqa Samaria markapam. Tsëchö quedakuyänampaqmi juk posädata wanayarqan, tsëmi Jesusqa posädata ashiyänampaq willakoqkunata mandarqan. Peru Samaria nunakunapa caserïunchöqa manam shumaqtsu Jesusta chaskiyarqan, porqui judïukunapa fiestanta celebraq Jerusalenta ëwëkanqantam musyayarqan. Tsërëkurmi Santiäguwan Juanqa piñashqa kënö tapuyarqan: “Teytë, ¿munankiku ciëlupita nina urämur këkunata ushakäratsinampaq mañakarayämunäta?” (Lücas 9:54). Tsënö niyanqampitam Jesusqa pëkunata piñaparqan, y tsëpitaqa viajarmi sïguiyarqan.

Tsë ëwëkäyanqanchömi, Leyta qellqaq nuna Jesusta kënö nirqan: “Maestru, mëta ëwaptikipis qatishqëkim”. Peru Jesusnam kënö nirqan: “Atoqkunapaqa machëninkuna kanmi, y pishqukunapapis qeshunkuna kanmi, peru nunapa Tsurimpaqa, manam kantsu peqanta mëchö jamaratsinanllapaqpis” (Mateu 8:19, 20). Tsënö ninqanwanmi, qateqnin këqa mana fäcil kanampaq kaqta rikätsirqan. Peru tsë nunaqa, itsa alläpa orgullösu karnin tsënö kawëtaqa munarqantsu. ¿Y noqantsikqa? ¿Jesusta qatinantsikrëkur imakunata ruranapaqtaq listu këkantsik?

Tsëpitanam Jesusqa juk nunata kënö nirqan: “Qatimaqnï kë”. Tsë nunanam kënö nirqan: “Teytë, puntataqa ëwar teytäta pamparamunätaraq jaqirallämë”. Tsë nunapa kawënin imanö kanqanta musyarmi, Jesusqa kënö consejarqan: “Wanushqankunataqa wanushqa këkaqkuna pampakuyänanta jaqiri, peru qamqa ëwë y Diospa Gobiernumpita më tsëchö willakï” (Lücas 9:59, 60). Tsë nunapa teytanqa manam wanushqaraqtsu karqan, porqui wanushqa kaptinqa manachi Jesuswan parlëkanmantsu karqan. Tsë nunaqa manam Diospa Gobiernunta puntaman churanampaq listutsu këkarqan.

Juk nunanam kënö nirqan: “Qatishqëkim, Teytë, peru puntataqa wayïchö kaqkunapitaraq despidikaramushaq”. Jesusnam nirqan, “pipis takllata tsarishqana këkar qepachö jaqinqankunata rikaqqa, manam Diospa Gobiernunman yëkunampaqnötsu” (Lücas 9:61, 62).

Jesuspa qateqnin këta munaqqa, Diospa Gobiernun rurëkanqanchömi yanapakunan. Juk yapyaqqa puntanmanmi rikaränan, sinöqa rurëkanqan kamillunkunam wiksu yarqunqa. Y juk läduman takllata churëkur qepaman rikaräkurqa, manam rurëkanqanta ushanqatsu. Jina kë munduchö jaqiyanqanman yarparäkoqkunawampis tsënöllam pasakun, mana allimanmi ishkiriyanman y imëyaqpis kawëtam oqrariyanman.