47 KAQ YACHAKUNËKIPAQ
¿Bautizakunëkipaq listunaku këkanki?
Bibliata estudiarmi Jehoväpita imëkata yachakurqunki, y capazchi pë munanqannö kawëta munar imëkachö cambiarqunki. Tsënö kaptimpis, bautizakunëkitaqa capazchi imakunapis michëkäshunkiraq. Këchömi yachakunki mana fäcil kaptimpis bautizakuyänampaq wakinkuna imata rurashqa kayanqanta y qampis imata ruranëkipaq kaqta.
1 KAQ: Bautizakunëkipaqqa, ¿Bibliachö llapan ninqantaraqku musyanëki?
Jehoväqa munan bautizakoqpaq kaqkuna “rasumpa kaqta cläru yachakuyänantam” (1 Timoteu 2:4). Peru bautizakunëkipaqqa, Jehoväqa manam Bibliachö llapan ninqantaraq musyanëkitatsu shuyaran. Jehoväta unëpana sirweqkunapis Bibliataqa estudiar sïguikäyanllam (Colosensis 1:9, 10). Peru bautizakunëkipaqqa allim entiendinëki Jehovä mandakunqankunata y imata ruranëkipaq kaqkunata. Congregacionchö anciänukunam yanapayäshunki bautizakunëkipaq imakunata yachakunëkiraq faltanqanta o listuna këkanqëkita musyanëkipaq.
2 KAQ: ¿Imakunatataq ruranëki bautizakunëkipaq?
Bibliachömi nin: “Arrepentikuyë, y […] Diosman kutiyë” (leyi Hëchus 3:19). Tsëmi manaraq bautizakur llapan mana alli rurëkunapita llapan shonquykiwan arrepentikunëki y perdonashunëkipaq Jehoväman mañakunëki. Mana alli rurëkunatam llapanta dejanëki y Jehovä munanqannönam kawanëki. Reunionkunamanmi mana faltëpa ëwanëki y wawqi y panikunawanmi Diospita yachatsikoq yarqunëki.
3 KAQ: ¿Imanirtan bautizakuytaqa mantsanëkitsu?
Wakinkunaqa bautizakuyta mantsayan Jehovä mandakunqankunata cumplita mana puëdiyänampaq kaqta pensarmi. Capazchi qampis, unë witsan Jehoväta sirweqkunanö imallachöpis pantarinki, peru Jehoväqa entiendimantsikmi y manam shuyarantsu llapantapis mana pantashpa ruranantsiktaqa (leyi Salmus 103:13, 14). Jehoväqa alläpam kushikun pë munanqannö kawanëkipaq kallpachakuptiki, y imëpis yanapashunkim. Tsëmi Palabran Bibliachö nimantsik, ni imapis “Teyta Dios kuyamanqantsikpita mana rakimänapaq kaqta” (leyi Romänus 8:38, 39).
MASLLA YACHAKUSHUN
¿Imapis michëkäshunkiku bautizakunëkita? Tsëqa këkunata ruranqëkim yanapashunki: Jehoväpita mas yachakunqëki y yanapashunëkipaq kaqman confiakunqëki. Tsëta yachakurishun.
4 KAQ: Jehoväpita mas yachakuy
Manaraq bautizakurmi Jehoväpita alli yachakunëki, tsëmi yanapashunki pëta kuyanëkipaq y mandakunqankunata cäsukunëkipaq. VIDEUCHÖ rikäyë bautizakuyänampaq wakinkuna imata rurayanqanta, y këpaq parlayë:
Videuchö rikanqantsiknöpis, ¿imatan yanaparqan bautizakuyänampaq?
Leyiyë Romänus 12:2 ima ninqanta y këkunapaq parlayë:
¿Creinkiku Bibliachö llapan ninqankunata? ¿Jehoväpa testïgunkunaqa rasumpa kaqtatsuraq yachatsikuyan?
Yachakuykanqëkikunaman mana creirqa, ¿imataraq rurankiman?
5 KAQ: Mana fäcil kaptimpis bautizakunëkipaq decidi
Bautizakunapaq decidirqa, llapantsikpis imëka mana allikunapam pasarquntsik. Mana fäcil kaptimpis bautizakunampaq juk warmi imata ruranqanta VIDEUCHÖ rikäyë y këkunapaq parlayë:
¿Imanirtan pani Narangerelpaqqa bautizakunan fäciltsu karqan?
Teytantsik Jehoväta kuyanqanqa, ¿imanötan yanaparqan bautizakunampaq?
Leyiyë Proverbius 29:25 y 2 Timoteu 1:7 ima ninqanta y këpaq parlayë:
¿Imatan yanapamantsik valienti kanapaq?
6 KAQ: Jehovä yanapashunëkipaq kaqman confiakuy
Jehovämi yanapashunki pë munanqannö imatapis ruranëkipaq. VIDEUTA rikäyë y këkunapaq parlayë:
Videuchö rikanqantsik nunaqa, ¿imanirtan bautizakuyta mantsarqan?
¿Imatan yanaparqan Jehoväman mas confiakunampaq?
Leyiyë Isaïas 41:10, 13 ima ninqanta y këpaq parlayë:
¿Imanirtan següru këkanki Jehoväta äninqëkita cumplinëkipaq kaqta?
7 KAQ: Kuyashurniki Jehovä ruranqankunaman pensë
Jehovä alläpa kuyashunqëkiman pensanqëkim yanapashunki llapan ruramunqankunapita mas agradecikunëkipaq y imëyaqpis sirwita decidinëkipaq. Leyiyë Salmus 40:5 ima ninqanta y këpaq parlayë:
Jehovä ruramunqankunapitaqa, ¿imatataq mas valoranki?
Jeremïasqa Jehoväta kuyarmi yachatsikunampaq mandanqanta y Pëpa jutimpa reqishqa kanqanta valorarqan, tsëmi kënö nirqan: “Teyta Jehovä, noqataqa qampa jutikipam reqiyäman. Qam nimanqëkitaqa mikuytanömi mikukurkurqö, tsë nimanqëkikunam shonqüta alläpa kushitsishqa” (Jeremïas 15:16). Kë tapukuykunata contestë:
¿Imanirtan Jehoväpa testïgun këqa alläpa kushikuypaq?
¿Jehoväpa testïgun kanëkipaq bautizakuyta munankiku?
¿Imallapis michäshunkiku bautizakunëkita?
¿Imataraq rurankiman bautizakunëkipaq?
WAKIN IMA NIYANQAN: “Jehovä mandakunqankunataqa manam cumplita puëdishaqtsu, tsëmi bautizakuyta mantsa”.
¿Tsënöku qampis pensanki?
KËTAM YACHAKURQUNKI
Bautizakunëkita michäkuyaptin o ima pasakuptimpis Jehovämi yanapashunki bautizakunëkipaq.
¿Yarpankiku?
¿Bibliachö llapan ninqantaraqku musyanëki bautizakunëkipaq?
¿Imatataq ruranëki manaraq bautizakurnin?
¿Imanirtan bautizakunëkita imapis michäshunëkita permitinëkitsu?
MASTA YACHAKUY
Imanir bautizakunëkipaq kaqta yachakuy.
“¿Bautizakunëkipaq listunaku këkanki?” (Täpakoq, marzu 2020)
Michäkuyaptin o mana fäcil kaptimpis bautizakunëkipaq ima yanapashunëkipaq kaqta yachakuy.
Juk nuna bautizakunampaq ima yanapanqanta rikë.
Ataa jutiyoq nunaqa manam bautizakuyta munarqantsu, peru tsëpitaqa bautizakurqanmi. Ima yanapanqanta rikë.