Jehoväpa Testïgonkunata Pushaqkunapa cartan
Kuyashqa wawqikuna y panikuna:
Ciëlochö këkaq Teytantsik Jehoväpa kuyakïninqa manam imawampis igualantsu. Tsënö kaptinmi, “Diosqa allapa cuyacoqmi” nin Bibliaqa (1 Juan 4:8). Llapanta Puëdeq kaptimpis, Bibliaqa rikätsimantsik podernimpita o kallpampitapis masqa kuyakoq këninta rikätsikunqantam. Pëqa alläpa kuyakïwanmi gobernamantsik, tsëmi Pëman witita munantsik.
Jehoväqa maman obligamantsiktsu sirwinapaq, sinöqa shonqupita patsë kuyar sirwinantsiktam munan. Pëqa manam kikimpa munëninllata ashirtsu gobernamantsik, tsëmi kuyarnin shonquntsikpita patsë sirwintsik. Tsënö sirwirmi rikätsikuntsik gobernamänata munanqantsikta, porque kuyakïwan y alli gobernaq kanqantaqa musyantsikmi. Tsëtaqa rikätsikushqa nunata kamanqampita patsëmi.
Pëta wiyakuyänampaq Adantawan Ëvata obliganampa rantinmi, wiyakuyänampaq kaqta o mana wiyakuyänampaq kaqtapis kikinkuna akrakuyänantam jaqirirqan. Jehoväta shonqupita patsë kuyarnin y pëkunarëkur imëkatapis ruranqanta agradecikurninqa, Satanás shonqunkunata mana wiyakoq këman tikraratsinanta manam jaqiyanmantsu karqan.
Tsëpita atska tiempo pasarinqanchönam Israel nacionpita despedikurnin Moises kënö nirqan: “Rikë, kananmi puntëkiman churamö kawëta y alli kaqta, y wanïta y mana alli kaqta” (Deut. 30:15). Imanö kawayänampaq kaqtapis kikinkunam akrakuyänan karqan. Tsënöllam Josuëpis israelïtakunata kënö nirqan: “Jehoväta sirwita mana allitanö rikarqa, pita sirwita munayanqëkitapis kanan akrakuyë”. Tsënam israelïtakunaqa Josuëta kënö niyarqan: “Noqakunaqa manam ni imanöpapis Jehoväta jaqirita puëdiyätsu” (Jos. 24:15, 16). Noqantsikpis pëkunanöllam pensantsik. Jehovätaqa alläpam kuyantsik y jaqiritaqa ‘manam ni imanöpapis puëdintsiktsu’.
Cristiano karmi Diosta sirwita o mana sirwitapis kikintsik akranapaq kaqta alli entiendintsik. Anciänokuna pitapis consejëta o imatapis claro willëta puëdirpis, manam cristiano mayinkunapa kawëninta o markäkïninta manejayanmantsu. Apóstol Pablum kënö qellqarqan: “Noqacunaqa manam ecsijiyaqtsu ‘Quenomi marcäcuyänequeqa’ nirnin, antis munayäqa cushishqa cayänequipaq yanapeniquicunatam, porqui qamcunaqa marcäquiniquicunacho alli patsacashqanam cayanqui” (2 Cor. 1:24).
¡Imanö kushikïpaqmi kikintsikpita munar ruranqantsikqa, obligado ruranqantsikpitapis! Kuyarnin alli kaqta ruranantsiktam Jehoväqa munan. Tsënö ruranantsik alläpa precisanqantaqa rikätsikun Pablu kënö ninqanmi: “Sitsun llapan capamaqnïta wactsacunata raquicüman, y que etsätapis cayëcüman, peru nuna mayïta mana cuyaptïqa, manam ni imapaq sirwïtsu” (1 Cor. 13:3).
¡Imanö kushishqa y alabashqaraq Jehová sientikun atska millón nunakuna pëta kuyarnin shonqupita patsë sirwiyaptin!
Jehoväqa juk teytanömi llapan sirweqninkunata kuyan. Kë mundota y munëninkunata kuyayänëkipa rantin pëta kuyayanqëkipitam qamkunatapis wamrakuna, mözokuna y shipashkuna, Jehoväqa kuyayäshunki. Jina noqakunapis tsënöllam llapëkikunata alläpa kuyayaq (Luc. 12:42, 43).
Wawqikuna, panikuna, wamrakuna y jövenkuna, Jehoväta alläpa kuyayanqëkitam rikätsikuyarqunki pasaq wata 1.748.697.447 hörakuna alli willakïkunata musyatsikurnin kayanqëkiwan. Jina pëta kuyarmi, 7.782.346 cristiänokuna entero Patsachö tsë willakïkunata musyatsikuyarqunki. Alläpam kushikuntsik 268.777 mushoq cristiänokuna y pëkunawan junto mëtsika jövenkuna Jehovällatana sirwiyänampaq yakuchö bautizakuyanqampita. Tsëqa rikätsikun, cada semana ushë 5.168 bautizakuyanqantam. ¡Imanö kushikïpaqmi tsëqa!
Diospa markanchö këkaqkunaqa, llapantsikmi kë ushanan junaqkunachö sufrintsik imëka problëmakuna kaptin, llakikïkuna chämuptin, chikishqa karnin, qeshyapäkurnin, y höraqa, edäyëman chashqa karnin. Tsëkunapa pasarpis listom këkantsik qepaman kutinapa rantin alli tsarakunantsikpaq. Kuyakïnïkunata y salüdökunatam qamkunapaq apatsiyämö (Heb. 10:39; 2 Cor. 4:16).
Wawqikikuna turikikuna,
Jehoväpa Testïgonkunata Pushaq