4. Familiachö manana kuyanakuyanqan

“Kayanqam nunakuna mana kuyakoq, mana ankupäkoqkuna.” (2 TIMOTEU 3:1-3, QKW.)

● Wayinkunachö qayapashqa y maqashqakunata yanaparninmi, Chris shutiyoq warmi Gales markachö trabajan. Pëmi kënö nin: “Huk kutim huk warmi alläpa maqashqa chämurqan, qaqllampis mana reqipaqnömi karqan. Wakin warmikunanam alläpa qayapäyashqa kayaptin ni parlakuyanllapistsu, muchkiräkuyanllam o umpuräkuyanllam”.

¿IMATATAQ RIKÄTSIKUN PASAKUNQANKUNA? Africapa huk nacionninchömi, pachak warmikunapita kima chunkatanö wambra kayanqan witsanchö violayashqa, y cada chuskupitanam hukta alläpa maqayan. Hina tsë nacionllachö tapukur puriyanqanchömi, pachakpita kima chunkapitapis más ollqukunaqa warminkunata maqayanqanta mana allitanö mana rikäyanqanta niyan. Pero manam warmikunallatatsu wayichöqa maqayan o qayapäyan. Canadá nacionchömi huk pachak nunakunapita kima chunka nunakunata warminkuna maqayan o qayapäyan.

WAKINKUNA NIYANQAN. Imëpis wayichöqa qayapänakur y maqanakurmi kawakuyashqa, pero kanan witsankunam tsëpaq más parlayan.

¿RASUMPAKU NIYANQAN? Kanan witsankunaqa maqakïtawan qayapänakïtaqa mana allitanönam rikäyan, pero ¿tsëqa yanapakushqaku maqakïkuna y qayapänakïkuna wallkayänampaq? Manam. Familiachö shumaq kuyanakïqa masmi ushakäkïkan.

¿IMA NINKITAQ? ¿2 Timoteu 3:3 ninqan texto cumplikëkanku? ¿Atskaq nunakunaku familiankunachö mana kuyakoq kayan?

[7 kaq päginachö ninqan]

“Familiachö qayapänakuyanqanta y maqanakuyanqantaqa manam denunciayantsu. Huk warmiqa kima chunka pitsqa kuti qowan maqaptinran policïaman ëwan.” (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES)