16 KAQ YACHAKUNËKIPAQ
Patsachö këkar Jesus ruranqankuna
Jesuspaq nunakuna pensarqa llullu wamranölla kanqanta, alli nuna kanqanta y imanö wanunqanllatam yarpäyan. Peru Jesusta mas reqinapaqqa Patsachö këkar imakunata ruranqantam alli musyanantsik. Tsëmi këchöqa yachakunki Jesus imakunata ruranqanta y ruranqankunapita imata yachakunqantsikta.
1 KAQ: ¿Imata ruranampaqtan Jesusqa kallpachakurqan?
Jesusqa imëkapitapis masqa kallpachakurqan ‘Diospa Gobiernumpita alli noticiakunata’ nunakunata yachatsinampaqmi (leyi Lücas 4:43). Kima o kimsa watapitapis masmi Diospa Gobiernuna llapanta altsamunampaq kaqta y mana allikunata ushakätsinampaq kaqta yachatsikurqan (Mateu 9:35).
2 KAQ: ¿Imatataq Jesus rikätsikurqan milagrukunata ruranqanwan?
Bibliachöqa clärum willakun Diosnintsikpa poderninwan espantakuypaq milagrukunata Jesus ruranqanta (Hëchus 2:22). Jesusqa Diosnintsikpa poderninwanmi qochachö alläpa vientur qallëkuptin päratsirqan, mëtsika nunakunatam mikuyninkuna qararqan, qeshyëkaqkunatam jampirqan y wanushqakunatam kawaritsirqan (Mateu 8:23-27; 14:15-21; Marcus 6:56; Lücas 7:11-17). Milagrukunata Jesus ruranqanqa clärum rikätsikurqan Dios mandamushqa kanqanta. Y rikätsikurqanmi Jehoväqa poderninwan problëmantsikkunata altsamuyta puëdinqanta.
3 KAQ: Jesuspitaqa, ¿imatataq yachakuntsik?
Jesusqa Teytan Jehovätam imëpis cäsukurqan (leyi Juan 8:29). Wakinkuna michäkuykäyaptin y fäcil mana kaptimpis Jesusqa wanunqanyaqmi Teytan Jehoväta cäsukurqan. Tsënöpam rikätsikurqan imëka mana allikunapa pasëkarpis Diosnintsikta cäsukuyta puëdinqantsikta. Jesusqa llapan ruranqankunawanmi sirweqninkunata yachatsirqan pë ruranqannölla rurayänampaq (1 Pëdru 2:21).
MASLLA YACHAKUSHUN
Jesus yachatsikunqankunata y milagrukunata ruranqampitam yachakushun.
4 KAQ: Jesusqa Diospita alli noticiakunatam willakurqan
Jesusqa më tsë markakunapam ëwarqan Diospa Gobiernumpita alli noticiakunata pïmëta yachatsinampaq. Leyiyë Lücas 8:1 ima ninqanta y këkunapaq parlayë:
¿Jesusqa pëman witeqkunallataku Diospita yachatsirqan?
¿Imatataq Jesusqa rurarqan pïmëta yachatsinampaq?
Diosnintsikqa unëpitanam willakushqa karqan Akrashqan kaqqa alli noticiakunata willakunampaq kaqta. Leyiyë Isaïas 61:1, 2 ima ninqanta y këkunapaq parlayë:
Këchö willakunqantaqa, ¿imanötan Jesus cumplirqan?
¿Kanan witsan nunakunapis Diospita alli noticiakunata wiyëta necesitäyanku?
5 KAQ: Jesusqa alli consëjukunatam yachatsikurqan
Jesusqa manam Diospa Gobiernunllapitatsu yachatsikurqan, sinöqa nunakuna shumaq kawakuyänampaq consëjukunatapis yachatsikurqanmi. Jesus imakunata yachatsikunqanta rikärishun. Leyiyë Mateu 6:14, 34 y 7:12 ima ninqanta y këkunapaq parlayë:
¿Ima consëjukunatataq Jesus yachatsikurqan?
¿Kë consëjukunaqa kanan witsampis yanapakuntsuraq?
6 KAQ: Jesusqa imëka milagrukunatam rurarqan
Jehoväpa poderninwanmi Jesusqa milagrukunata rurarqan. Leyiyë Marcus 5:25-34 ima ninqanta o VIDEUTA rikäyë y këkunapaq parlayë:
Kë videuchö rikanqantsik warmiqa, ¿imatataq alli musyarqan?
Tsë milagrupitaqa, ¿imatan mas gustashunki?
Leyiyë Juan 5:36 ima ninqanta y këpaq parlayë:
Milagrukunata Jesus ruranqanqa, ¿imatataq rikätsikun?
¿Musyarqëkiku?
Jesuspitaqa Mateu, Marcus, Lücas y Juan librukunachömi willakun. Kë chuskun librukunata qellqaqkunam cada ünu willakuyan Jesusta reqiyanqanta. Pëkuna willakuyanqanmi yanapamantsik Patsachö këkar Jesus imakunata ruranqanta alli musyanapaq.
MATEU
Mateuqa Jesus yachatsikunqankunatam qellqarqan, peru masqa Diospa Gobiernumpita willakunqantam.
MARCUS
Marcusqa wallkallata qellqashqa karpis, Jesus ruranqankunatam kushishqa y shumaq willakun.
LÜCAS
Lücasqa willakun Diosnintsikman imëpis mañakunantsikpaq kaqta y warmikunata Jesus shumaq tratanqantam.
JUAN
Juanqa willakun Jesus imanö nuna kanqantam. Tsëtaqa rikätsikun amïgunkunawan y juk nunakunawampis Jesus imanö parlanqanta qellqanqanchömi.
WAKIN IMA NIYANQAN: “Jesusqa juk alli nunallam karqan”.
Qamqa, ¿ima ninkitan?
KËTAM YACHAKURQUNKI
Jesusqa Diospa Gobiernumpitam yachatsikurqan, milagrukunatam rurarqan y Jehovätam imëpis cäsukurqan.
¿Yarpankiku?
¿Jesusqa imata ruranampaqtan masqa kallpachakurqan?
Milagrukunata Jesus ruranqanqa, ¿imatataq rikätsikurqan?
¿Ima consëjukunatataq Jesusqa yachatsikurqan?
MASTA YACHAKUY
¿Jesusqa imapitataq nunakunata masqa yachatsirqan?
“¿Imanirtaq Jesuspaqqa alläpa precisan Diospa Gobiernun?” (Täpakoq, 1 de noviembri 2014)
Milagrukunata Jesus ruranqan rasumpa kanqanta yachakuy.
“¿Imatataq yachakuntsik milagrukunata Jesus ruranqampita?” (Täpakoq, 15 de juliu 2004)
Jesuspita yachakunqan juk nunata imanö yanapanqanta leyï.
“Kawënïchö mas precisaqqa noqam karqä” (Täpakoq, 1 de noviembri 2014)
Patsachö këkar Jesus imakunapa pasanqanta o ruranqanta musyanëkipaq leyï.
Jesus Patsachö kawanqan witsan (Mushoq Patsachö Kawaqkunapaq Biblia, Masllata musyanapaq A7)
a Diospa Gobiernumpitaqa mas yachakunki 31 a 33 yachakunëkipaq kaqchömi.