12 KAQ YACHAKUNËKIPAQ
Bibliapita yachakur sïgui
Wakinkunapaqqa Bibliata estudiëqa capaz fäciltsu kanman, peru Bibliachö yachakuyanqankuna yanapanqanta rikarmi mana fäcil kaptimpis yachakur sïguiyan. Qamtaqa, ¿Bibliapita yachakunqëki yanapashunkiku? ¿Imaraq yanapashunkiman mana fäcil kaptimpis yachakur sïguinëkipaq?
1 KAQ: ¿Imanirtan Bibliapita yachakunëkipaq kallpachakunëki?
“Diospa palabranqa kawëkaq y alläpa poderyoqmi” (Hebrëus 4:12). Bibliachömi yachakuntsik Dios imata pensanqanta y qampaq yarpachakunqanta. Bibliawanqa manam ima librupis igualantsu. Bibliachö yachakunqëkiqa manam imëka yachaq kanëkillapaqtsu yanapashunki, sinöqa imatapis alli decidinëkipaq y Jehovä änikunqankunaman confiakunëkipaqmi. Bibliata leyiptikiqa Jehovämi poderninwan yanapashunki pëta mas reqinëkipaq y kuyanëkipaq.
2 KAQ: ¿Imanirtan Bibliachö yachakunqantsikta cuentachö katsinantsik?
Bibliachöqa imëkatam yachakuntsik, y tsëwanqa manam imapis igualantsu. Tsëmi Bibliachö kënö nimantsik: “Rasumpa kaqta rantita procurë, Teyta Diospita yachakunqëkitaqa ama rantikuytsu” (Proverbius 23:23). Bibliachö yachakunqantsikkuna yanapamanqantsikta cuentachö katsirqa, mana fäcil kaptimpis yachakur sïguinapaqmi kallpachakushun (leyi Proverbius 2:4, 5).
3 KAQ: ¿Imanötan Jehoväqa yanapashunkiman Bibliata estudiar sïguinëkipaq?
Kamakoq Teytantsik Jehoväqa llapanta puëdeqmi. Amïguyki karmi imanö kanqëkita musyan, y pëta mas reqinëkipaqmi yanapashuynikita munan. Diosnintsikmi yanapashunki mas yachakuyta munanëkipaq y yachakunqëkimannö ruranëkipaq (leyi Filipensis 2:13). Y yanapashunkim Bibliata estudianëkita michäkuyaptin o mana fäcil kaptimpis yachakur sïguinëkipaq. Tsëmi Jehovä yanapëkushunëkipaq imëpis mañakunëki (1 Tesalonicensis 5:17).
MASLLA YACHAKUSHUN
Bibliata estudianëkita michäkuyaptin o mana fäcil kaptimpis yachakur sïguinëkipaq, y Jehovä yanapashunëkipaq kaqtam yachakushun.
4 KAQ: Tiempuykitam patsätsinëki Bibliata estudianëkipaq
Imëka rurëyoq kashqam höraqa Bibliata estudianapaq tiempuntsik kantsu. Tsëqa, ¿imataraq rurashwan? Leyiyë Filipensis 1:10 ima ninqanta y këkunapaq parlayë:
¿Imakunatataq imëkapitapis mas puntaman churashwan?
¿Imatataq rurankiman Bibliata imëpis estudianëkipaq?
Juk baldiman allpata puntata winarqa manam llapan rumita winëta puëdintsiktsu.
Peru rumita puntata winarqa, llapan allpatam winëta puëdintsik. Tsënöllam Bibliata estudiëtapis puntaman churanëki, tsënöpam tiempuyki kanqa Bibliata estudianëkipaq y juk cösaskunapaqpis.
Bibliata estudianqantsikqa yanapamantsik Diosnintsikta mas reqinapaq y pë munanqannö adoranapaq y sirwinapaqmi. Leyiyë Mateu 5:3 ima ninqanta y këpaq parlayë:
Bibliata estudianapaq tiempuntsikta alli patsätsinqantsikqa, ¿imanötan yanapamantsik?
5 KAQ: Michäkuyaptimpis Bibliata estudiëtaqa dejëtsu
Bibliata estudianëkita mana munarmi höraqa michäyäshunki. Francescuta ima pasanqanta VIDEUCHÖ rikäyë y këkunapaq parlayë:
Bibliapita yachakuykanqanta familiankunata y amïgunkunata Francescu willaptin, ¿imatataq niyarqan?
Bibliata estudiar Francescu sïguinqanqa, ¿imanirtan allipaq karqan?
Leyiyë 2 Timoteu 2:24, 25 ima ninqanta y këkunapaq parlayë:
¿Bibliapita yachakuptiki familiëkikuna y amïguykikuna ima niyantan?
¿Bibliata estudianëkita michäkuyaptimpis imatatan rurankimantsu?
6 KAQ: Jehovämi yanapashunki
Diosta mas reqinqantsikmi yanapamantsik pë munanqannö kawanapaq, peru hörataqa Jehovä mandakunqankunata casukuyqa manam fäciltsu. Tsënö kaptimpis, Jehovä munanqannö kawanantsikpaq kallpachakushqaqa pëmi yanapamäshun. VIDEUTA rikäyë y këkunapaq parlayë:
Videuchö rikanqantsiknöpis, ¿imatataq Jimqa dejanan karqan Jehovä munanqannö kawanampaq?
¿Jim imata ruranqantaq qampaqqa mas espantakuypaq?
Leyiyë Hebrëus 11:6 ima ninqanta y këkunapaq parlayë:
¿Imatataq Jehovä änin sirwita munar kallpachakoqkunata?
Bibliata estudianëkipaq kallpachakuptiki, ¿imanöraq Jehovä sientikun?
WAKIN IMATA TAPUMANQANTSIK: “¿Qamqa imanirtan Bibliata estudiëkanki?”.
Tsënö niyäshuptikiqa, ¿imataraq ninkiman?
KËTAM YACHAKURQUNKI
Bibliata estudianan mana fäcil kaptimpis yachakunqëkiqa kushishqa kawanëkipaqmi yanapashunki, y Jehoväman confiakunqëkipitam imëka bendicionta chaskinki.
¿Yarpankiku?
¿Imanirtan gustashunki Bibliachö yachakunqëkikuna?
¿Imatataq rurankiman Bibliata estudiëta mas puntaman churanëkipaq?
Bibliata estudiar sïguinëkipaq, ¿imanirtan Jehovä yanapashunëkipaq mañakunkiman?
MASTA YACHAKUY
Tiempunkunata nunakuna alli utilizäyänampaq ima yanapanqanta leyi.
“Tiempuntsikta alli utilizänapaq” (¡Musyatsikoq!, febrëru de 2014)
Nunan michäkuykaptimpis Jehoväta sirwir sïguinqampita, juk warmita Jehovä imanö yanapanqanta rikë.
Imëka mana allikunapa pasashqapis alli tsarakunapaqmi Jehoväqa yanapamantsik (5:05)
Juk warmi mana dejëpa Bibliata estudianqan, Diospita nunan yachakunampaq imanö yanapanqanta rikë.
Wakinkunaqa niyan Jehoväpa testïgunkunaqa pïmëtapis familiankunapita rakikätsiyanqantam. Tsëta niyanqan mana rasumpa kanqanta yachakuy.
“¿Jehoväpa testïgunkunaqa familiakunata rakiyanku?” (jw.org päginachö yarqamoq)