35 KAQ YACHAKUNËKIPAQ

¿Imanirtan imatapis alli decidinantsik?

Imprimishqa kaq

Llapantsikmi imëkata decidinantsik: mëchö kawanapaq, imachö trabajanapaq, casakunapaq o mana casakunapaq, y maskunata. Imatapis decidinqantsikpitam kanqa imanö kawakunapaq kaq, y Jehoväta imanö sirwinapaq kaq. Alli decidirqa kushishqam kawakushun y ruranqantsikwanmi Jehoväta kushitsishun.

1 KAQ: Bibliachö consëjukunaqa, ¿imanötan yanapashunkiman imatapis decidinëkipaq?

Imatapis manaraq decidir Jehovä yanapashunëkipaq mañakuy, y Palabran Bibliachö consëjunkunata ashi (leyi Proverbius 2:3-6). Bibliachöqa, hörataqa clärum nimäshun imata ruranapaq kaqta, y cäsukunqantsikqa allipaqmi kanqa.

Peru hörataqa manam Bibliachö cläruqa nintsu imata ruranapaq o mana ruranapaq kaqta. Tsënö kaptimpis, Jehovämi ‘purinëkipaq kaq nänipa’ imëpis pushashunki (Isaïas 48:17). Jehovä yanapamänapaqqa, pë imanö pensanqanta y sientinqantam musyanantsik. Tsëpaqqa unë witsan pasakunqankunatam Bibliachö yachakunantsik, tsëmi yanapamäshun imata rurëta munarpis alli decidinapaq.

2 KAQ: ¿Imatataq ruranantsik imatapis manaraq decidir?

Bibliachöqa nin, ‘pensëta yachaq nunaqa, imata ruranampaqpis alliraq pensanqantam’ (Proverbius 14:15). Tsëmi imatapis manaraq decidir kënö pensanantsik: “Rurëta munëkanqäpaq, ¿ima nintan Bibliachö? ¿Imata decidinqätaq mas alli kanqa? ¿Decidinqäqa wakinkunapaq allitsuraq kanqa o manatsuraq?”. Masqa munantsik decidinqantsik Jehoväta kushitsinantam (Deuteronomiu 32:29).

Noqantsikpaq ima alli o mana alli kanqantaqa Diosnintsikllam musyan. Tsëmi Bibliapita yachakunqantsik y mandakunqankunata cäsukunqantsikqa ima alli kanqanta o mana alli kanqanta musyanapaq yanapamäshun (Romänus 2:14, 15). Tsënöpam imata decidirpis alli decidishun.

MASLLA YACHAKUSHUN

Yachakurishun imatapis decidinqantsik höra, ima asuntupaqpis Jehovä ima ninqanta musyanqantsik y concienciantsik imanö yanapamanqantsikta.

3 KAQ: Bibliachö ninqankunata cäsukuy

Bibliachö ninqanqa, ¿imanötan yanapamantsik imatapis decidinapaq? VIDEUTA rikäyë y këkunapaq parlayë:

VIDEU: Bibliapa musyatsikïninkuna dirigimänata jaqishun (5:54)

¿Imatataq Jehovä permitimantsik?
¿Imanirtan Jehoväqa imatapis kikintsik decidinapaq permitimantsik?
¿Imatan yanapamäshun imata decidirpis alli decidinapaq?

Leyiyë Efesius 5:15, 16 ima ninqanta y parlayë. ¿Imanötan tiemputa alli provechashwan...

... Bibliata cada junaq leyinapaq?
... alli maja, alli papä o alli mama y alli wamra kanapaq?
... reunionkunaman ëwanapaq?

4 KAQ: Imatapis decidinapaqqa ima alli o ima mana alli kanqantam musyanantsik

Juk asuntupaq Bibliachö consëju kaptinqa fäcilmi decidinan, peru mana kaptinqa, ¿imataraq rurashwan? VIDEUTA rikäyë y këpaq parlayë:

VIDEU: “Alli concienciayoq imëpis kayë” (5:13)

Videuchö rikanqantsik paniqa, ¿imatataq rurarqan conciencian alli kanampaq y Jehovä munanqannö decidinampaq?

Höraqa jukkunatam rogakuntsik imata ruranantsikpaq kaqta nimänapaq. Peru tsëta ruranqantsikqa, ¿imanirtan allitsu kanman? Leyiyë Hebrëus 5:14 ima ninqanta y këkunapaq parlayë:

Imatapis decidinapaq kaqta jukkuna nimashqaqa fäcilmi decidintsik, peru ¿imanirtan kikintsik decidinantsik?
¿Imatan yanapamäshun concienciantsik alli kanampaq y imatapis alli decidinapaq?

Juk nunam cärruta manejëkan y celularninchömi rikëkan mëpa ëwanampaq kaqta. — Mëmampis chänapaqqa juk mäpam yanapamantsik, tsënöllam ima alli o ima mana alli kanqanta musyanqantsikpis alli decidinapaq yanapamantsik.

5 KAQ: Jukkunapa conciencianta respetashun

Manam llapantsiktsu igual kantsik, y imatapis jukläya jukläyam decidintsik. Tsëqa, ¿imanötan jukkunapa conciencianta respetashwan? Ishkë cäsullata rikärishun:

Juk: Pintapäkuyta gustaq pani juk congregacionman yanapakoq ëwanman. Peru tsëchö panikunataqa pintapäkuy gustanmantsu.

Leyiyë Romänus 15:1 y 1 Corintius 10:23, 24 ima ninqanta y këkunapaq parlayë:

Kë versïculukunachö ninqanta cuentaman churarqa, ¿imataraq kë pani ruranman? Y qamqa, ¿imataraq rurankiman gustashunqëkikunata wakinkuna mana allitanö rikäyaptin?

Ishkë: Juk wawqiqa musyanmi vïnuta o cervëzata o imatapis machatsikoqta ichiklla upuyta Jehovä mana michäkunqanta. Tsënö kaptimpis, ni ichikllatapis mana upunampaqmi decidin. Peru almorzayänampaq invitayaptin ëwanqanchömi rikan wawqikuna vïnuta upuykäyaqta.

Leyiyë Eclesiastes 7:16 y Romänus 14:1, 10 ima ninqanta, y këkunapaq parlayë:

Kë versïculukunachö ninqanta cuentaman churarqa, ¿imataraq kë wawqi ruranman? Y qamqa, ¿imataraq rurankiman concienciëki mana permitishunqëkita wakinkuna rurayaptin?

¿Imatataq ruranëki imatapis alli decidinëkipaq?

1. Jehovämanmi mañakunëki imata decidinëkipaqpis yanapashunëkipaq (Santiägu 1:5).

Tsë warmillam Bibliapita yachakunqanta mas entiendinampaq computadorachö publicacionkunata ashikan.

2. Imata decidinëkipaq kaqta musyanëkipaqmi Bibliachö y publicacionkunachö consëjukunata ashinëki. Y alli consejakoq wawqi panikunatam tapukunëki.

Tsë warmillam imata decidinampaq kaqman pensëkan.

3. Alliraqmi pensanëki decidinqëki yanapashunëkipaq kaqman y wakinkuna ima niyänampaq kaqman.

WAKIN IMA NIYANQAN: “¡Nunakuna niyanqantaqa manam cäsunëkitsu! Kikikim allita o mana allitapis decidinëki”.

¿Imanirtan cuentachö katsinantsik Diosnintsik y nunakuna imanö sientikuyanqanta?

KËTAM YACHAKURQUNKI

Imatapis alli decidinapaqqa, Jehovä imanö pensanqanta y sientikunqantam musyanantsik. Y cuentachömi katsinantsik imatapis decidinqantsik jukkunata yanapanqanta o llakitsinqanta.