Congregacionchö cristiänukunaqa, ¿imanötaq kuyakoq y alli kanqantsikta rikätsikushwan? (Rakishqa yachatsikïkunapita ishkë kaq)

1. ¿Imapitataq següru këkantsik?

SIRWEQNINKUNATAQA Jehoväqa alläpam kuyan y imëpis kuyëkanqallam, jinamampis alli kaq rurëtam alläpa kuyan (Sal. 33:5). Tsëmi següru këkantsik sirweqninkunata mana allita rurarnin sufritsiyaptin alläpa llakikunqanta, jina pëkunapaqmi justiciata ruranqa. Kë rakishqa yachatsikïkunapa punta kaq yachatsikïninchömi rikarquntsik,b Jehoväqa israelïtakunata kuyarnin Moiseswan Leykunata escribitsishqa kanqanta. Jina yachakurqantsikmi llapantapis alli y justiciawan tratayänampaq tsë Ley yanapakushqa kanqanta, y masqa pïnimpis mana yanapanampaq kaqkunata alli tratayänampaqmi yachakurqantsik (Deut. 10:18). Tsë Leykunam rikätsimantsik sirweqninkunapaq Jehovä alläpa yarpachakunqanta.

2. ¿Ima tapukïkunatataq contestashun?

² Moises escribinqan leykunaqa 33 watayaqllam välinan karqan, porqui tsë watachömi punta congregacion patsakarqan. Tsëqa, ¿mananatsuraq punta cristiänukunapaqqa kanmannatsu karqan kuyanakuyänampaq y alli kaqta rurayänampaq yanapakoq ley? Manam. Porqui cristiänukunapaqqa juk mushoq leynam karqan. Kë yachatsikïchömi yachakushun tsë mushoq ley ima kanqanta y tsëpitanam kë tapukïkunata contestashun: ¿Imanirtaq Diosqa kuyamarnintsik tsë mushoq leyta escribitsirqan? ¿Imanirtaq alli kaq rurë kanampaq yanapakunqanta nintsik? Y kë mushoq leywanqa, ¿imanötaq carguyoq kaqkunaqa wakinkunata tratayanman?

¿IMATAQ CRISTUPA LEYNIN?

3. Gälatas 6:2 textu ninqannö, ¿ima mastaq Cristupa leyninchöqa këkan?

³ (Leyi Gälatas 6:2). Kananqa Diospa sirweqninkunaqa Cristupa leynintanam cäsukuntsik. Jesusqa manam imata rurayänampaq y imata mana rurayänampaq juk listamantsu leykunata churarqan, tsëpa rantinqa imata rurayänampaq kaqtam yachatsirqan y consëjukunatam qorqan. Jina Cristupa leyninchöqa Jesus yachatsikunqankunam këkan. Tsë leyta maslla entiendinapaqmi qateqnin kaq pärrafukunachö yachakushun.

4, 5. (1) ¿Imanötaq Jesusqa yachatsikurqan? (2) ¿Imëtaq yachatsikurqan?

⁴ Ninqankunawanmi Jesusqa nunakunata yachatsirqan. Y tsë yachatsikunqankunaqa alläpa valoryoqmi kayan. Porqui Diospita rasumpa kaqta, imapaq Dios kamamashqantsik kanqanta y Diospa Gobiernunlla llapan sufrimientuntsikkunata ushakätsinampaq kaqtam yachatsikurqan (Lüc. 24:19). Jina Jesusqa rurëninkunawan y imanö kawanqanwanmi discïpulunkunata yachatsirqan (Juan 13:15).

⁵ ¿Imëtaq Jesusqa yachatsikurqan? Kë Patsachö këkarninmi Diospita yachatsikurqan (Mat. 4:23). Jina kawariramurpis discïpulunkunata yachatsirqanmi. Tsëqa karqan quinientuspitapis mas ellurëkäyaptin o juntarëkäyaptin yuripunqanchömi, y pëkunatam mandarqan qateqninkuna tikrayänampaq nunakunata yachatsiyänampaq (Mat. 28:19, 20; 1 Cor. 15:6). Jina ciëluta kutirirnimpis congregacionta dirigeq karninmi, qateqninkunata yachatsirnin sïguikarqan. Tsëmi 96 wata witsanchö Jesusqa, ciëlupaq akrashqa cristiänukunata apostol Juanwan consejar yanaparqan (Col. 1:18; Rev. 1:1).

6, 7. (1) ¿Jesus yachatsikunqantaqa mëchötaq tarishun? (2) Cristupa leyninta cäsukunapaqqa, ¿imatataq ruranantsik?

⁶ ¿Jesus yachatsikunqantaqa mëchötaq tarishwan? Mateu, Marcus, Lücas y Juan escribiyanqan librukunachömi. Tsë librukunachömi kë patsachö këkar Jesus imata ninqankuna y ruranqankuna këkan. Jina Hëchus librupita Revelacion libruyaq escribirëkaqkunapis Jesus imanö kanqanta mas yachakunapaqmi yanapamantsik. Porqui tsë librukunata escribiyänampaqqa Diospa santu espïritunmi yanaparqan y ‘Cristu pensanqannöllam pensayarqan’ (1 Cor. 2:16).

⁷ ¿Imatataq yachakuntsik? Jesus yachatsikunqanqa llapan kawënintsikchömi yanapamantsik. Tsëmi Cristupa leyninqa yanapamantsik wayintsikchö, trabäjuntsikchö, escuëlachö y congregacionchö këkar imanö portakunapaq kaqta. Jina Cristupa leynimpitaqa mas yachakuntsik Diospa palabran Mateupita hasta Revelacionyaq leyirnin y leyinqantsikman pensarninmi. Jina cäsukunqantsiktaqa rikätsikuntsik tsëchö mandätukunata y consëjukunata cäsukurninmi. Cristupa leyninta cäsukurninqa kikin Jehovä Diosnintsiktam cäsukïkantsik, porqui Jesus yachatsikunqanqa llapampis Diospitam shamun (Juan 8:28).

KUYAKOQ KARMI CRISTUPA LEYNINTA JEHOVÄQA PATSÄTSIRQAN

8. ¿Imanirtaq Cristupa leyninqa wakin leypitapis mas alli kanqanta nintsik?

⁸ Juk alli rurashqa y alli simientuyoq wayichö täraqkunaqa segürum sientikuyan. Tsënöllam alli patsätsishqa simientuyoq leyta cäsukoqkunapis següru sientikuyan. Porqui nunakunata kuyarninmi Jehoväqa tsë leyta patsätsishqa. Tsëmi Cristupa leyninqa mas alli patsätsishqa ley. ¿Imanötaq tsëta musyantsik?

9, 10. (1) ¿Imakunatataq Jesusqa kuyakoq karnin rurarqan? (2) ¿Imatataq Jesuspita yachakuntsik?

⁹ Punta kaq. Jesusqa kuyakoq karninmi imëkatapis rurarqan. Nunakunata ankuparninmi Diospita yachatsikurqan, qeshyëkaqkunata kachakätsirqan, mëtsikaqta mikïnin qararqan y wanushqakunata kawaritsirqan. Tsëkunata ruranqankunachömi kuyakoq kanqanta rikätsikurqan (Mat. 14:14; 15:32-38; Mar. 6:34; Lüc. 7:11-15). Tsëkunata ruranampaqqa Jesusqa llapan tiempuntam utilizaq y höraqa utishqam sientikoq. Peru tsënö këkarpis, kushishqam wakinkunata yanapaq. Y kuyakoq kanqantaqa masqa rikätsikurqan nunakunata salvananrëkur wanurninmi (Juan 15:13).

¹⁰ ¿Imatataq yachakuntsik? Jesusnömi noqantsikpis wakinkunata yanapanantsik. Jinamampis Diospita yachatsinqantsik nunakunatam llakipänantsik. Y nunakunata kuyarnin Diospa gobiernumpita yachatsirninqa, Cristupa leynintam cäsukïkantsik.

11, 12. (1) ¿Imanötaq musyantsik Jehovä alläpa kuyamanqantsikta? (2) ¿Imatataq Jehoväpita yachakuntsik?

¹¹ Ishkë kaq. Teytan kuyakoq kanqantam Jesusqa musyatsikurqan. Yachatsikur purinqan tiempuchöqa Jesusqa rikätsikurqan sirweqninkunata Jehovä alläpa kuyanqantam (Mat. 10:31). Jinamampis congregacionpita rakikashqakuna arrepentikurnin kutiyänanta shuyaranqantam musyatsikurqan (Lüc. 15:7, 10). Jina Jesusqa nirqanmi noqantsikrëkur japallan Tsurin wanunanta permitirnin Diosqa kuyamanqantsikta rikätsikunqanta (Juan 3:16).

¹² ¿Imatataq yachakuntsik? Jehovänömi kuyakoq kanantsik (Efes. 5:1, 2). Kuyakoq kanqantsiktaqa rikätsikuntsik, wawqintsikkunata y panintsikkunata alläpa väleqtanö rikarninmi. Y congregacionman kutimoqkunata kushishqa chaskirninmi (Sal. 119:176). Jinamampis wawqintsikkunata y panintsikkunata kuyanqantsiktaqa rikätsikuntsik, wanayanqankunachö yanaparninmi (1 Juan 3:17). Tsënö kuyakïwan wakinkunata tratarninmi Cristupa leyninta cäsukuntsik.

13, 14. (1) Juan 13:34 y 35 textuchöqa, ¿imatataq Jesus mandakurqan y tsëqa imanirtaq juk mushoq mandaki karqan? (2) ¿Imakunata rurartaq tsë mushoq mandamientuta cäsukuntsik?

¹³ Kima kaq. Jesusqa qateqninkunatam mandarqan pëkunata kuyanqannölla kuyanakuyänampaq (Leyi Juan 13:34, 35). Kë mandakïqa mushoq mandakïmi, porqui israelïtakunata Dios qonqan Leychöqa manam karqantsu. Jesusqa, cristiänu mayintsikkunata pë kuyamanqantsiknölla kuyanapaq kaqtam nirqan. ¿Imanö? Cristiänu mayintsikkunarëkurqa hasta wanurinantsikmi. Tsëpaqqa kikintsikpitapis masmi, wakinkunapa bienninta ashinantsik.

¹⁴ ¿Imatataq yachakuntsik? Tsë mushoq mandamientutaqa cäsukuntsik, cristiänu mayintsikkunapaq imëkata rurarninmi. Y manam pëkunarëkur wanunallapaqtsu listu këkänantsik, sinöqa hasta ichik rurëkunachö yanaparinapaqmi. ¿Manatsuraq juk edäna wawqintsikta reunionman apanapaq wayimpa pasarishwan? ¿Manatsuraq rurëta munanqantsikkunata jaqirishwan cristiänu mayintsikkunarëkur? O ¿manatsuraq desgraciakunapa pasashqa wawqikunata vacacionnintsikchö yanaparishwan? Tsëkunata rurarnimpis Cristupa leynintam cäsukïkantsik, y congregacionchö llapampis següru sientikuyänampaqmi yanapakuntsik.

ALLI KAQTA RURANAPAQ YANAPAKOQ LEY

15-17. (1) ¿Imanötaq Jesusqa alli kaqta ruraq kanqanta rikätsikurqan? (2) ¿Imanötaq Jesus ruranqannölla rurashwan?

¹⁵ Bibliachö justiciapaq parlarqa, ima alli kanqanta Dios patsätsinqanta rurëpaqmi parlëkan. Tsëmi llapantapis igualpa tratanantsik. Y ¿imanirtaq nintsik Cristupa leyninqa alli kaqta ruranapaq yanapakunqanta? Rikärishun.

¹⁶ Puntataqa rikärishun kë patsachö Jesus kanqan witsan, alli kaqta ruraq kanqanta imanö rikätsikunqanta. Tsë witsanchö pushakoq religiösukunaqa alläpam chikiyaq juk nacionpita nunakunataqa, jina waktsakunatam despreciayaq y warmikunatapis manam respetayaqtsu. Peru Jesusqa llapankunatam shumaq y kuyëpa tratarqan. Y manam pëman creikoq juk nacionpita nunakunataqa despreciarqantsu (Mat. 8:5-10, 13). Rïcutapis y waktsatapis llapantam Diospita yachatsirqan (Mat. 11:5; Lüc. 19:2, 9). Warmikunatapis mana allipaqa manam tratarqantsu, sinöqa kuyëpa y respëtuwanmi llapanta tratarqan (Lüc. 7:37-39, 44-50).

¹⁷ ¿Imatataq yachakuntsik? Jesusnömi më nacionpita kayaptin o ima religionpita kayaptimpis llapan nunakunata Diospita yachatsinantsik. Y ollqu kaq cristiänukunanam warmikunata respëtuwan tratayänan. Tsënö rurarqa Cristupa leynintam cäsukïkäyan.

18, 19. ¿Imatataq Jesusqa alli kaq rurëpaq consejakurqan, y imatataq yachakuntsik?

¹⁸ Kananqa rikärishun alli kaq rurëpaq o justiciapaq Jesus imata ninqanta. Discïpulunkunatam consejarqan wakinkunata alli tratayänampaq. Por ejemplu kënömi nirqan: “Imanömi nunakuna tratayäshunëkita munayanki, tsënölla qamkunapis pëkunata tratayë” (Mat. 7:12). Llapantsikmi wakinkuna alli tratamänata munantsik, tsëmi noqantsikpis wakinkunata alli tratanantsik. Tsënö rurashqaqa noqantsiktapis allim tratamäshun. Peru mana kaqpita mana alli tratamashqaqa, ¿imataraq rurashwan? Jesusmi nirqan Jehoväman confiakunapaq, porqui pëllam ‘justiciata ruranqa paqasta junaqta pëman qayakoqkunapaq’ (Lüc. 18:6, 7). Këmi rikätsikun shamoq tiempuchö llapantsikpaq Dios justiciata ruramunampaq kaqta. Porqui musyanmi kë mana alli tiempuchö alläpa mana allikunapa pasanqantsikta (2 Tes. 1:6).

¹⁹ ¿Imatataq yachakuntsik? Jesus consejakunqanta cäsukurninqa, wakinkunatam alli tratashun. Y Satanaspa makinchö këkaq nunakuna mana kaqpita sufritsimashqaqa Jehovämi shamoq tiempuchö justiciata ruramunqa. Tsëmi alläpa shoqamantsik.

¿IMANÖTAQ CARGUYOQKUNAQA WAKINKUNATA TRATAYANMAN?

20, 21. (1) ¿Imanötaq carguyoqkunaqa wakinkunata tratayanman? (2) ¿Imanötaq casädu ollqukunaqa warminkunata kuyayanqanta rikätsikuyanman? (3) ¿Imanötaq teytakuna wamrankunata tratayanman?

²⁰ Yachakunqantsiknöpis Cristupa leyninqa rikätsikun Jehovä alläpa kuyakoq kanqantam. Tsëmi carguyoq kaqkunaqa kuyakïwan y respëtuwan wakinkunata tratayänan. Jinamampis yarpäyänanmi llapan rurayanqanchö kuyakoq kayänanta, porqui tsëtam Jesusqa munan.

²¹ Familiachö. Ollqu kaqkunaqa warminkunatam kuyayänan. ¿Imanö? ‘Creikoqkunata Cristu kuyanqannömi’ (Efes. 5:25, 28, 29). Jina Jesusnölla kuyakoq kayanqantaqa rikätsikuyan kikinkunapitapis mas, warminkunapa bienninta ashirnin y gustunkunata puntaman churarninmi. Peru wakin nunakunapaqqa manam fäciltsu tsënö kuyakoq këqa, porqui itsa mana kuyakoq o mana alli tratakoq familiachö winayashqa. Peru Cristupa leyninta cäsukïta munarqa, cambiayänanmi y unë costumbrinkunatam jaqiyänan. Warminkunata kuyëpa trataq nunakunataqa warminkunapis respetayanmi. Y wamrankunata kuyaq teytakunaqa, manam mana allita rurayanqatsu ni mana allipa tratayanqatsu (Efes. 4:31). Tsëpa rantinqa shumaq y kuyëpam tratayan, tsëmi yanapan wamrankuna kushishqa y següru sientikuyänampaq. Jinamampis wamrankunaqa imëpis kuyayanqa y respetayanqam.

22. 1 Pëdru 5:1-3 textu ninqannö, ¿congregacionchö üsha cuenta cristiänukunaqa pipataq kayan y imanötaq anciänukuna tratayänan?

²² Congregacionchö. Anciänukunaqa yarpäyänanmi cristiänu mayinkunaqa Diospa üshankuna kayanqanta (Juan 10:16; leyi 1 Pëdru 5:1-3). Bibliachö “Diospa üshankuna” y “Diospa herencian kaqkuna” nirqa, Jehoväpaq kayanqantam anciänukunata yarpatsin. Y pëqa munan üshankunata kuyëpa y alli tratayänantam (1 Tes. 2:7, 8). Jehovä munanqannö üshankunata anciänukuna shumaq tratayaptinqa, alläpam kushikun. Jina cristiänu mayinkunapis anciänukunataqa kuyayanqa y respëtuwanmi rikäyanqa.

23, 24. (1) Congregacionchö juk cristiänu jutsallakuptinqa, ¿imatataq anciänukuna rurayanman? (2) Tsë cäsukunachöqa, ¿imatataq anciänukuna cuentachö katsiyänan?

²³ Moises escribinqan Leychöqa, Juezkuna y anciänukunaqa Diospa kaqchö israelïtakuna imanö këkäyanqanta y juk cäsukunatapis rikäyaqmi. Peru kananqa Cristupa leyninchö këkaq anciänukunaqa Diospa kaqchö imanö kayanqanllatam rikäyan. Tsëmi congregacionchö juk cristiänu jutsata rurariptinqa tsë asuntuta pëkuna rikäyan, peru juk delïtu kaptinqa manam rikäyantsu. Porqui pëkunaqa musyayanmi tsë asuntukunata autoridäkuna rikäyänampaq Dios permitinqanta. Tsëmi culpayoq nunataqa autoridäkuna multëta y carcelman apëta puëdiyan (Rom. 13:1-4).

²⁴ Juk cristiänu jutsata ruraptinqa anciänukunaqa Bibliatam utilizäyan tsë asuntuta imanö rikäyänampaq y imatapis decidiyänampaq. Y cuentachömi katsiyan kuyamarnintsik Cristupa leyninta Diosnintsik patsätsimunqanta. Jina kuyakoq kayanqanmi anciänukunataqa yanapanqa pipis jutsallakuriptin tsë asuntuta imanö rikäyänampaq kaqta. Jinamampis kuyakoq kayanqanqa rasumpa arrepentikushqa kaqkunata Dioswan yapë amïgu kayänampaqmi yanapanqa.

25. ¿Imatataq qateqnin kaq yachatsikïchö yachakushun?

²⁵ Alläpam agradecikuntsik Cristupa leyninta cäsukunqantsikpita. Porqui tsë leyta llapantsik cäsukurninqa congregacionchö cristiänu mayintsikkuna kuyashqa, valorashqa y següru sientikuyänampaqmi yanapakuntsik. Peru kanan witsanqa “mana allipita mas mana alliman” tikrakïkaq nunakunapa tiempunchömi kawantsik (2 Tim. 3:13). Tsëmi mäkoq mäkoqlla këkänantsik. ¿Imanötaq congregacionchöqa llapantsikpis rikashwan wamrakunata violayanqan delïtukunata? Qateqnin kaq yachatsikïchömi tsëpita yachakushun.