Nazaret markapa Diosta adorayänan wayichö yachatsikun

Nazaretchöqa pï mëmi Jesuspaq parlëkäyarqan. Juk wata masnam pasarishqa karqan carpintëru këta jaqirir Juan bautizanampaq ëwakunqampitaqa, y tsë witsampaqqa llapan nunakunam Jesus ruranqan milagrukunapita parlëkäyarqanna. Tsëmi tsëchö täraqkunaqa milagrukunata rurananta shuyarëkäyarqan.

Nunakunaqa masran parlayarqan Diosta adorayänan wayiman Jesusta ëwëkaqta rikarnin. Tsë wayikunachöqa Diostam mañakuyaq y Moises qellqanqankunatam cada säbadu leyiyaq (Hëchus 15:21). Jina Diospa willakoqninkuna qellqayanqankunatapis leyiyaqmi. Leyinampaq sharkurirqa, Jesusqa atskaqtachi reqirirqan, porqui mëtsika watakunam tsë wayiman ëwashqa karqan. Tsë höram, Diospa willakoqnin Isaïas qellqanqan rölluta qoriyarqan, y tsë rölluta kicharirmi Jehovä santu espïritunwan Akranqampaq qellqarëkaqta ashirirqan. Tsëpin leyinqanqa, Isaïas 61:1, 2 textuchömi këkan.

Esclävukuna libri kayänampaq, wiskukuna yapë rikäyänampaq, y Jehoväpa rikëninchö alli këta tarina tiempu kanqanta tsë akrashqa nuna willakunampaq kaqtam Jesus leyirqan. Tsënö leyirirmi rölluta ëllurir tsëchö sirwipakoqta kutiratsirqan, y täkurirqan. Llapankunam pëta rikaräyarqan. Tsëpita ichik masta parlarirnam kënö nirqan: “Kananmi këchö qellqarëkaqpita wiyariyanqëki cumplikärin” (Lücas 4:21).

Llapankunam “shumaq parlanqanta wiyarnin” alläpa espantakur kënö niyarqan: “¿Manaku këqa Josëpa tsurin?”. Tsënö kaptimpis, juk sitiukunachö ruranqannölla milagrukunata rurananta shuyarëkäyanqantam Jesusqa cuentata qokurirqan. Tsëmi kënö nirqan: “Qamkunaqa kënöchi niyämanki: ‘Doctor, kikikita jampikï. Kikikipa markëkichöpis Capernaumchö ruranqëkikunapaq wiyayanqäta ruramï’” (Lücas 4:22, 23). Nazaretchö täraqkunaqa marka mayinkunata yanapar tsëchö milagrukunata puntata ruranan precisashqa kanqantatsun pensayaq, y tsënö mana rurashqa karnin pëkunata despreciashqa kanqantatsun entienditsita munëkäyarqan.

Jesusqa imata pensayanqanta musyarmi, Israel nacionchö imakuna pasakunqanta yarpätsirqan. Puntataqa, Elïaspa tiempunchö Israelchö mëtsika viudakuna këkäyaptimpis ni mëqanman pëta Jehovä kachashqa kanqantam nirqan. Sinöqa, Sarepta markachö täraq mana israelïta viudaman Jehovä kachashqa kanqantam yarpätsirqan. Tsëchömi juk milagruta rurar tsë viudata y wamranta wanuyänampita salvarqan (1 Rëyes 17:8-16). Jina Eliseupa tiempunchö lepra qeshyayoq Israelchö mëtsikaq kayaptimpis, Siria nacionpita Naaman jutiyoq nunallata kachakätsinqantam Jesusqa nirqan (2 Rëyes 5:1, 8-14).

¿Ima niyarqantaq tsëchö këkaqkuna Jesus tsënö ninqanta wiyarir? Alläpam piñakuyarqan, itsachi kikinkunallam yarparäkoq y Diosman mana markäkoq kayanqanta rikätsir tsëkunata yarpätsishqa kanqanta pensayarqan. Tsëmi Jesusta tsarirkur ras apayarqan Nazaretpa jirkampita kumarkuyänampaq. Peru pëqa makinkunapitam escapakurqan y Galilëa qochapa amänunchö këkaq Capernaum markamanmi urarqan.