LLAPAN LEYINA KAQ Watchtower

“Mëtsika santu espïrituyoq y alläpa kushishqam këkäyarqan”

“Diospa Gobiernumpita llapanta” yachatsishun
- 5. ¿Imanötan Bernabëwan Sauluqa Chiprichö yachatsikuyarqan?
  
  ⁵ Antioquïa markapita ëwakurmi Bernabëwan Sauluqa Seleucia markayaq chakipa ëwayarqan. Tsëpitanam doscientus kilömetruschönö këkaq Chipri islayaq barcuwan ëwayarqan.d Markan Chiprichö alli noticiakunata yachatsikunampaq kaqta musyarchi Bernabëqa kushishqa këkarqan. Tsë islapa inti o rupay yarqamunan lädunchö këkaq Salamïna markaman chärirqa, “judïukuna Teyta Diosta adorayänan wayikunachö[mi], Teyta Diospa palabrampita yachatsikur qallëkuyarqan” (Hëch. 13:5).e Tsëpitaqa tsë islapa juk kaq kuchumpita juknin kaq kuchunyaqmi, reqishqa markakunachö alli noticiakunata yachatsikur ëwayarqan. Mëpa ëwayanqanta mana musyashqapis, capazchi cientu sesenta kilömetrustanö puriyarqan.
  
  DIOSTA ADORAYÄNAN WAYIKUNA O SINAGÖGAKUNA
  
  Palabra por palabra traduciyaptinqa, sinagöga palabraqa “reunion” o “asamblëa” ninanmi. Qallananllachöqa reunionninkunapaq parlarmi judïukunaqa tsënö niyaq, peru tsëpitaqa Jehoväta adorayanqan wayipaq parlarmi tsënö niyaq.
  
  Diosta adorayänan wayikunata o sinagögakunataqa, capazchi judïukuna setenta watapa Babiloniachö kayanqan witsan o tsëpita ichik tiempu pasanqanllachö patsätsiyarqan. Tsëchömi judïukunaqa Jehoväta adorayaq, pëpita yachakuyaq, Diospa palabranta leyiyaq y discursukunata wiyayaq. Punta cristiänukuna kawayanqan witsanqa, Palestïnapa llapan markankunachömi tsë wayikuna karqan. Jatun markakunachöqa jukpitapis masmi karqan, y Jerusalenchöqa atskam karqan.
  
  Babiloniapita libri yarqurqa, manam llapan judïukunatsu Palestïnata kutiyarqan. Atskaqmi negociuta rurayänanrëkur juk nacionta ëwakuyarqan. Jesus manaraq shamuptin 401 a 500 watakuna witsanqa, Persia puëdeq nacionpa cientu veintisiëti provinciankunachömi judïukuna karqanna (Est. 1:1; 3:8). Tsëpita tiempu pasanqanchöqa, Mediterraneu lamar kuchunchömi atska sitiukunachö judïukuna karqan. Judïukuna täkuyanqan markakunataqa diaspora nirmi reqiyaq (tsëqa “wakchö këchö këkaq” ninanmi), y cada sitiuchömi Diosta adorayänan wayikunata patsätsiyarqan.
  
  Diosta adorayänan wayikunachöqa, cada säbadum frentiman yarquykur Leyta leyiyaq y entienditsikuyaq. Tsëchöqa Diosta mana dejëpa sirweq ollqukunam, leyita, entienditsikuyta y discursëta puëdiyaq. Tsë wayikunachöqa nunakuna jamakuyänampaqmi kima läduchö bancukuna karqan.

“Mëtsika santu espïrituyoq y alläpa kushishqam këkäyarqan”

“Diospa Gobiernumpita llapanta” yachatsishun
- d Punta cristiänukunapa tiempunchöqa, vientu yanapaptinqa, cada junaqmi cientu sesenta kilömetrustanö barcukuna ëwayaq. Peru mana alli tiempu kaptinqa masmi demorayaq.