¿Llapan alli nunakunaku ciëloman ëwayan?
WANUTSIYÄNAMPAQ tsariyänan paqasmi Jesus apostolninkunawan cenayarqan. Y usharirnam kënö nirqan: “Papänï yachanqanchomi atsca wayicuna can. Mana tseno captenqa, manachi willayaqmantsu. Y ewarmi, alistashaq qamcuna tsecho täräyänequipaq” (Juan 14:2). Tsënö nirmi ciëlochö sitionkuna qonampaq awnikarqan. Pero ¿imaqtaq tsëman ëwayänan karqan?
Tsë paqasllam imaq ëwayänampaq kaqtapis Jesus kënö nir willarqan: “Qamcuna noqawanmi ima nacaquinïcunachopis cayarqonqui. Tsemi Papänï noqata mandacunäpaq churamanqannolla, qamcunatapis mandacuyänequipaq churayashqequi” (Lucas 22:28, 29). Más puntatanam Diosqa huk conträtota Jesuswan rurashqa karqan y Rey churanampaqmi awnirqan. Tsëchö mandakoq karmi Jesusqa nunakuna alläpa wanayanqanta apamunqa: tsëqa nunakuna alläpa hipayanqanta, y chikeqninkunata ushakätsinampaq gobiernom. ‘Patsapa ushanan kuchunyaq’ mandakïnin chänan kaptimpis, ciëlopitam gobernamunqa (Salmo 72:4, 8; Daniel 7:13, 14).
Pero manam hapallanllatsu gobernamunqa, apostolninkunapaqpis kanmi huk sitio ciëlochö. Pëkunam puntata akrashqa kayarqan “patsacho nunacunata mandayänanpaq” (Apocalipsis 5:10).
Tsëqa, ¿ëkaq nunakunaraq ciëlota ëwayanqa? Wallkaqllam. Diospa Gobiernonchöqa, ima gobiernöchönöpis, wallkaqllam atska nunakunata gobernayanqa. Pëwan gobernayänampaq kaqkunatam Jesus kënö nirqan: “Qatirämaqnïcuna, wallcalla carpis, ama mantsacuyëtsu, porqui Dios Yayam cushishqa qamcunata churayäshunqui pepa mandaquinincho cayänequipaq” (Lucas 12:32). Jesus gobernaptin Patsachö imëyaqpis kawakoqpaq atska millón nunakunapitaqa, ciëlopaq “wallcalla” kaqkunaqa 144.000 nunakunallam kayan (Apocalipsis 14:1; 21:4).
Manam llapan alli nunakunatsu ciëloman ëwayan. Rey Davidpaqpis, “manam witsarqantsu syeluman” nirqanmi apóstol Pedru (Hechos 2:34, QKW). Bautizaq Juan alli nuna këkaptimpis, ciëlopita mana gobernamunampaq kaqtam Jesus kënö nir rikätsikurqan: “Manam ni pipis Juan Bautista alli importanti cangannöga ni pipis cananyag cashgatsu. Pero Dios Yayapa Mandacuy Reynonchö mas umildecagmi, Juan Bautistapitapis [...] alli importanti runa canga” (Mateo 11:11, NTCN).
¿Ima allitaraq chaskiyanqa alli nunakuna?
Rikärinqantsiknöpis, nunakunaqa Patsachömi imëyaqpis kawakuyanqa. ¿Imataraq rurashwan tsëchö kawakunapaq? Jesusmi kënö nin: “Patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Teyta Diosqa alläpa kuyamarnintsikmi imëyaqpis kawakïta llapan nunakunata awnimashqantsik. Tsë shumaq kawakïtaqa chaskiyanqa Jesusman markäkoqkuna o yärakogkunallam.
Imam sïqa, sinchi markäkunapaqqa Biblia yachatsikunqantam alli yachakunantsik (Juan 17:3). Tsëmi Dios munanqanta imëpis yachakur y Biblia ninqannö kawarqa, alläpa allita rurëkantsik. Tsënö rurashqaqa, imëyaqpis kawakïtam Jehová qomäshun.
[7 kaq päginachö recuadru]
Biblia yachatsikunqan
Pï më creiyanqan:
Huk nuna wanuriptinqa, imanllapis huk sitiochö kawëkanran.
Biblia yachatsikunqan:
“Wanushqakunaqa manam imatapis musyayannatsu.” (ECLESIASTÉS 9:5.)
Pï më creiyanqan:
Wanushqakunaqa mananam kawariyämunqanatsu.
Biblia yachatsikunqan:
“Chämonqam junaqcuna [Jesus] parlashq[ancunata] wanushqacuna wiyarirnin, cawariyämunan.” (JUAN 5:28, 29.)
Pï më creiyanqan:
Llapan alli nunakunam ciëloman ëwayan.
Biblia yachatsikunqan:
“Patsachöqa alli nunakunallam tärayänqa, y mana wanushpam tsëchö kawayanqa.” (SALMO 37:29.)