Jehoväqa alli patsëkatsirmi imëkatapis ruran (1 Corintius 14:33). Tsëmi sirweqninkuna imanö adorayänampaq kaqtapis shumaq patsätsishqa. Këchömi yachakunki sirweqninkunata Jehovä imanö diriginqanta, y pë munanqannö imëkapis rurakänampaq imanö yanapakunapaq kaqta.

1 KAQ: ¿Pitataq Jehovä churashqa sirweqninkunata diriginampaq?

‘Congregacionchö kaqkunapa dirigeqninqa Cristum’ (Efesius 5:23). Jehoväpa sirweqninkunataqa Jesusmi ciëlupita dirigin. Pëmi churashqa ‘alli juiciuyoq y confiakuypaq sirwipakoqta’. Tsë sirwipakoq cuentaqa kayan Jehoväpa testïgunkunata dirigeqkunam, y wallkaqllam kayan (leyi Mateu 24:45-47). Jerusalenchö punta cristiänukunata dirigeqkuna rurayanqannöllam kanan witsampis Jehoväpa testïgunkunata dirigeqkunaqa rurayan (Hëchus 15:2). Pëkunaqa manam Diospa sirweqninkunapa mandaqnintsu kayan, sinöqa Bibliachö Jehovä ninqantam cäsukuyan y Jesucristutam mandakoqnintanö rikäyan.

2 KAQ: ¿Anciänukunaqa imanötan Jehoväpa sirweqninkunata yanapayan?

Anciänukunaqa Jehoväpa sirweqninkunatam Bibliawan yachatsiyan, y mana allikunapa pasayaptinmi yanapayan. Tsë llapan rurayanqankunapitaqa manam cobrakuyantsu, sinöqa ‘Diospa rikëninchö gänas gänasllam’ rurayan, y manam ‘imatapis tarita munartsu’ (1 Pëdru 5:1, 2). Anciänukunataqa siervu ministerialkunam yanapayan, y pëkunapis kallpachakurninqa anciänu këman chëta puëdiyanmi.

Jehoväpa testïgunkunata dirigeqkunaqa, congregacionkunata watukar yanapakuyänampaqmi wakin anciänukunata akrayan. Pëkunaqa cada congregacionta watukayanqanchömi wawqi panikunata yanapayan, y pikuna anciänu o siervu ministerial kayänampaq kaqtapis pëkunam rikäyan (1 Timoteu 3:1-10, 12; Tïtu 1:5-9).

3 KAQ: ¿Imatataq llapan Testïgukuna rurayan?

Llapan Testïgukunam reunionninkunaman ëwar “Teyta Jehoväpa jutinta” alabayan, y cada ünum puëdinqanmannö nunakunata Diospita yachatsin (leyi Salmus 148:12, 13).

MASLLA YACHAKUSHUN

4 KAQ: Jesusqa kuyëllapam Jehoväpa sirweqninkunata dirigin

Jesusqa yamë kanapaq yanapamënintsiktam munan. Leyiyë Mateu 11:28-30 ima ninqanta y këpaq parlayë:

• ¿Jesus imanö kanqantataq Bibliachö nin? ¿Jesusqa imatataq noqantsikpaq munan?

VIDEU: Nepal nacionchö terremötu kaptin anciänukuna yanapakuyan (4:56)

Bibliachöqa clärum willakun wawqi paninkunata anciänukuna imanö yanapayänampaq kaqta.

Leyiyë Isaïas 32:2 y 1 Pëdru 5:1-3 ima ninqanta y këkunapaq parlayë:

• ¿Imanötan sientikunki Jesusnö kuyakoq y yanapakoq kayänampaq anciänukuna kallpachakuyaptin?

• ¿Ima maschötaq anciänukunaqa Jesusnö kayänampaq kallpachakuyan?

5 KAQ: Anciänukunaqa wawqi panikuna pëkunapita yachakuyänampaqmi kallpachakuyan

VIDEU: Anciänukuna, ¡pushakoq kayë! (7:39)

Jesusqa clärum nirqan wawqi panikunata dirigir yanapakoqkuna imanö kayänampaq kaqta. Leyiyë Mateu 23:8-12 ima ninqanta y këpaq parlayë:

• Leyirinqantsiknöpis, ¿imanötan anciänukunaqa kayänan? ¿Wakin religionchö dirigeqkunaqa Jesus ninqanta cäsukuyanku?

1. Anciänukunaqa Jehoväwan mas amïgu kayänampaqmi kallpachakuyan, y familiankunatam Diosta sirwiyänampaq yanapayan.

2. Anciänukunaqa congregacionchö llapan wawqi panikunapaqmi yarpachakuyan.

3. Anciänukunaqa wayin wayinmi Diospita yachatsikuyan.

4. Anciänukunaqa reunionkunachömi yachatsikuyan y limpiapakurpis yanapakuyanmi.

6 KAQ: Anciänukunataqa cäsukunantsikmi

¿Imanirtan Bibliachö nin anciänukunata cäsukunantsikpaq? Leyiyë Hebrëus 13:17 ima ninqanta y këpaq parlayë:

• ¿Imanirtan Bibliachö nin congregacionchö dirigeqkunata cäsukunapaq y respetanapaq? ¿Y tsëta ruranqantsikqa allipaqtsuraq kanman?

Leyiyë Lücas 16:10 ima ninqanta y këpaq parlayë:

• ¿Imanirtan anciänukuna nimanqantsikta llapanchö cäsukunantsik?

KËTAM YACHAKURQUNKI

Jehoväpa sirweqninkunataqa Jesusmi dirigin, tsëmi anciänukunaqa Jesusta mandakoqnintanö rikäyan. Y pëkuna cuidamashqa y yachatsimashqam cäsukuntsik.

¿Yarpankiku?

• ¿Pitan Jehoväpa sirweqninkunata dirigin?

• ¿Imanötan congregacionchö anciänukuna yanapakuyan?

• ¿Imatataq llapan Testïgukuna rurayänan?

MASTA YACHAKUY

Jehoväpa testïgunkunata dirigeqkuna y anciänukuna wawqi panikunata imanö kuyayanqanta rikë.

Mana allikunapa pasayaptinmi wawqi panikunata yanapayarqan (4:22)

Congregacionta watukaq wawqikuna imanö yanapakuyanqanta rikë.

Congregacionkunata watukaq wawqi karu markakunachö yanapakunqan (4:51)

Warmikuna congregacionchö imanö yanapakuyanqanta musyanëkipaq leyi.

“¿Jehoväpa testïgunkunachöqa warmikuna yachatsikuyanku?” (Täpakoq, 1 de septiembri 2012)

Wawqi panikunata yanapayänampaq y animayänampaq anciänukuna imata rurayanqanta leyi.

“Anciänokunaqa kushishqa kanapaqmi yanapamantsik” (Täpakoq, 15 de enëru 2013)

1 KAQ: ¿Ima nintan Bibliachö casädu ollqukunapaq?

Jehoväqa ollqu kaqkunatam familianta diriginampaq churashqa (leyi Efesius 5:23). Tsëmi imata decidirpis familian kushishqa kanampaq decidinan. Bibliachömi ollqukunata kënö nin: “Warmikikunata kuyar sïguiyë” (Efesius 5:25). Tsëmi ollqu kaqqa japallankuna këkar o jukkuna rikëkäyaptimpis warminta kuyëpa y respëtuwan tratanan, imëka mana allikunapitam cuidanan, necesitanqankunapaqmi trabajanan y kushishqatam katsinan (1 Timoteu 5:8). Masqa yarpachakunan warminwan juntu Jehoväpita alli yachakuyänampaqmi (Mateu 4:4). Jehoväman ishkan mañakuyaptin y Bibliata leyiyaptinqa mas allim kanqa. Warminta cuidar y kuyarqa Jehoväwanmi imëpis amïgu kanqa (leyi 1 Pëdru 3:7).

‘Congregacionchö kaqkunapa dirigeqninqa’ Señornintsik Jesusmi (Efesius 5:23). Pëmi, ‘alli juiciuyoq y confiakuypaq sirwipakoqta’ churashqa Jehoväpa sirweqninkunata diriginampaq (leyi Mateu 24:45). Tsëmi ‘alli juiciuyoq y confiakuypaq sirwipakoqqa’ Jesuspita autoridäta chaskishqa kar, imatapis decidita puëdin. Peru tsënö kaptimpis, pëkunaqa Cristu mandanqantam rurayan y Cristupa wawqinkunatam yanapayan. Këchömi yachakunki, tsë sirwipakoq pï kanqanta y imanö yanapamanqantsikta.