¿Imatataq Jesuspaq Bibliachö willakun?

Jesuspaqqa pïmëmi parlayan, peru jutinta musyarpis pëpaq Bibliachö imata willakunqantaqa manam musyayantsu. Tsëmi këchöqa yachakunki Jesuspaq Bibliachö imata willakunqanta.

1 KAQ: ¿Pitan Jesusqa?

Jesusqa ciëluchö juk puëdeq angelmi karqan. Pëtaqa imatapis manaraq kamarmi Jehovä puntata kamarqan. Tsëmi Jesusqa “llapan kamanqampita mas punta kaq” (Colosensis 1:15). Bibliachömi nin Jesusqa Diospa ‘japallan tsurin’ kanqanta, y tsëtaqa nin Jesusta japallan kamashqa kaptinmi (Juan 3:16). Jesusqa Teytan Jehovätam imëkata kamar yanaparqan (leyi Proverbius 8:30). Jesustaqa “Palabra” nirpis reqiyanmi, y tsënöqa reqiyan angelkunata y nunakunata imatapis musyatsinampaq Jehovä mandashqa kaptinmi (Juan 1:14).

2 KAQ: ¿Imanirtan Jesusqa Patsaman shamurqan?

Dos mil watanönam pasarishqa Patsachö Jesus yurikunqampita. ¿Imanötan juk puëdeq angel këkar llullu wamranö Patsachö yurikurqan? Marïa jutiyoq shipashmi Teytantsik Jehoväpa poderninwan qeshyaq tikrarqan (leyi Lücas 1:34, 35). Jesusqa Patsaman shamurqan Cristu o Diospa Akrashqan karnin nunakunata salvanampaqmi.a Diospa Akrashqampaq Bibliachö willakunqankunaqa Jesuschömi llapampis cumplikarqan. Tsëmi nunakunata yanaparqan Jesusqa ‘Cristu’ o Diospa Akrashqan kanqanta musyayänampaq (Mateu 16:16).

3 KAQ: ¿Kananqa mëchötan Jesus këkan?

Espïrituna kawariramurmi Jesusqa ciëluta kutikurqan, y tsëchömi imëka cargupitapis mas väleq carguta Diosnintsikpita chaskishqa (Filipensis 2:9). Jehoväqa llapampa mandakoqnin kanampaqmi Jesusta churashqa; Jesuspita mas puëdeqqa Jehovällam.

4 KAQ: Jesusqa manam Diostsu

Señornintsik Jesucristu poderösu kaptimpis Bibliachöqa nin Teytan Jehovä mandanqankunata cäsukunqantam. VIDEUCHÖ rikäyë Jesuspaq y Jehoväpaq Bibliachö imata willakunqanta.

VIDEU: ¿Jesucristuqa Diosku? (3:22)

Teytantsik Jehoväpaq y Jesuspaq Bibliachö ima ninqan.

Leyiyë Lücas 1:30-32 ima ninqanta y këpaq parlayë:

• ¿Jehovä pï kanqanta y Jesus pï kanqantataq juk angel nirqan?

Leyiyë Mateu 3:16, 17 ima ninqanta y këkunapaq parlayë:

• Bautizakunqan junaq, ¿imatataq Jesus wiyarqan?

• ¿Pitan ciëlupita Jesusta parlaparqan?

Leyiyë Juan 14:28 ima ninqanta y këkunapaq parlayë:

• Juk familiachöqa, ¿teytaku o tsuriku mas autoridäyoq?

• ¿Imanirtan Jesusqa Jehoväta “Teyta” nirqan?

Leyiyë Juan 12:49 ima ninqanta y këpaq parlayë:

• Kë textuchöqa, ¿Teytan Jehoväwan igual kanqantaku Jesus rikätsikun?

5 KAQ: Jesusmi Diospa Akrashqan karqan

VIDEU: Bibliachö willakunqankuna Jesuschö cumplikanqan (3:03)

Diospa Akrashqampaq Bibliachö willakunqankunata leyiyë.

Diospa Akrashqanb mëchö yurinampaq kaq. Leyiyë Miquëas 5:2 ima ninqanta y këpaq parlayë:

• ¿Këchö willakunqanqa Jesuschö cumplikarqanku? (Mateu 2:1).

Diospa Akrashqan imanö wanunampaq kaq. Leyiyë Salmus 34:20 y Zacarïas 12:10 ima ninqanta y këkunapaq parlayë:

• ¿Këchö willakunqannöku Jesusta pasarqan? (Juan 19:33-37).

• ¿Jesusqa imatapis rurarqantsuraq Diospa Akrashqampaq Bibliachö willakunqankuna pëchö cumplikänampaq?

• ¿Ima ninkitan Bibliachö willakunqannölla Jesuschö cumplikanqampaq?

KËTAM YACHAKURQUNKI

Jesusqa juk puëdeq angelmi, Diospa Tsurinmi y Akrashqanmi.

¿Yarpankiku?

• ¿Imanirtan Bibliachö nin Jesusqa Jehoväpa ‘punta kaq tsurin’ kanqanta?

• Patsaman manaraq shamur, ¿imatataq Jesus rurarqan?

• ¿Imanirtan nintsik Jesusqa Diospa Akrashqan kanqanta?

MASTA YACHAKUY

Diospa Akrashqan Jesus kanqanta mas musyanëkipaq këkunata leyï.

“Bibliachö willakunqankunam musyatsimantsik Jesusqa Diospa Akrashqan kanqanta” (jw.org päginachö yarqamoq)

Jesusta Jehovä imanö kamanqanta yachakuy.

“¿Imanirtan Bibliachöqa Jesuspaq Diospa Tsurin nin?” (jw.org päginachö yarqamoq)

Wakinkunaqa yachatsikuyan Jehovä Dios, Jesus y santu espïritu jukllaqlla kayanqantam, tsënö yachatsikuyanqan mana rasumpa kanqanta yachakuy.

“¿Jesusqa Diosnintsikku?” (Täpakoq, 1 de abril 2009)

Jesuspita yachakunqan juk warmita imanö yanapanqanta leyï.

“Juk judïa warmi willakun kananqa Jesusman imanir creinqanta” (¡Musyatsikoq!, mäyu 2013)