Polïticamanqa manam mëtikunantsiktsu

Jesusmi discïpulunkunapaq nirqan ‘kë munduchö nunakunanö mana kayanqanta’ (Juan 15:19). Tsëmi Jehoväpa sirweqninkunaqa wakinkuna obligamashqapis polïticaman mëtikuntsiktsu ni guërrakunaman ëwantsiktsu. Tsëmi höraqa mana alli tratamantsik y noqantsikpita burlakuyan. ¿Imaraq yanapamashwan polïticaman mana mëtikunapaq y Jehovällata sirwinapaq?

1 KAQ: Jehoväpa sirweqninkunaqa, ¿imanötan gobiernukunata rikantsik?

Jehoväpa sirweqninkunaqa gobiernukunata respetayämi. Jesusmi discïpulunkunata kënö nirqan: “Römata gobernaqtaqa pëpa kaqta pagayë”. Tsëmi gobiernukuna patsätsiyanqan leykunata respetayä y impuestukunata pagakuyä (Marcus 12:17). Bibliachömi nin Diosnintsik permitiptin kanan witsan gobernaqkuna gobernayanqanta (Romänus 13:1). Tsëmi gobiernukunata respetarpis masqa Jehoväta respetayä. Y Diospa Gobiernunlla llapan problëmakunata ushakätsinampaq kaqmanmi confiakuyä.

2 KAQ: ¿Imakunata mana rurartaq polïticaman mëtikuntsiktsu?

Milagruta Jesus ruraqta rikarmi nunakunaqa gobernaqninkuna kanampaq churëta munayarqan, peru Jesusqa manam munarqantsu. Noqantsikpis Jesusnömi polïticamanqa mëtikuntsiktsu (Juan 6:15). ¿Imanirtan Jesusqa gobernanti churayänanta munarqantsu? Kikinmi kënö nirqan: “Gobiernüqa manam kë mundupitatsu” (Juan 18:36). Jehoväpa sirweqninkunaqa manam polïticaman mëtikuntsiktsu. Tsëmi guërrakunaman ëwantsiktsu (leyi Miquëas 4:3). Nacionnintsikta respetarpis manam bandërata saludantsiktsu o himnu nacionalta cantantsiktsu, tsëkunata rurëqa adorëkaq cuentam kanman (1 Juan 5:21). Y manam mëqan polïticupa contran churakantsiktsu o campäñankunata rurayaptin yanapantsiktsu. Ima asuntuchöpis manam polïticaman mëtikuntsiktsu, tsëpa rantinqa Jehovällatam sirwintsik y Gobiernunmanmi confiakuntsik.

MASLLA YACHAKUSHUN

3 KAQ: Jehoväpa sirweqninkunaqa manam polïticaman mëtikuntsiktsu

Jesuspita y discïpulunkunapitam yachakuntsik polïticaman mana mëtikunapaq. Leyiyë Romänus 13:1, 5-7 y 1 Pëdru 2:13, 14 ima ninqanta, VIDEUTA rikäyë y këkunapaq parlayë:

VIDEU: Jehoväta sirweqkunaqa manam polïticaman mëtikuntsiktsu (1 kaq) (4:28)

• ¿Imanirtan autoridäkunata respetanantsik?

• ¿Imakunata rurartan autoridäkunata respetantsik?

Ishkë nacionkuna guërrachö kayaptinqa, wakin nacionkunaqa mana mëtikuyanqantam niyan. Peru ishkan nacionkunatam imallawampis yanapayan. ¿Tsënö yanapëkarqa rasumpaku mana mëtikuykäyantsu? Leyiyë Juan 17:16 ima ninqanta, VIDEUTA rikäyë y këpaq parlayë:

VIDEU: Jehoväta sirweqkunaqa manam polïticaman mëtikuntsiktsu (2 kaq) (3:11)

• ¿Imakunata mana rurartaq polïticaman mëtikuntsiktsu?

Hörataqa Dios ninqampa contran imatapis ruranapaqmi autoridäkunaqa nimashwan. Tsë pasakuptinqa, ¿imataraq rurashwan? Leyiyë Hëchus 5:28, 29 ima ninqanta, VIDEUTA rikäyë y këkunapaq parlayë:

VIDEU: Jehoväta sirweqkunaqa manam polïticaman mëtikuntsiktsu (3 kaq) (1:18)

• ¿Imataraq rurashwan Dios mandakunqankunapa contranta ruranapaq autoridäkuna nimashqa?

• Jehoväta sirweqkunaqa, ¿ima asuntukunachötan autoridäkuna mandakuyanqanta cäsukuyänantsu?

4 KAQ: Ruranqantsikwan ni pensanqantsikwan polïticaman mëtikushuntsu

Leyiyë 1 Juan 5:21 ima ninqanta, VIDEUTA rikäyë y këkunapaq parlayë:

VIDEU: ¿Imanirtaq Diosta sirweqkunaqa valienti kanantsik?, Nunakuna rurayanqanman mana mëtikunapaq (2:49)

• ¿Imanirtan wawqi Ayengeqa polïticaman mëtikuyta y bandërata saludëta munarqantsu?

• Tsë wawqi decidinqanqa, ¿alliku karqan?

¿Ima maskunachötan polïticaman mana mëtikunapaq cuidakunantsik? VIDEUTA rikäyë y këkunapaq parlayë:

VIDEU: “Täpakoqpita” yachatsikïkuna: Nunakunapa rurëninkunaman ama mëtikushuntsu (5:16)

• Juk nacionpita pukllaqkuna juk nacionwan pukllayaptinqa, ¿imatataq ruranantsiktsu polïtica asuntuman mana mëtikunapaq?

• Polïticukuna rurayanqan noqantsikpaq alli o mana alli kaptimpis, ¿imanötan rikätsikuntsik polïtica asuntuman mana mëtikunqantsikta?

• ¿Imaraq pasanman polïtica asuntupaq parlayanqankunata alläpa wiyashqa o polïticapaq parlaqkunawan imëpis juntakushqa?

KËTAM YACHAKURQUNKI

Obligamashqa y burlakamashqapis, Jehoväpa sirweqninkunaqa manam polïticaman mëtikuntsiktsu, y tsëtaqa rikätsikuntsik parlanqantsikchö, pensanqantsikchö y ruranqantsikchömi.

¿Yarpankiku?

• ¿Imanötan gobiernukunata respetanqantsikta rikätsikuntsik?

• ¿Imanirtan polïticaman mëtikuntsiktsu?

• ¿Imakunachötan cuidakunantsik polïticaman mana mëtikunapaq?

MASTA YACHAKUY

Polïticaman mana mëtikushqaqa capazchi nunakuna sufritsimäshun. Juk wawqita ima pasanqanta rikë.

Jehoväqa manam imëpis qonqayämashqatsu (3:14)

¿Imanötan familiakunaqa yachakuyanman polïtica asuntukunaman mana mëtikuyänampaq?

Nunakuna nacionninkunarëkur rurayanqanman ama mëtikushuntsu (4:25)

Wakin nunakunaqa nacionninkunata defendir yanapakuyanqampita alläpam kushikuyan. Peru tsëta rurayanqampitapis mas kushikuypaqqa, ¿imaraq kanman?

“Diospaqqa llapampis puëdikanmi” (5:19)

Imachö trabajanapaq kaqta decidirpis, ¿imanötan rikätsikuntsik polïtica asuntuman mana mëtikunqantsikta?

“Cada nunam ruranampaq kaqtaqa ruranan” (Täpakoq, 15 de marzu 2006)

Jehoväta sirwinata michäkuyaptin, y chikir imëkata ruramashqam llapantsikpis mana allikunapa pasashun, peru manam mantsakänantsiktsu.

1 KAQ: ¿Imanirtan mantsakänantsiktsu nuna chikimashqaqa?

Bibliachömi kënö nin: “Cristu Jesuspa llapan qateqninkunatam, imëkata rurar sufritsiyanqa” (2 Timoteu 3:12). Jesusqa manam wakin nunakunanötsu Satanas munanqanta rurarqan, tsëmi chikiyarqan. Noqantsikpis Jesusnömi Satanas munanqanta rurantsiktsu, tsëmi gobiernukuna y mana alli religionkuna chikimantsik (Juan 15:18, 19).

2 KAQ: ¿Imatan yanapamäshun nunakuna chikimashqapis Jehoväta sirwir sïguinapaq?

Teytantsik Jehoväman llapan shonquntsikwan confiakunqantsikmi. Tsëmi pëman cada junaq mañakunantsik, Palabran Bibliata leyinapaq tiempuntsikta alli patsätsinantsik, y reunionkunamanmi mana faltëpa ëwanantsik. Tsëkunam yanapamäshun, chikimashqa o familiantsikkuna Jehoväta sirwinata michäkuyaptimpis Teytantsik Jehoväta sirwir sïguinapaq. Apostol Pablutapis alläpam chikiyarqan, tsëmi kënö nirqan: “Teyta Jehovämi yanapamaqnï. Manam imatapis mantsashaqtsu” (Hebrëus 13:6).

Nunakunata Diospita yachatsinqantsikpis yanapamantsikmi valienti kanapaq, nunakunata mana mantsanapaq y Jehoväman mas confiakunapaq (Proverbius 29:25). Seguïdu yachatsikunqantsikmi yanapamantsik, gobiernukuna michäkuyaptimpis mana mantsakuypa yachatsikunapaq (1 Tesalonicensis 2:2).

3 KAQ: ¿Chikir imëkata ruramanqantsikqa yanapamashwantsuraq?

Chikishqa këtaqa manam munantsiktsu. Peru chikir imëkata ruramashqapis alli tsarakunqantsikqa Diosman mas markäkunapaq o yärakunapaqmi yanapamantsik. Tsëchömi cuentata qokuntsik tsarakuyta mana puëdinapaq kaqta pensashqapis, Teytantsik Jehovä yanapëkamanqantsikta (leyi Santiägu 1:2-4). Teytantsik Jehoväqa alläpam llakikun chikir imëkata ruramashqa, peru alläpam kushikun imëkapa pasarpis sirwir sïguishqaqa. Tsëmi Bibliachö kënö nin: “Allita rurayanqëkipita sufrimientuta aguantayaptikiqa, Teyta Diosmi alläpa kushikun” (1 Pëdru 2:20). Chikir imëkata rurayaptimpis Jehoväta mana dejëpa sirweqkunaqa, juk shumaq Patsachömi imëyaqpis kawakuyanqa y Jehovällatanam sirwiyanqa. Tsëchöqa manam pipis sufrinqanatsu (Mateu 24:13).

MASLLA YACHAKUSHUN

4 KAQ: Familiëkikuna michäkuyaptimpis, Jehoväta sirwitaqa puëdinkim

Jesusqa willakurqanmi Jehoväta sirwinata wakin familiantsikkuna michäkuyänampaq kaqta. Leyiyë Mateu 10:34-36 ima ninqanta y këpaq parlayë:

• Pipis Jehoväta sirwinampaq decidiptin, ¿imatataq familiankuna niyan?

VIDEU: Jehovämi noqakunataqa wätakayämarqan (5:13)

• ¿Imataraq rurankiman familiëki o amïguykikuna Jehoväta sirwinëkita michäkuyaptinqa?

Leyiyë Salmus 27:10 y Marcus 10:29, 30 ima ninqanta, y cada textuta leyirir këpaq parlayë:

• Familiëkikuna o amïguykikuna Jehoväta sirwinëkita michäkuyaptin, ¿imanötan yanapashunki kë textuchö Jehovä änikunqan?

5 KAQ: Chikir imëkata rurayäshuptikipis Teytantsik Jehoväta dejëtsu

VIDEU: Chikir sufritsimashqapis valienti kashun (6:27)

• Videuchö willakayämunqampita, ¿imatan mas valienti kanëkipaq yanapashunki?

Leyiyë Hëchus 5:27-29 y Hebrëus 10:24, 25 ima ninqanta, y cada textuta leyirir këpaq parlayë:

• Diospita yachatsikunata y reunionnintsikkunaman ëwanata autoridäkuna michäkuyaptimpis, ¿imanirtan Jehoväta sirwir sïguinantsik?

6 KAQ: Jehovämi yanapashunki sirwir sïguinëkipaq

VIDEU: Jehovämi yanapamanqa (3:40)

• Videuchö rikanqantsik wawqi panikunataqa, ¿imatan yanaparqan chikir imëkata rurayaptin?

Leyiyë Romänus 8:35 y 37-39, y Filipensis 4:13 ima ninqanta, y cada textuta leyirir këpaq parlayë:

• Kë textuchö ninqannöpis, ¿imanirtan següru këkankiman chikir imëkata rurayäshuptikipis Jehoväta sirwir sïguinëkipaq kaqta?

Leyiyë Mateu 5:10-12 ima ninqanta y këpaq parlayë:

• ¿Imanirtan chikir imëkata rurayäshuptikipis kushishqa këta puëdinki?

KËTAM YACHAKURQUNKI

Chikir imëkata rurayäshuptikipis, Teytantsik Jehoväqa alläpam valoran mana dejëpa sirwinqëkita, y pëmi yanapashunki sirwir sïguinëkipaq.

¿Yarpankiku?

• ¿Imanirtan chikir imëkata ruramantsik?

• ¿Imatataq ruranëki chikir imëkata rurayäshuptikipis aguantanëkipaq?

• ¿Imanirtan següru këkankiman imëka pasakuptimpis Jehoväta sirwir sïguinëkipaq kaqta?

MASTA YACHAKUY

Ejercituman ëwëta mana munaptin carcelayanqan wawqita Jehovä imanö yanapanqanta rikë.

Chikir sufritsimashqapis Jehoväta sirwir sïguishun (2:34)

Diospita yachatsikuyänanta michäkuyaptimpis juk wawqiwan warmin Jehoväta sirwir sïguiyänampaq ima yanapanqanta rikë.

Imëka mana allikuna pasanqan tiempuchömi Jehoväta sirwiyarqö (7:11)

Chikir imëkata rurayäshuptikipis mana mantsapakuypa Jehoväta sirwir sïguinëkipaq ima yanapashunëkipaq kaqta yachakuy.

“Chikir sufritsimänantsik tiempupaq alistakushun” (Täpakoq, juliu 2019)

¿Imanirtan familiakuna michäkuyan Jehoväta sirwishqa? ¿Imatataq rurashwan pëkunawan alli kanapaq y Jehoväta sirwir sïguinapaq? Ima yanapashunëkipaq kaqta yachakuy.

“Jehoväta sirwinata familiantsik michäkuptin” (Täpakoq, octubri 2017)