36 KAQ YACHAKUNËKIPAQ
Imëkachöpis honrädu kashun
Llapan nunakunam amïgunkuna confiakuypaq o honrädu kayänanta munayan, tsënöllam Jehoväpis amïgunkuna confiakuypaq kayänanta munan. Peru pïmëpis ulikoq o llullakoq kayaptinmi, kanan witsanqa pimampis confiakuypaqnatsu. Honrädu kanqantsikqa, ¿yanapamantsikku? ¿Imanötan yanapamantsik?
1 KAQ: ¿Imanirtan honrädu kanantsik?
Jehoväta kuyarqa y respetarqa honrädu nunam kanantsik. Yarpänantsikmi imata pensanqantsikta y ruranqantsiktapis Jehoväqa musyëkanqanta (Hebrëus 4:13). Honrädu kashqaqa, Jehovä musyanmi y alläpam kushikun. Tsëmi Bibliachö kënö nin: “Mana allikunata ruraq nunakunataqa, Teyta Jehoväqa chikinmi, peru allita ruraq nunakunataqa kuyanmi” (Proverbius 3:32).
2 KAQ: ¿Imakunachötan honrädu kashwan?
Teytantsik Jehovämi kënö nin: “Jukniki juknikikunam rasumpa kaqllata parlayänëki” (Zacarïas 8:16, 17). Tsëmi mana ulipänantsiktsu o llullapänantsiktsu familiantsikta, trabajaq mayintsikkunata, congregacionchö wawqi panikunata y autoridäkunata. Honrädu kaqkunaqa manam pitapis engañayantsu y manam suwakuyantsu (leyi Proverbius 24:28 y Efesius 4:28). Autoridäkuna niyanqannöllam impuestukunatapis pagakuyan (Romänus 13:5-7). Cada junaqmi llapan ruranqantsikchö ‘alli portakunantsik’ (Hebrëus 13:18).
3 KAQ: ¿Imanötan yanapamantsik honrädu kanqantsik?
Imëkachöpis honrädu kashqaqa, llapankunam noqantsikman confiakuyanqa. Y congregacionchö wawqi panintsikkunapis familiankunawan këkaqnömi noqantsikwan sientikuyanqa, y manam ni imapita mantsapakuyanqatsu. Kikintsikpis alli concienciayoq karmi kushishqa kashun. Honrädu kashqaqa ‘salvamaqnintsik Diospita yachatsikushqam’ jukkunapis yachakuyta munayanqa (Tïtu 2:10).
MASLLA YACHAKUSHUN
Honrädu kanqantsik Jehoväwan amïgu kanapaq yanapamanqantsikta y imakunachö confiakuypaq kanapaq kaqtam yachakushun.
4 KAQ: Jehoväqa manam munantsu ulikoq o llullakoq kayänanta
Leyiyë Salmus 44:21 y Malaquïas 3:16 ima ninqanta y këkunapaq parlayë:
¿Imanirtan envänu kanman ulikunqantsik o llullakunqantsikqa?
Mana fäcil këkaptimpis rasumpa kaqllata parlashqaqa, ¿imanöraq Jehovä sientikun?
Wamrakuna rasumpa kaqta parlayaptinqa teytankuna alläpam kushikuyan. Tsënöllam imëpis rasumpa kaqta parlashqaqa, Teytantsik Jehovä alläpa kushikun.
5 KAQ: Imëkachöpis honrädum kanantsik
Wakinkunaqa niyan honrädu këqa, höraqa mana yanapakunqantam. Peru mana fäcil kaptimpis, honrädu këqa yanapakunmi. Masllata musyanëkipaq VIDEUTA rikäyë.
Leyiyë Hebrëus 13:18 ima ninqanta y këkunapaq parlayë. ¿Imanötan honrädu kashwan...
... familiachö?
... trabäjuchö o escuëlachö?
... juk asuntukunachö?
6 KAQ: Honrädu kanqantsikqa yanapakunmi
Ima problëmamampis mana chëta munarmi wakinkunaqa ulikuyan o llullakuyan. Peru imëpis rasumpa kaqta parlanqantsikqa allipaqmi kanqa. Leyiyë Salmus 34:12-16 ima ninqanta y këpaq parlayë:
¿Imanötan yanapamantsik honrädu kanqantsik?
Casädukuna imëkachöpis honrädu karqa kushishqam kawakuyanqa.
Juk nuna trabäjunchö honrädu kaptinqa patronnimpis confiakunqam.
Autoridäkuna niyanqankunata cäsukushqaqa pëkunapis respetamäshunmi.
WAKIN IMA NIYANQAN: “Ichik ulikurinqantsikqa o llullakurinqantsikqa manam pitapis mana allita rurantsu”.
¿Jehoväqa allim ninmantsuraq ichikllapis ulikushqa o llullakushqa? ¿Imanirtan tsënö pensanki?
KËTAM YACHAKURQUNKI
Jehoväqa munan amïgunkuna imëkachöpis honrädu kayänantam.
¿Yarpankiku?
¿Imakunachötan honrädu kanantsik?
¿Imanirtan ulikïqa o llullakuyqa envänu kanman?
¿Imanirtan imëpis honrädu kankiman?
MASTA YACHAKUY
¿Imanötan teytakuna wamrankunata yachatsiyanman rasumpa kaqllata parlayänampaq?
Änikuyanqanta cumpleqkunapaq, ¿imatataq Bibliachö nin?
Änikunqëkikunata cumplirqa bendicionkunatam chaskinki (9:09)
Pagakunqantsik qellëta autoridäkuna mana allikunachö gastayaptimpis, ¿impuestukunata pagakunantsikku?
“¿Impuestukunata pagakunkimanku?” (Täpakoq, 1 de septiembri 2011)
Suwakoq y nunakunata engañakoq nuna cambiukunata ruranampaq ima yanapanqanta leyi.
“Jehoväqa kuyakoq y perdonakoq kanqantam yachakurqö” (Täpakoq, 1 de mäyu 2015)