¿Imanötaq huk alli yachatsikoqqa kanman?
1. ¿Imanötaq huk alli yachatsikoqqa kanman?
1 ¿Imanötaq Bibliapita yachatsikoqqa kanman? ¿Alli escuëlakunachöraqtsuraq yachakunman? ¿Atska wataraqtsuraq maestronö yachatsikunman? ¿Alleq yachatsikoqraqtsuraq kanman? Manam, kuyakoq kanqanmi precisanqa: kuyakïpitam llapan Leykuna yarqamun, kuyakunqantsikmi Jesuspa qateqnin kanqantsikta rikätsikun, y Jehoväpis alläpa kuyakoqmi (Juan 13:35; Gal. 5:14; 1 Juan 4:8). Awmi, alli yachatsikoq kanapaqqa, kuyakoq kanqantsiktam rikätsikunantsik.
2. ¿Imanirtaq precisan llapan nunakunata kuyanantsik?
2 Llapan nunakunatam kuyayänan. Alli Yachatsikoq Jesus llapan nunakunata kuyaptinmi pï mëpis wiyaq (Luc. 5:12, 13; Juan 13:1; 15:13). Nuna mayintsikta kuyarqa, imë hörapis yachatsikïkäshunmi. Wiyakïta mana munayaptimpis o chikimashqapis yachatsikushunmi. Y wayiyoqkuna parlayanqanta wiyashunmi, yachakïta munayanqanmannö o yarparäyanqanmannömi yachatsishun. Hina Bibliapita yachakïta munaqkunapaqmi tiempontsikta rakishun y yachatsikunapaqpis preparakushunmi.
3. Rasumpa yachatsikïta kuyanqantsik, ¿imanötaq yanapamäshun?
3 Diospa rasumpa yachatsikïnintam kuyanantsik. Jesuspis Diospa rasumpa yachatsikïninta kuyaqmi. Y alläpa väleq tesörokunatanömi rikaq (Mat. 13:52). Rasumpa yachatsikïta kuyarqa kushishqam yachatsikushun, tsëqa wiyamaqnintsikkunapis Diospa kaqta kuyayanqam. Yachatsikïta alläpa mana mantsakunapaqpis kuyakïqa yanapamäshunmi, tsëqa imanö yachatsikunqantsikta yarparänapa rantinmi, Diospa yachatsikïnin más precisanqanta yarparäshun.
4. ¿Imataraq rurashwan kuyakïwan yachatsikunapaq?
4 ¿Imanötaq más kuyakushwan? Diospa kaqta nunakuna mana reqiyaptinmi ankupäkïta yachakunantsik, y Jehoväwan Jesus kuyakuyanqannömi kuyakunantsik (Mar. 6:34; 1 Juan 4:10, 11). Hinamampis rasumpa yachatsikïta más kuyanapaqqa, alleqmi estudianantsik y leinqantsikkunamanmi yarpakachänantsik. Yarpäshun, kuyakurqa santo espïrituyoq kanqantsiktam rikätsikuntsik (Gal. 5:22). Tsëmi más kuyakoq kanapaqqa, Jehoväta mañakushwan santo espïritunwan yanapëkamänapaq (Luc. 11:13; 1 Juan 5:14). Alli escuëlakunachö mana estudiashqa karpis, atska watakunapa mana yachatsikushqa karpis o alli yachatsikoq mana karpis, kuyakurqa Diospa Palabrampitam alli yachatsikushun.