Teyta Dios kuyamänapaq cäsukushun

1, 2. ¿Imatatan ruranantsik Diospa kuyakuyninchö kanapaq?

ALLI SALORYOQ këta munarqa allim mikunantsik, purinantsikmi y mana qeshyanapaqmi cuidakunantsik. Tsënö kaptimpis, manam alli saloryoq kanallapaqtsu imëkata ruranantsik.

² Teytantsik Jehoväta reqinapaq imëkatana rurashqa karpis, munanqannö kawakunapaqqa kallpachakunantsikran. “Diospa kuyakïninchö” kanapaqqa, ¿imatatan ruranantsik? Jesuspa qateqnin Jüdasmi, “creikïnikikunachö alleq patsakar sinchiyäyë” nirqan (Jüdas 20, 21). Tsëqa, ¿imatatan ruranantsik creikuynintsik sinchi kanampaq?

MARKÄKÏNINTSIK O YÄRAKUYNINTSIK MAS WINATSUN

3-5. (1) Teyta Diospa mandakuyninta ¿imanö rikänëkitatan Satanas munan? (2) ¿Imapaqtan Diosnintsikqa leykunata y yachatsikuykunata qellqatsimushqa?

³ Teytantsik Jehoväta cäsukuy mas alli kanqantam rikätsikunantsik. Satanasqa nin, Jehovä Diosnintsikta cäsukur kawakuyta mana puëdinapaq kaqta y alli kaqta y mana alli kaqta kikintsik akrakur mas kushishqa kawakunapaq kaqtam. Tsëtaqa rurëkan, nunakunata Diosnintsik kamanqampitam (Genesis 3:1-6).

⁴ ¿Satanas ninqannöku Jehovä Diosnintsikpa mandakuyninta cäsukuyta puëdintsiktsu? Manam Satanas ninqannötsu. Jirkapa purikar juk jatun perqata rikanqëkiman yarpäri. Tsë höraqa, “¿imapaqtan kë perqata këchö rurayashqa?” ninkimanchi. Y juk waqrakoq töru waqaramoqta wiyarqa, ¿ima ninkimanraq tsë perqapaq? “Kë perqa mana kaptinqa, tsë töruqa wanuratsimanmanchi. Allim kë perqata rurayashqa” nirchi kushishqa kankiman. Jehovä Diosnintsik mandamanqantsikqa tsë perqanömi y Satanasqa tsë waqrakoq törunömi. Bibliachömi kënö nin: “¡Alli juiciuyoq imëpis këkäyë! ¡Mäkoq mäkoqlla këkäyë! Chikiyäshoqniki Diabluqa qapareq qayareq leonnömi purikan, pitapis tragakurkïta tïrar” (1 Pëdru 5:8).

⁵ Teytantsik Jehoväqa alli y kushishqa kawakunantam munan. Tsëmi Diablu mana engañamänapaq Palabran Bibliaman leykunata y yachatsikuykunata qellqatsimushqa (Efesius 6:11). Santiägu 1:25 nin: “Chipyëpa alli leyta alleq rikaq, y imëpis tsënö rurar sïgueqqa, [...] tsëta ruranqampitam kushishqa kanqa”.

6. ¿Imanirtan nintsik Jehoväta cäsukuy mas alli kanqanta?

⁶ Teyta Jehoväta cäsukurqa mas allim kawakushun y pëpis kuyamäshunmi. Diosnintsikman mañakunqantsikqa imëkachömi yanapamantsik (Mateu 6:5-8; 1 Tesalonicensis 5:17). Reunionkunaman ëwar, juknintsik juknintsik yanapanakur y nunakunata Diospa sirweqnin kayänampaq yachatsirqa kushishqam kantsik (Mateu 28:19, 20; Gälatas 6:2; Hebrëus 10:24, 25). Këkunata ruranqantsikmi markäkuynintsik mas winanampaq y Teytantsik Jehoväta cäsukuy mas alli kanqanta rikänapaq yanapamantsik.

7, 8. ¿Imanirtan shamoq tiempupaq yarpachakunantsiktsu?

⁷ Shamoq tiempuchö imëka mana allikunapa pasanapaq kaqman yarpararninqa, Teytantsik Jehovä nimanqantsikta ama qonqashuntsu: “Noqam Teyta Diosnikikuna këkä. Noqam alli kaqkunata yachatsikur munashqänö kawayänëkipaq alli nänipa pushayaq. Mandamientükunata wiyakurqa yamëmi kawayankiman karqan. Alli kawayashqëkiqa mayu mana tsakir ëwaqnömi kanman karqan. Lamar laqchiqsar qatinallaman ëwaqnömi allillata imëpis rurayankiman” (Isaïas 48:17, 18).

⁸ Imanömi mayu tsakintsu y imëpis ëwëkanlla, tsënöllam yamë kawakuynintsik kanqa. Y imanömi lamarqa imëpis laqcheqsëkanlla, tsënöllam alli rurënintsikpis ushakanqatsu. Imëkapa pasarpis, Jehovä Diosnintsikta sirwitaqa puëdishunmi. Bibliachöqa nin: “Ima llakikïnikikunatapis Teyta Diospa makinchö jaqiriyë. Pëmi imachöpis yanapayäshunki. Cäsuqninkunataqa manam imëpis jaqirinqatsu” (Salmus 55:22).

DIOSNINTSIK MUNANQANNÖ SIRWINAPAQ KALLPACHAKUSHUN

9, 10. ¿Imatatan ruran Diosta alli sirweq nunaqa?

⁹ Jehovä Diosta mas kuyanqëkimannömi, mas poqu sirweqnin kanki (Hebrëus 6:1). ¿Ima ninantan poqu këqa?

¹⁰ Juk poqu nunanö Diosta sirwinapaqqa, Teytantsik Jehovätam mas kuyanantsik y munanqannö kawanapaqmi kallpachakunantsik (Juan 4:23). Apostol Pablum nirqan: “Jutsasapa ëtsapa munëninmannö kawaqkunaqa, jutsasapa ëtsapa munëninmanmi yarparäkuyan, peru santu espïritu pushanqanmannö kawaqkunaqa, santu espïritupa kaqkunamanmi yarparäyan” (Romänus 8:5). Diosta alli sirweq nunaqa, manam munëninkunata rurëman y imëkayoq këllamantsu yarparäkun. Tsëpa rantinqa, Jehovä Diostam puntaman churan y allikunatam ruran (Proverbius 27:11; leyi Santiägu 1:2, 3). Y ima alli kanqanta musyarmi, mana allita ruratsita munayaptimpis rurantsu.

11, 12. (1) ¿Imapaqtan yanapakun ‘tantiakoq kënintsikqa’? (2) ¿Imatan yanapamantsik Diospa alli sirweqnin kanapaq? Willakaramuy.

¹¹ Diosnintsikta alli sirwinapaqqa kallpachakunantsikmi. Pablum kënö nirqan: “Chukru mikïqa poqushqa nunakunapaqmi, tantiyakoq këninkunata imëpis inshir alli yachatsishqata katsirnin, alli kaqta y mana alli kaqtapis cuentata qokïta yachaqkunapaq” (Hebrëus 5:14). Pelöta pukllaq nunapaq parlarishun.

¹² Juk nuna pelöta pukllëta alli yachanampaqqa, unëparan yachakunan y alliran kallpachakunan. Manam imatapis rurëta yachëkarnatsu yurintsik. Tsëraq yurishqa wamraqa, manam purita ni imatapis tsarëta yachantsu. Winanqanmannömi purita y imëkatapis tsarëta yachakun, hasta alli pukllaq këmampis chärin. Tsënöllam Diosnintsikpa alli sirweqnin kanapaqpis, unëparaq alli yachakunantsik.

13. ¿Imatan yanapamäshun Jehovänö yarpänapaq?

¹³ Kë libruchöqa yachakurquntsik, Teytantsik Jehovänö imatapis yarpëta, munanqannö imatapis rurëta, mandakuyninkunata kuyëta y cäsukuytam. Tsëmi imatapis manaraq rurar kënö tapukunantsik: “¿Imatan Diospa leyninkuna y yachatsikuyninkuna nin? ¿Imanötan tsëkunata cäsukunqäta rikätsiküman? ¿Imata ruranatatan Jehovä munan?” (leyi Proverbius 3:5, 6; Santiägu 1:5).

14. ¿Imatatan ruranantsik markäkïnintsik mas winanampaq?

¹⁴ Alli mikuyta mikunqantsikqa sänu kanapaqmi yanapamantsik, tsënöllam markäkïnintsik o yärakuynintsik mas winanampaqqa, Jehovä Diospita imëpis yachakuykänantsik. Bibliapita yachakur qallarqa Jehoväpita y mandakunqankunapitam yachakurqantsik. Tsënö kaptimpis, masran yachakunantsik. Apostol Pablum nirqan, “chukru mikïqa poqushqa” nunakunapaq kanqanta. Yachakunqantsikmannö rurarqa mas yachaqmi kashun. Bibliachöqa nin, “imëkatapis jaqirïkur yachëta” ashiqa mas alli kanqantam (Proverbius 4:5-7; 1 Pëdru 2:2).

15. ¿Imanirtan Jehoväta y wawqi panintsikkunata kuyanantsik?

¹⁵ Alli saloryoq karnimpis, mana qeshyanapaqqa cuidakunantsikmi. Tsënöllam Diospa alli sirweqnin karpis, cada junaq Jehoväta mas kuyanapaq kallpachakunantsik. Pablum kënö nirqan: “Kikikikuna pruëbaman churakurnin sïguiyë, tsënöpa cristiänu creikïchö këkäyanqëkita o mana këkäyanqëkita rikäyänëkipaq; kikikikuna imanö kayanqëkita rikätsikurnin sïguiyë” (2 Corintius 13:5). Teytantsik Jehoväta y wawqi panintsikkunata mas kuyanapaqqa kallpachakunantsikmi. Kuyakuypaq parlarmi Pablu kënö nirqan: “Sitsun jirkata kuyutsinäpaqnö markäkïnï sinchi kapaman, peru kuyakïnï kantsu, tsëqa manam ni imatsu kä” (1 Corintius 13:1-3).

DIOSNINTSIK ÄNIMANQANTSIKMAN YARPARÄSHUN

16. ¿Imatatan Satanas munan?

¹⁶ Teyta Dios munanqannö kawakuyta mana puëdinqantsikta y problëmantsik mana altsakänampaq kaqtam, Satanasqa creitsimënintsikta munan. Y wawqi panintsikkunawan kushishqa kawakunatapis manam munantsu (Efesius 2:2). Mana allikunaman yarpar y Teytantsik Jehovä mana kuyamanqantsikta yarpar llakishqalla kakunatam Satanasqa munan. Tsënö kaptimpis, Diosnintsik änikunqanman yarparanqantsikqa yanapakunmi.

17. ¿Imanötan Diosnintsik änikunqanman yarpëqa yanapamantsik?

¹⁷ Diosnintsik änimanqantsikqa, soldädukunapa cascunnö kanqantam 1 Tesalonicensis 5:8 nin. Bibliachöqa nimantsik, “salvacion shuyäkïta cascutanö” churakunapaqmi. Jehovä Dios änikunqan shumaq kawakuyman yarparanqantsikqa, mana allikunaman mana yarpänapaqmi yanapamantsik.

18, 19. ¿Imanötan Jesusta yanaparqan Teytan äninqan?

¹⁸ Wanutsiyanqan paqasmi, Jesusqa imëka mana allikunapa pasarqan. Juk amïgunmi rantikurqan, juknam mana reqinqanta nirqan y wakin amïgunkunanam dejarikur ewkuyarqan. Marka mayinkunam contran churakäyarqan y alläpa maqatsiyarqan. ¿Imatan Jesusta yanaparqan? Teytan äninqanman yarparanqanmi. Bibliachöqa kënömi nin: “Kushikïrëkurmi, sufritsikoq qeruchö wanïta aguantarqan, penqakïtapis mana kaqpaq churëkur, y Diospa gobernar täkunampa derëcha kaq lädunmanmi täkurishqa” (Hebrëus 12:2).

¹⁹ Teytan munanqannö rurëkanqanta musyar y Satanas ulikoq o llullakoq kanqanta musyarmi, Jesusqa mana allikunapa pasëkarpis kushishqa karqan. Y ¿imatan yanaparqan alli tsarakunampaq? Ciëluta kutirir Teytanwan juntu kayänampaq kaqman yarpanqanmi. Tsënöllam noqantsikpis alli tsarakushun, Diosnintsik änimanqantsikman imëpis yarparëkarqa.

20. ¿Imatatan ruranantsik Diosnintsik änikunqanman yarparänapaq?

²⁰ Teytantsik Jehoväqa rurëkanqëkita y alli tsarakunqëkita rikëkanmi (Isaïas 30:18; leyi Malaquïas 3:10). Pëqa shonquntsik munanqantam ruramunqa (Salmus 37:4). Jehovä Dios änikunqan mana cumplikänampaq kaqtam Satanasqa creitsikun. Satanas ninqankunaman yarparäkunëkipa rantinqa, Diosnintsik änikunqanman yarparanqëkim mas alliqa kanman. Tsë änikuyta rasumpatanö mana rikarqa, Teyta Jehoväman mañakuy. Filipensis 4:6, 7 kënö nimantsik: “Ama imapaqpis yarpachakur kayëtsu, sinöqa imëkachöpis mañakurnin y rogakurnin y jina agradecikurnin, yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa”.

21, 22. (1) ¿Imanötan Diosnintsik änikunqanta cumpliramuptin kawakushun? (2) ¿Imatatan rurëta munanki?

²¹ Diosnintsik änimanqantsik kawakuyman yarparäshun. Tsë witsanqa, llapantsikmi Jehovällatana sirwishun (Revelacion [Apocalipsis] 7:9, 14). ¿Imanöran kawakuynintsik kanqa? Cada junaqmi llapantsikpis kushishqa kawakushun. Kë Patsa shumaq kanampaqmi llapantsik yanapanakushun, mëtsikam mikunapaq kanqa y manam imatapis mantsashunnatsu. Manam kanannönatsu qeshyapäkushun ni wanushumpis y llapan nunakunam kuyakoq kayanqa. Tsë witsanqa Satanaswan demoniunkuna manam kayanqanatsu, y mana alli rurëkunapis manam kanqanatsu. Tsëpitanam, “Diospa tsurinkunapa” libri këninta llapantsikpis chaskishun (Romänus 8:21).

²² Teytantsik Jehoväqa munan llapan shonquykiwan kuyanëkitam. Tsëmi cada junaq cäsukunëkipaq y mas kuyanëkipaq kallpachakunëki. Teyta Dios kuyamänataqa llapantsikmi munantsik (Jüdas 21).