¿Imanötan Jesusqa salvamantsik?
Bibliachö yachatsikunqan
Jesusqa Diosta mana dejëpa sirweq nunakunata salvanampaqmi wanurqan (Mateu 20:28). Tsëmi Bibliachöqa nin “nunakunapa salvaqnin” kanqanta (1 Juan 4:14). Kënöpis ninmi: “Salvamänantsikrëkur nunakunapita Teyta Dios akranqan jutipita masqa manam kë patsachö kantsu, tsëmi jukchöqa ni pichöpis salvacion kantsu” (Hëchus 4:12).
Jesusqa pëman markäkoq o yärakoq nunakunarëkurmi wanurqan (Hebrëus 2:9; Juan 3:16). Tsëpitanam Teyta Dios kawaritsimuptin, Jesusqa espïrituna ciëluta kutikurqan (Hëchus 3:15). Jesusqa ciëlupitam, “pëkunarëkur Teyta Diosta rogakunampaq imëpis kawar, Teyta Diosman witikaqkunata salvëta puëdin” (Hebrëus 7:25).
¿Imanirtan wanantsik noqantsikrëkur Teyta Diosman Jesus rogakunanta?
Llapantsikmi jutsata ruraq kantsik (Romänus 3:23). Jutsaqa Diospitam karupätsimantsik y wanuymanmi chätsimantsik (Romänus 6:23). Peru pë wanunqanman markäkoqkunataqa o yärakoqkunataqa Jesus yanapanmi (1 Juan 2:1). Jesusqa noqantsikrëkur wanushqa karmi, mañakunqantsikta Teyta Dios wiyamänapaq y jutsantsikkunata perdonamänapaq noqantsikrëkur rogakuyta puëdin (Mateu 1:21; Romänus 8:34). Pë munanqannö rogakuptinmi Teyta Diosqa Jesusta wiyan. Diosmi tsurin Jesusta Patsaman mandamurqan ‘pëwan nunakuna salvakuyänampaq’ (Juan 3:17).
¿Jesusman creirllaku salvakushun?
Manam. Jesusman creirpis, salvakunapaqqa mastaran ruranantsik (Hëchus 16:30, 31). Bibliachömi kënö nin: “Kawatsikoq kallpannaq kar cuerpu wanushqa o wañushqa këkanqannöllam, alli rurëkunachö mana rikakoq markäkoq o yärakoq këpis wanushqa cuenta këkan” (Santiägu 2:26). Salvakunapaqqa këkunatam rurantsik:
Jesuspita y Teytan Jehoväpitam yachakunantsik (Juan 17:3).
Pëkunamanmi markäkunantsik o yärakunantsik (Juan 12:44; 14:1).
Mandakunqankunata cäsukurmi markäkunqantsikta o yärakunqantsikta rikätsikunantsik (Lücas 6:46; 1 Juan 2:17). Jesusmi nirqan, manam llapan “Señor” nimaqkunatsu salvakuyanqa, sinöqa ciëluchö këkaq Teytäta cäsukoq kaqkunallam (Mateu 7:21).
Mana allikunapa pasarnimpis Diosman markäkurmi o yärakurmi sïguinantsik. Tsëpaq parlarmi Jesus kënö nirqan: “Ushananyaq alli tsarakoqqa salvakunqam” (Mateu 24:13).