¿Imanöraq yanapashwan mana testigo kaq majata?
1. Huk cristiänopa majan mana Testigo kaptinqa, ¿majanllatsuraq puëden Testigo kanampaq yanapëta?
1 ¿Congregacionnikichö ëkaq wawqikunapa y panikunapa majankunataq Testïgotsu kayan? Pëkunaqa alläpachi munayan majankuna noqantsikwan junto Jehoväta serviyänanta. Pero rasumpëpaqa llapantsikmi munantsik Jehoväta serviyänanta. Tsënöllam ‘llapan nunacuna salbacuyänanta, y rasonpa caq yachatsiquicunata musyayänanta’ Diosnintsikpis munan (1 Tim. 2:4). ¿Huk cristiänopa mana Testigo majanta imanöraq yanapashwan?
2. ¿Imapaqtaq yanapamantsik mana Testigo kaq maja imanöpis pensanqanta musyë?
2 Imanöllapapis yanaparinapaqqa musyanantsikmi mana Testigo maja imanöpis pensanqanta. Wakin majakunaqa familianta kuyayanmi, alli qowa y alli teytam kayan, pero manam majankunapa creencianman creiyantsu. Wakinqa, manam allillaqa musyayantsu Testïgokuna imanö kayanqantapis, y wakintanam mana alli amïgonkuna llutanta willapäyan. Kananqa, Testïgona karnin Jehoväta servinampaq tiemponta rakiptinmi, wakinkunaqa manam allitanö rikäyan. Tsëkunata musyanqantsikmi yanapamäshun mana Testigo kaq majata shumaq y mana mantsapashpa parlapänapaq (Pro. 16:20-23).
3. ¿Imanötaq mana Testigo kaq majapa shonqunman chärishwan?
3 Shumaq yanapashun. Höraqa más preciso kanqa kë nunakunata kuyanqantsik y imanöllapis yanapanqantsikmi, y manam hinan hora Bibliapita parlapanqantsiktsu (1 Ped. 3:1, 2). Alläpa precïsoqa kuyanqantsikmi. Tsëmi panikunaqa mana testigo kaq warmiman witipäyanman, y wawqikunanam mana testigo kaq qowaman. ¿Imanötaq tsëtaqa rurayanman?
4. ¿Imanötaq rikätsikushwan kuyakoq kanqantsikta?
4 Mana Testigo kaq majata manaraq reqirqa, puntata Testigo kaq majanllata niri majanwan parlapëta munanqëkita. Y shumaq mana chaskishuptikiqa yapë parlapëta ama qelanarïtsu. Itsa shumaq respëtowan parlapäriptikiqa testïgokunapaq allitana pensanqa (Rom. 12:20). Wakin cristiänokunaqa, mana testigo kaq majata reqiyänanrëkurmi wayinkunaman mikuyänampaq llapan familiata invitayan. Y mana testigo kaq maja gustanqan tëmakunallatam parlayan, y manam tukïnöpa Bibliapita parlapëta tïrayantsu. Bibliapitaqa ichik maslla reqinakurir-ran parlayan. Y itsa congregacionchö kaqkunata reqipäramarnintsikqa reunionkunamampis ëwar qallëkunman, y tsënöpam kikin rikanqa majan imata ruranqantapis. Y Bibliapita yachakïta manaraq munaptimpis felicitärishwanmi testigo kaq majanta yanapëkanqampita.
5. ¿Imatataq anciänokuna rurëta puëdeyan?
5 Anciänokunaqa alkäbullam këkäyänan mana Testigo kaq majata imë hora karpis Bibliapita parlapäriyänampaq. Wiyëta mana munashqa karpis, itsa hospitalchö këkanqan hora o ima problëmapapis pasëkanqan höraqa Diospa palabranta wiyakurinman. Huk familiachö llapan mana Jehoväta serviyaptimpis, huk familian wanuriptinqa mana testigo kaqtapis invitariyanmanmi cristiänopura animayanqanta wiyakuriyänampaq.
6. ¿Imanirtaq cristiano mayintsikpa mana creikoq majankunata yanapashwan?
6 Yarpakurkï, ¡imaraq huk cristiano kushikïkunman majan Jehoväta servir qallëkuptin! Pero, manam pëllatatsu kushitsinqa, sinöqa Jehoväta, angelkunata y congregacionchö kaqkunatawanmi (Luc. 15:7, 10). Y tsë maja yachakïta mana munaptimpis kushikushwanmi, Jehová munanqanta rurar sinchikïkanqantsikta musyar, “pëqa manam munantsu pipis condena[do cananta]; antis shuyarëcan nunacuna jutsancunata jaqiriyänantam” (2 Ped. 3:9).
[6 kaq päginachö ninqan]
Höraqa alli kanqa pëkunata kuyanqantsik y imanöllapis yanapanqantsikmi, y manam hinan hora Bibliapita parlapanqantsiktsu