28 KAQ YACHAKUNËKIPAQ
Salvakunëkipaq Jesus wanunanta Jehovä permitinqanta agradecikuy
Juk amïguntsik imatapis qarëkamashqaqa alläpam kushikuntsik y agradecikuntsikmi. Salvamänapaq Jesus wanunqanqa alläpa alli y väleq qarëmi. Këchömi yachakunki salvamänapaq Jesus wanunqanta imanö agradecikunëkipaq kaqta.
1 KAQ: ¿Imanötan agradecikushwan salvamänapaq Jesus wanunqanta?
Bibliachömi nin Jesusman “markäkoqkuna o yärakoqkuna” imëyaqpis kawakuyänampaq kaqta (Juan 3:16). Jesusman markäkunqantsik o yärakunqantsikqa imatapis imanö decidinqantsikchö y ruranqantsikchömi rikakun (Santiägu 2:17). Ruranqantsikkunachö y parlanqantsikchö markäkunqantsikta rikätsikurqa Jehoväwan y Jesuswanmi mas amïgu kashun (leyi Juan 14:21).
2 KAQ: ¿Masqa imë junaqtan Jesus wanunqanta agradecikunqantsikta rikätsikushwan?
Wanutsiyänampaq tsariyänan paqasmi Jesusqa apostolninkunawan juntakëkur tanta mikuyarqan y vïnuta upuyarqan. Tsëpaqmi Bibliachöqa ‘Señorpa Cënan’ nin, y tsë kutichömi Jesusqa apostolninkunata nirqan wanunqanta yarpäyänampaq. Tsëmi tsë reuniontaqa Jesus wanunqanta yarpäna reunion nirpis reqintsik (1 Corintius 11:20). Jesusman markäkoqkunaqa o yärakoqkunaqa, Jesuspa apostolninkunanömi wanunqanta cada wata yarpäyan. Jesusmi nirqan: “Noqata yarpäyämarnï këta rurar sïguiyë” (Lücas 22:19). Jesus wanunqanta yarpäna reunionman ëwarmi salvamänapaq Jesus wanunqanta agradecikuntsik.
MASLLA YACHAKUSHUN
Jehoväwan Jesus kuyamanqantsikta imanö agradecikunapaq kaqta y Jesus wanunqanta yarpäna reunionman imanir ëwanapaq kaqtam yachakushun.
3 KAQ: ¿Imanötan agradecikoq kanqantsikta rikätsikushwan?
Mayuchö o lamarchö wanunëkipaqna këkaptiki pipis salvashuptikiqa, ¿salvashunqëkita qonqëkunkimantsuraq? ¿Manatsuraq agradecikunkiman?
Jehoväqa salvamänapaqmi Jesus wanunanta permitirqan. Leyiyë 1 Juan 4:8-10 ima ninqanta y këkunapaq parlayë:
¿Imanirtan Jesus wanunqanta alläpa agradecikunantsik?
¿Ima ninkitan salvamänarëkur Jesus wanunanta Jehovä permitinqampaq?
Salvamänapaq Jesus wanunqanta, ¿imanötan agradecikushwan? Leyiyë 2 Corintius 5:15 y 1 Juan 4:11 y 5:3 ima ninqanta y cada versïculuta leyirir këpaq parlayë:
Salvamänapaq Jesus wanunqantaqa, ¿imanötan agradecikushwan?
4 KAQ: Jesus ruranqannölla imëkatapis ruranapaq kallpachakushun
Jesus kawanqannö kawar y ruranqannö imëkatapis rurarmi agradecikoq kanqantsikta rikätsikuntsik. Leyiyë 1 Pëdru 2:21 ima ninqanta y këpaq parlayë:
¿Imanötan Jesus ruranqannölla qampis rurankiman?
Jesusqa kuyarmi Diospa Palabranta leyeq, Diospa Gobiernumpitam alli noticiakunata willakoq y nunakunatam yanapaq.
5 KAQ: Jesus wanunqanta yarpäna reunionmanmi ëwanantsik
Señorpa Cënanqa, ¿imanötan karqan? Leyiyë Lücas 22:14, 19, 20 ima ninqanta y këkunapaq parlayë:
Señorpa Cënanchöqa, ¿imatataq rurayarqan?
Tantapaq y vïnupaqqa, ¿imatataq Jesus nirqan? (Rikäyë 19 y 20 kaq versïculukunata).
Wanunqanta watachö juk kutilla yarpäyänampaqmi Jesusqa discïpulunkunata nirqan. Tsëmi Jehoväpa testïgunkunaqa Jesus wanunqanta yarpäyänäpaq cada wata juntakäyä. Jesus wanunqanta yarpäna reunion imanö kanqanta musyanëkipaq VIDEUTA rikäyë y këpaq parlayë:
Jesus wanunqanta yarpäna reunionchöqa, ¿imatataq rurayan?
Tantaqa manam Jesuspa rasumpa ëtsantsu, sinöqa jutsannaq cuerpun cuentam. Vïnupis manam Jesuspa rasumpa yawarnintsu, sinöqa jutsantsikrëkur ramanqan o jichanqan yawarnin cuentam.
WAKIN IMA NIYANQAN: “Jesusman creikurqa imanö kawakurpis salvakushaqmi”.
Tsënö niyäshuptikiqa, ¿imanöraq Juan 3:16 y Santiägu 2:17 ninqankunawan imata rurayänampaq kaqta yachatsinkiman?
KËTAM YACHAKURQUNKI
Salvamänapaq Jesus wanunqantaqa agradecikuntsik pëman markäkur o yärakur, y wanunqanta yarpänapaq reunionman ëwarmi.
¿Yarpankiku?
¿Imanötan rikätsikuntsik Jesusman markäkunqantsikta o yärakunqantsikta?
Salvamänapaq Jesus wanunanta agradecikurqa, ¿imataraq rurankiman?
Jesus wanunqanta yarpänapaq reunionmanqa, ¿imanirtan ëwanëki?
MASTA YACHAKUY
Jesus wanunqan imata ruranapaq yanapamanqantsikta rikë.
Jehoväman markäkunqëkita o yärakunqëkita imanö rikätsikunëkipaq kaqta yachakuy.
“Jehovä änikunqankunaman markäkunqantsikta rikätsikushun” (Täpakoq, octubri 2016)
Jesus imanir wanunqanta entiendinqan juk warmita imanö yanapanqanta musyanëkipaq, “Kananqa Diospa rikëninchö limpiuna sientikurmi kushishqa y yamë kawakü” neqta leyi.
“Bibliam yanapashqa jukläyana kawakuyänampaq” (Täpakoq, 1 de agostu 2011)
Jesus wanunqanta yarpäna reunionchö imanir wallkaqlla tantata mikuyanqanta y vïnuta upuyanqanta musyanëkipaq leyi.