Kushishqa kë imapita kanqanta Jesus rikätsikun

Diosman kutin kutin mañakuyänampaq kaqtam Jesusqa tsëllaraq yapë yachatsikurishqa karqan, peru sagrädu rurëninchöqa manam tsë asuntullapaqtsu yapëqa parlarqan. Galilëachömi, supëkunata gobernaqpa yanapakïninwan supëkunata qarqunqanta niyarqan. Y Judëachö këkaptimpis tsënöllam niyarqan.

Juk nunata müdu tikratsishqa supëta qarquriptinqa, wakinqa alläpam espantakuyarqan. Peru wakinqa yapëmi kënö niyarqan: “Pëqa supëkunapa gobernaqnin Satanaspa yanapakïninwanmi supëkunata qarqun” (Lücas 11:15). Y wakinnam, pï kanqanta rikätsikunampaq ciëlupita juk señalta rikätsikunampaq mañayarqan.

Pruëbaman churëta munayanqantaqa Jesusqa musyarqanmi, tsëmi Galilëachö nunakunata ninqannölla pëkunatapis nirqan. Jina mëqan gobiernuchöpis kikinkunapura rakikashqa karqa ushakëman chanqantam entienditsikurqan y kënömi nirqan: “Satanaspis kikimpa contran churakärishqa kaptinqa, ¿imanöraq gobiernun tsarakunqa?”. Tsëpitanam Jesusqa kënö nirqan: “Diospa poderninwan supëkunata qarquptïqa, rasumpa kaqchöqa, Diospa Gobiernunmi janëkikunachöna këkan” (Lücas 11:18-20).

“Diospa poderninwan” ninqanqa, griëgu idiömachöqa “Diospa dëdunwan” ninmi. Tsëqa unë witsan Israelchö pasakunqankunatachi pëkunata yarpätsirqan. Faraonpa palaciunchö juk milagruta Moises ruranqanta rikëkurmi, tsëchö nunakunaqa, “¡Diospa dëdunmi!” niyarqan. Jina “Diospa dëdunmi” ishkë läja rumikunachö Chunka Mandamientukunata qellqarqan (Exodu 8:19; 31:18). ‘Diospa dëdunqa’ Diospa santu espïritunmi karqan, tsëmi Jesusta yanaparqan supëkunata qarqunampaq y qeshyëkaqkunata kachakätsinampaq. Tsëmi Diospa Gobiernun tsë chikeqninkunapa janankunachöna këkarqan, porqui tsë Gobiernuchö mandakoq kanampaq kaq Jesusmi, milagrukunata rurëkarqan.

Supëkunata Jesus qarqunqanqa rikätsikurqan, Satanaspitapis mas puëdeq kanqantam, tsëqa, palaciunta armayoq juk nuna täpakïkaqta juk kallpasapa nuna vencireq cuentam karqan. Jina Jesusqa juk nunapita juk supë yarqunqampaqpis yapëmi parlarqan. Tsë nuna alli kaq rurëkunaman mana pensaptinqa, tsë mana alli espïritum, qanchis mana alli espïritukunawan pëman kutinan karqan, y tsë nunaqa unë kanqampitapis peormi kanan karqan (Mateu 12:22, 25-29, 43-45). Tsëmi Israel nacionta pasëkarqan.

Tsënam, Jesus yachatsikïkanqanta wiyëkaq warmi sinchipa kënö nirqan: “¡Ima kushishqaraq pachanchö apashunqëki y chichishunqëki warmiqa!”. Llapan judïa warmikunam Diospa juk willakoqnimpa maman këta munayaq, y masran Diospa Tsurimpaqnäqa. Tsëchi tsë warmiqa, Jesuspa maman karnin Marïaqa alläpa kushishqa kanqanta nirqan. Peru Jesusqa rasumpa kushishqa kë imapita kanqanta rikätsirmi kënö nirqan: “Manam; antis ¡kushishqaqa kayan Diospa palabranta wiyaqkuna y cäsukoqkunam!” (Lücas 11:27, 28). Jesusqa manam Marïata alläpa precisaqpaq churar respetayänampaqtsu nirqan. Ollqupis warmipis rasumpa kushishqaqa kayan, Jehoväta mana jaqipa sirwirninmi, y manam pipapis kastan kartsu o imëkatapis logrartsu.

Tsëpitanam, ciëlupita juk señalta mañakuyanqanrëkur Galilëachö ruranqannölla nunakunata Jesus piñaparqan. Jonasta pasanqan señal-llata rikäyänampaq kaqtam nirqan. Pëta pasanqanqa juk señalmi karqan, porqui kima junaqpam pescädupa pachanchö karqan y mana mantsakushpam Diospita willakurqan, tsërëkurmi Nïnivi nunakuna arrepentikuyarqan. Jina Jesusqa kënömi nirqan: “Peru ¡rikäyë!, Jonaspitapis mas precisaqmi këchö këkan” (Lücas 11:29-32). Jina Jesusqa alläpa yachaq rey Salomonpitapis mas precisaqmi karqan.

Tsëpitanam Jesusqa, “chiwchita sendirirqa, manam pakarëkaq sitiumantsu ni canasta rurinmantsu pipis churan, sinöqa chiwchi churakunamanmi” nirqan (Lücas 11:33). Itsachi tsë nunakunapa rikëninchö yachatsikï y milagrukunata rurëqa imëka aktsita pakaq cuenta kanqanta nikarqan. Tantiyëta mana yacharmi, imanir tsë milagrukunata rurëkanqanta entiendiyarqantsu.

Jesusqa tsëllaran supëta qarqurir juk müduta parlaratsishqa karqan. Tsëta rikëkurqa, Diosta alabayarchi Jehoväpita willakuyanman karqan, peru manam tsënötsu rurayarqan. Tsëmi contran parlaqkunata Jesus kënö nirqan: “Tsëqa mäkoqlla këkë qamchö këkaq aktsi ampi mana kanampaq. Tsëmi llapan cuerpïki chipapaptin y ni juk kuchunllapis mana paqasyaraptinqa, aktsinwan juk chiwchi aktsishunqëkinö llapampis chipapëkanqa” (Lücas 11:35, 36).