Santo espïritum Diospa pakarëkaqnö yachëninta reqin

“Espïritu Santom Dios Yayapa yachayninchö imayca pacaraycagnö llapan mana regengantsicta rasumpa regen.” (1 COR. 2:10, NTCN.)

1. ¿Santo espíritu imanö yanapakunqantataq 1 Corintios 2:10 textochö willamantsik, y ima tapukïkunapitataq yachakushun?

¡ALLÄPAM agradecikuntsik Jehoväpa santo espïritun tukïta ruranqampita! Espïritupaqqa Biblia nin Diospa qarënin, yanapakoq, Diospita musyatsikoq, y Diosnintsikman chänapaq yanapakoq kanqantam (Juan 14:16; Hech. 2:38; Rom. 8:16, 26, 27). Pero apóstol Pabluqa, santo espíritu más precisaqkunata ruranqantam willakurqan: “Espïritu Santom Dios Yayapa yachayninchö imayca pacaraycagnö llapan mana regengantsicta rasumpa regen” (1 Cor. 2:10). Jehoväqa santo espïritunwanmi musyatsikun mana musyanqantsik yachatsikïkunata. Santo espíritu mana yanapamashqaqa, ¿musyashwantsuraq Diospa yachatsikïninkunata? (Lei 1 Corintios 2:9-12.) ¿Imanötaq Diospa pakarëkaqnö yachatsikïninta santo espíritu musyatsikun? ¿Pikunawantaq Jehová yachëninta musyatsikurqan unë cristiänokunata? ¿Imanötaq, y pikunawantaq kanan tiempochö santo espíritu musyatsikun Diospa yachëninta?

2. ¿Ima ishkë rurëwantaq santo espíritu yanapakurqan?

² Jesusqa parlarqan santo espíritu ishkë rurëwan yanapakunampaq kaqtam. Wanunampaq ichikllana pishikaptinmi apostolninkunata kënö nirqan: “Peru noqapa rantïmi Dios Yaya cachamonqa yanapayäshoqniqui Santu Espiritunta. Pemi llapanta yachatsiyäshunqui. Y yachatsiyashqaqcunatapis yarpätsiyäshunqui[m]” (Juan 14:26). Puntataqa, Diospa mana musyayanqan yachatsikïninta musyayänampaqmi santo espíritu huk maestronöpis yachatsikurqan, y tsëpitanam, tsë yachakuyanqankunata yarpäyänampaq y yachakuyanqannö rurayänampaq yanapakurqan.

Apostolkunapa tiemponchö

3. ¿Diospa pakarëkaqnö yachënin imanö musyakänampaqtaq Jesus willakurqan?

³ Cristu qateqninkunata tukïta yachatsishqa këkaptimpis mastaraqmi yachakuyänan karqan. Tsëmi Jesus pëkunata kënö nirqan: “Willayänaqpaqqa atscaran can. Llapanta niyapteqqa, manam cäyiyämanquimantsu. Rason caqta yachatsicoq Santu Espiritu shamurninnam, llapan wiyashqancunata y rason caqllata cäyitsiyäshunqui” (Juan 16:12, 13). Jesus ninqannömi, santo espíritu yanapakunan karqan Diospa pakarëkaqnö yachatsikïninkuna ichikllapa ichikllapa musyakänampaq.

4. ¿Imanötaq santo espíritu Pentecostés fiestachö yachatsikurnin y yarpätsikurnin yanapakurqan?

⁴ “Rason caqta yachatsicoq Santu Espiritu[qa]” ramakarqan 33 wata Pentecostés fiestachömi, pachak ishkë chunka (120) Jesuspa qateqninkuna Jerusalenchö ëllukashqa o gorikashga këkäyaptin. Tsënö kanqanta llapampis rikäyarqanmi y wiyayarqanmi (Hech. 1:4, 5, 15; 2:1-4). Tsëmi Jesuspa qateqninkuna “Diospa espantepaq rurenincunata” tukï idiömachö parlar qallëkuyarqan (Hech. 2:5-11). Tsëchömi Biblia ninqan cumplikärirqan. Unëmi Joel willakurqan serviqninkunata Jehová santo espïritunta qonampaq kaqta (Joel 2:28-32). Y tsëchömi nunakuna rikëkäyarqan Joel ninqan imanö cumplikëkanqanta. Tsënam apóstol Pëdruqa, imanir kë pasanqantapis willakurqan (lei Hechos 2:14-18). ¿Imanöpataq musyarqan tsënö yachatsikunampaq? Santo espíritu maestronö yanapaqtinmi, tsënöpam musyarirqan Joelchö qellqarëkanqan cumplikëkanqanta. Pero manam Joel ninqanllapita yachatsikunampaqtsu espíritu yanaparqan, hina David qellqanqan ishkë salmopita parlanampaqpis yarpätsirqanmi (Sal. 16:8-11; 110:1; Hech. 2:25-28, 34, 35). Tsëchö nunakuna rikäyanqan y wiyayanqanqa, Diospa pakarëkaqnö yachatsikïninmi karqan.

5, 6. a) ¿Imatataq tapukuyarqan 33 wata Pentecosteschö mushoq conträtopaq? b) ¿Pikunataq këkunata tapukuyarqan, y imanötaq huk acuerdoman chäyarqan?

⁵ Pero atska yachatsikïkunatam punta cristiänokuna alleqllaqa musyayaqtsu. Këta rikärishun, Pentecostés fiestachö mushoq contrato qallanqan imanö kanqantapis manam alleqllaqa tantiayarqantsu. Tsë mushoq contrato, ¿judïokunapaq y judïoman tikrashqa nunakunallapaqtsuraq karqan? ¿O mana judío kaqkunapis santo espïrituta chaskirirtsuraq mushoq conträtoman yëkuyänan karqan? (Hech. 10:45.) ¿Y mana judío ollqukuna señalakuyänanraqtsuraq karqan, y Moises qellqanqan Leykunataraqtsuraq cumpliyänan karqan? (Hech. 15:1, 5.) Kë sasa o aja tapukïkunapa respuestanta musyëqa alläpa precïsom karqan. Tsëpaqqa, allim yachakuyänan karqan, tsëmi santo espïritutaraq wanayaq. Pero ¿pikunawanraq Dios musyatsikunan karqan?

⁶ Diospa yachatsikïninta dirigeq cristiänokunawanmi këtaqa musyatsikurqan. Y pëkunam kë tapukïkunatapis tapukuyarqan. Pablu, Bernabe y Pëdrum rikätsikuyarqan mana judío kaqkunatapis Jehová chaskikanqanta (Hech. 15:7-12). Santo espíritu yanapaptinmi, kë cristiänokuna Escrituras Hebreas ninqanta leïkur huk acuerdoman chäyarqan, tsëpitanam llapan congregacionkuna musyayänampaq cartakuyarqan (lei Hechos 15:25-30 y 16:4, 5; Efe. 3:5, 6).

7. ¿Imanötaq Diospa pakarëkaqnö yachatsikïninta unë musyatsikuyarqan?

⁷ Hina, tsëpitanam más musyakärirqan Juan, Pedru, Santiagu, Pablu qellqayanqan cartankunachö y Escrituras Cristianas librokunachöpis. Y Bibliata qellqar ushariyaptinnam, Diosnintsik nunakunata ni imatapis revelarqannatsu ni willarqannatsu (1 Cor. 13:8). Tsëpinqa, ¿santo espíritu kanan cristiänokunata yachëkätsintsuraq, y yachakuyanqanta yarpäyänampaq yanapëkantsuraq? ¿Hina Diospa pakarëkaqnö yachatsikïninta musyayänampaq yanapakïkantsuraq? Bibliachöqa, awmi ninmi.

Ushanan witsanchö

8, 9. ¿Pikunataq ushanan witsankunachö atsikyäyanqa Diospa pakarëkaqnö yachatsikïninta willakurnin?

⁸ Ushanan witsanchö pasakunampaq kaqtam huk ángel willakurqan: “Yachëyoq nunakunaqa atsikyaq ciëlonömi atsikyäyanqa, alli rurëman atska nunakunata apamoqkunanam atsikyaq qoyllurkunanö imëyaqpis kayanqa, [...] y rasumpëpa yachëqa atskayanqam” (Dan. 12:3, 4). Yachëyoq nunakuna o Diospa kaqta käyeqkuna, ¿pikunataq kayan? ¿Pikunaraq atsikyäyanqa? Trïgopaq y mana alli qorapaq Jesus parlarmi pikuna kayanqantapis musyatsimantsik. ‘Que patsa ushacanan junaqpaq’ parlarmi këta nirqan: “Dios munashqanno cawacoqcunanam imeca intinoraq tillapyäcuyanqa” (Mat. 13:39, 43). ‘Dios munashqanno cawacoqcuna’ nirqa, ‘reynupa tsurinkuna’ o ciëlopaq kaqkunapaqmi parlëkarqan (Mat. 13:38, QKW).

⁹ ¿Llapantsuraq ciëlopaq kaqkuna atsikyäyänan karqan? Awmi, wakin wakinchöqa llapanmi chipapäyan wayin wayin yachatsikurnin, Jesuspa qateqnin këman chäyänampaq yanapakurnin y reunionchö yachatsikurnimpis, tsëta rikar wakin cristiänokuna yachakuyänampaq (Zac. 8:23). Pero ushanan witsanchöqa, Diospa pakarëkaqnö willakïnintam musyatsikuyänan karqan. Hina Danielchö qellqarëkaq profecïapis musyakärinanmi karqan (Dan. 12:9). Pero ¿imanötaq santo espíritu kanan tsëkunata musyatsikun, y pikunawantaq yachatsimantsik?

10. a) ¿Kanan witsanchö pikunawantaq espíritu musyatsikun Diospa pakarëkaq yachatsikïninkunata? b) ¿Imanötaq musyakärirqan Dios ruranqan templo ima kanqampis?

¹⁰ Alleq mana musyanqantsik yachatsikïkunata musyakänampaq tiempo chäramuptinmi, santo espíritu yanapan principal sucursalchö publicacionkunata qellqaq wawqikunata. Pëkunaqa mäkoq mäkoq cumplido sirveq churashqanmi kayan (Mat. 24:45; 1 Cor. 2:13). Tsëpitanam Jehoväpa Testïgonkunata Pushaqkuna ëllukëkur tsë yachatsikï imanö kanqantapis alliraq rikäyan (Hech. 15:6). Y llapankuna musyayänampaqmi ima acuerdoman chäyanqantapis publicacionkunachö horqarayämun (Mat. 10:27). Hina tsë yachatsikïta más käyirirqa, yapëmi yachatsikarayämun (rikäri “Espïritum musyatsikun Dios ruranqan templo ima kanqantapis” recuadrota).

¿Imanötaq yanapamantsik Diospa pakarëkaq yachatsikïninta musyanqantsik?

11. ¿Imanötaq yanapamantsik Jehoväpa pakarëkaq yachatsikïninta espíritu musyatsimanqantsik?

¹¹ Llapan cristiänokunam kushikuntsik mana musyanqantsikkunata santo espíritu musyatsimashqa. Unë cristiänokunatanömi yanapamantsik leinqantsikkuna shonquntsikman chänampaq, hina yarpänapaq y yachakunqantsiknö ruranapaqpis (Luc. 12:11, 12). Manam universidadkunamanraqtsu ëwanantsik publicacionnintsikkunachö yachatsikïkunata käyinapaq o mayanapä (Hech. 4:13). Tsëpinqa, ¿imataraq rurashwan más alli käyinapaq? Këkunata rikärishun.

12. ¿Imata ruranapaqtaq santo espïrituta mañakushwan?

¹² Santo espïrituta mañakï. Bibliapita parlaq publicacionkunata estudiarqa Diosta mañakï espïritunwan yanapashunëkipaq. Hapallëkilla o ichikllata yachakunëkipaq kaptimpis Diosmanqa mañakunëkim. Tsënö ruranqëkim ciëlochö Teytantsikta kushitsinqa. Jesus ninqannömi, shonqupita patsë espirïtunta mañakoqtaqa Jehová espïritunta qoykunqa (Luc. 11:13).

13, 14. Diospa pakarëkaqnö yachatsikïninta musyanapaq, ¿imanötaq yanapamantsik reunionkunapaq puntallapita yachakunqantsik?

¹³ Reunionkunapaq yachakï. ‘Miquinintsic öranchö qaramänapaqmi’ mäkoq mäkoq cumplido sirveqqa cargota chaskishqa. Y kë mikïtaqa qomantsik tukïläya publicacionkunata ruramurnin, y kë publicacionkunapita yachakunapaq reunionkunata patsätsimurninmi. Y tsëmi ‘Diosman creyicoq wauqincunata’ imata yachakuyänampaqpis mañarqa, yachakuyänan alläpa preciso kanqanta musyarmi mañan (1 Ped. 2:17; Col. 4:16; Jud. 3). Yachatsimanqantsikkunata wiyakurqa santo espíritu ninqantam wiyakïkantsik (Apo. 2:29).

¹⁴ Reunionkunapaq puntallapitana yachakurqa, Bibliapa textonkunata ashï, y yachakïkanqëki tëmawan imanöpis tinkunqanta rikë. Tsënöpam Diospa pakarëkaqnö yachatsikïninkunata más musyanki (Hech. 17:11, 12). Textokunata kikin Bibliachö leirqa, leinqëkita manam qonqankitsu y santo espïritupa yanapakïninwanmi yarparanki. Hinamampis Bibliapa mëqan päginanchö kë versïculokuna këkanqantapis rasllam taririnki.

15. ¿Imanirtaq llapan publicacionkunata leinantsik y imataraq rurashwan?

¹⁵ Llapan publicacionkunata leï. Reunionchö mana yachakunqantsik publicacionkunatapis rurayämushqa yanapamänantsikpaqmi. Yachatsikoq ëwar qarakunapaq kaq revistakunatapis rurayämushqa noqantsikta yanapamänapaqwanmi. Kë alläpa rurakïyoq mundochöqa pitapis shuyararllam kawakuntsik. Tsë hörakunam manaraq leinqantsik publicacionkunata leirëkashwan. Wakinkunaqa ëwarëkar o cärrota manejëkarmi grabacionkunata wiyayan. Ama qonqashuntsu, publicacionkunata llapantsikpaq yarpëkur, alli estudiëkur y Diospa kaqta más kuyanapaqmi rurayämun (Hab. 2:2).

16. Leïkar mana käyinqantsikkunata tarirqa, ¿imanirtaq huk hörachö yachakunapaq apuntanantsik?

¹⁶ Leinqëkita yarpänëkipaq churapakë. Bibliata y publicacionkunata leinqëkiman yarparë. Y shumaq leïkaptiki, pucha puchachö tapukïnikikuna kaptinqa, apuntari huk hörachö yachakunëkipaq. Gustamanqantsik tëmataqa pasëpam estudiëkuntsik, y masmi musyëtapis munantsik. Tsënöpam punta musyanqantsikpitapis más yachakushun, y tsëqa imë hora karpis yanaparamäshunmi (Mat. 13:52).

17. ¿Imanö yachakunëkipaqtaq churapakarqunki?

¹⁷ Familiachö Diosta Adorana Hörata alli patsätsi. Jehoväpa Testïgonkunata Pushaqkunam nimantsik semänachö huk paqasta o huk hörata rakinapaq hapallantsiklla o familiawan Bibliapita yachakunapaq. Y semänachö ishkë kutilla reunionkuna kanqanmi yanapamantsik tsëta ruranapaq. ¿Imakunatataq yachakushwan tsë hörachö? Wakinkunaqa kikin Bibliata leïkurmi mana käyiyanqan versïculokunata huk librokunachö ashïkurnin yachakuyan, y tsëpitanam Bibliankunapa kuchunman apuntayan. Y wakinnam yachakuyanqan familiachö imanö yanapanantapis shumaq parlariyan. Wakin teytakunanam puntallapitana familiampaqnö kaqta, o yachakïta munayanqan tëmakunata akrayan. Y noqantsikpis, itsa tiempowanqa tukïnöpa yachakunapaq kaqta yachakurishun.a

18. ¿Imanirtaq Bibliapa wakin yachatsikïninkunata sasam nir haqirishwantsu?

¹⁸ Jesusqa santo espíritu yanapamänapaqmi awnikurqan, tsëmi mana musyanqantsikkunata yachakïta tïranantsik. Tsëpis ‘kikin Diospa yachëninmi’, y pëqa yachakunapaqmi nimantsik (lei Proverbios 2:1-5b). Tsëchömi këkan ‘llapan cuyagnin runacunapag Dios Yaya prevenishga catsingan’ yachatsikïkuna. Y sinchikunëkim Diospa Palabranta más yachakunëkipaq. Santo espïritum yanapashunki “Dios Yayapa yachayninchö imayca pacaraycagnö llapan mana regengantsicta rasumpa reg[inayquipaq]” (1 Cor. 2:9, 10, NTCN).

[Päginapa ura kuchunchö willakïkuna]

¿Yarpankiku?

• ¿Imanötaq santo espíritu yanapamantsik ‘Diospa yachayninchö pacaraycagnö’ yachatsikïkunata musyanapaq?

• ¿Pikunawantaq santo espíritu unë cristiänokunata musyatsirqan Diospa pakarëkaqnö yachatsikïninkunata?

• Rasumpa kaq yachatsikïta, ¿imanötaq kanan witsan musyatsikun santo espíritu?

• ¿Imatataq rurashwan santo espïritupa yanapakïninta chaskinapaq?

[30 kaq päginachö recuadru]

Espïritum musyatsikun Dios ruranqan templo ima kanqantapis

Unë tabernáculo y Jerusalenchö templokunam rikätsikuyarqan Jehoväpa más alli kaq templon yurimunampaq kaqta. Tsëqa ‘Diospa yachayninchö imayca pacaraycagnö’ yachatsikïmi karqan, y tsëtam unë cristiänokunata Dios musyatsirqan. Kë templopaq parlarmi Pablu nirqan: “Sielucho quecaq carpapita templuchomi pëqa quecan noqantsicpa biennintsic Diosta mañacur. Tse templutaqa quiquin Diosmi rurashqa, y manam nunatsu” (Heb. 8:2). Tsë temploqa, Jesuspa sacrificionwan y sacerdote këninwan Diosnintsik imanöpis adoranapaq patsätsimunqanmi.

“Sielucho quecaq carpapita templu[qa]” qallarqan, 29 watachö Jesus bautizakuriptin y alli sacrificiopaq kanampaq kaqta Jehová musyatsikuriptinmi (Heb. 10:5-10). Wanunqampita kawariramurmi, Cristu kikin ciëloman yëkurqan y ‘Diospa nopanman yecurqan’ sacrificionpa chaninta aparnin (Heb. 9:11, 12, 24).

Jehoväpa “shäriquicaq wayin cuenta[m] quecantsic” nirqanmi Pablu wakin cartanchö (Efe. 2:20-22). Hebreus textochö templo nirqa, ¿kë Efesios textochö wayillapaqtsuraq parlëkarqan? Atska watapam Jehoväpa sirveqninkunaqa creiyarqan tsë templolla kanqanta. Ciëlopaq kaq akrashqakuna kë Patsachöraq alistashqa karirnin, ciëlochö Jehoväpa templonchö ‘rumi cuenta’ kayänantam creiyaq (1 Ped. 2:5).

Pero 1971 watachömi publicacionta ruraqkuna käyiyarqan Efesios textochö ‘wayi’ ninqan, Dios ruranqan templo mana kanqanta. Tsë ‘carpapita templu’ ciëlota ëwaqpaq kaqkunawan rurakänan kaptinqa, “Jesus cutimonqan” witsanraqchi funcionar qallanman karqan, tsë watachöraq kawarir qallayaptin (1 Tes. 4:15-17). Tsëmi Pablupis tabernäculopaq parlarnin këta nirqan: “[Kay] templuchö llapan rurayanganga, imayca juc ejemplunömi canan tiempuchö nogantsicpag” (Heb. 9:9, NTCN).

Kë textokunata wakin textokunawan tinkuratsiyaptinmi, alleq musyariyarqan Dios ruranqan templo tsëraq mana rurakëkanqanta. Y ciëlopaq akrashqakuna Patsachöraq ‘rumi cuenta’ tsëraq mana alistakëkanqanta. Tsëpa rantinqa, Jehová ruranqan templopa pationchö y santo kaq lädonchömi servikäyan, hina ‘llapan shonquncunawanmi’ llapan hunaq Diosta alabëkäyan (Heb. 13:15).

[31 kaq päginachö dibüju]

¿Imanötaq ‘Diospa yachayninchö pacaraycagnö’ kaqkunata más musyashwan?