Jehoväpa Testïgunkunata Pushaqkunapa cartan

‘Yachatsikoqnam kayankiman’ (Heb. 5:12). ¡Këman pensari! Ciëluchö y Patsachö kaqkunapita mas alli kaq yachatsikoq Jehovämi wakinkunata pëpita yachatsinantsikpaq mañamantsik. Familiantsikkunata, congregacionchö kaqkunata y wakinkunata Jehoväpita yachatsiqa, juk alläpa precisaq cargum. Tsëqa, ¿imatataq ruranantsik mas alli yachatsikoq kanapaq?

Apostol Pablu Timoteuman cartakurmi kënö escribirqan: “Creikoqkunapaq leyichö, wakinkunata atikar o willapar këchö y yachatsikïchö alliyänëkipaq kallpachakur sïgui”. Jina nirqanmi: “Tsëta rurarmi kikikita salvakunki y wiyashoqnikikunatapis salvanki” (1 Tim. 4:13, 16). Yachatsikunqantsikqa nunakunapa kawënintam salvan. Tsëmi, mas alli leyinapaq y alli yachatsikunapaq kallpachakunantsik. Y kë follëtuqa tsëpaqmi yanapashunki. Rikärishun imanö kanampaq kaqta.

Cada yachatsikïchömi, tsëpaq parlaq textukunata tarishun y imanö rurayanqankunatapis.

Jehovämi “Alli Yachatsishoqniki” (Is. 30:20). Kë follëtum yanapashunki mas alli leyinëkipaq y yachatsikunëkipaq. Peru ama qonqëtsu, llapan yachatsikunqantsikkunaqa Jehovä Diosnintsikpitam shamun y pëmi nunakunataqa apamun (Juan 6:44). Tsëmi kallpanwan yanapëkushunëkipaq imëpis mañakunëki. Palabran Bibliatam imëpis utilizänëki y Jehovä Diospitam masqa parlanëki. Y llapan shonqunkunawan Jehoväta kuyayänampaqmi yachatsikïta procuranëki.

Juk precisaq willakïta yachatsikunëkipaqmi Diosnintsikqa invitashurqunki, y tsëtaqa manam imëpis willakuyashqatsu. Y “Dios qokunqan kallpawan” yanapashunëkipaq kaqman confiakuptikiqa, llapampis allim yarqunqa (1 Pëd. 4:11).

Qamkunanö Diospita yachatsikoqkunam këta niriyaq:

Jehoväpa Testïgunkunata Pushaqkuna