DIOS MUNANQANNÖ KAWANAPAQ

Semänachö reunionnintsikpaq juk mushoq yanapakï

Idiömantsikchö manaraq yarqamuptimpis, 2018 wata enëru killapita patsëmi, Traducción del Nuevo Mundo de las Santas Escrituras (nwtsty) edición de estudio nishqan Bibliachö këkaq nötakunata, dibüjukunata y videukunata reunionnintsikchö churayämunqa. Këqa reunionpaq alli preparakunapaqmi, alläpa yanapakunqa. Y masqa, alläpa kuyakoq teytantsik Jehovä Diosnintsikwan amïgu kanapaqmi yanapamäshun.

YACHAKUNAPAQ NÖTAKUNA

Këqa yanapamantsik, wakin textukunachö yarqamoq costumbrikunapita, sitiukuna mëchö këkanqampita y ima idiömata parlayanqampita maslla musyanapaqmi.

Mateu 12:20

Qoyëkaq mëcha: Unë witsan wayikunachö utilizäyanqan chiwchikunaqa mitupitam kaq y olïva aceititam winayaq. Tsë aceititaqa lïnupita mëcham shoqureq y tsëmi ninaqa upeqtsu. Griëgu idiömachö “qoyëkaq mëcha” ninanqa, itsapis chiwchichö mëcha achachëkaptinllaraq qoyë (qoshni) yarqoqpaq parlëkan, nina upinarëkaq o upishqana këkaptimpis. Isaïas 42:3 textuchö musyatsikï ninqannömi, Jesusqa ankupäkoq kanan karqan, pëqa manam ninata upiratseq cuentatsu humildi y llakishqa nunakunata mana kaqpaq churaq.

Mateu 26:13

Rasuntam; rasumpa kaqllatam: Hebreu idiömachö amen nishqanta, griëgu idiömachö letraman tikratsiyanqanqa amen nishqanmi, y tsëqa “tsënö katsun” o “següru kë” ninanmi. Jesusqa tsë palabratam utilizaq imatapis willakunampaq, änikunampaq o juk musyatsikïta willakunampaq. Tsënöpam rikätsikurqan llapan ninqankunaqa rasumpa kaqlla y markäkïpaq kanqanta. “Rasuntam” o “tsënö katsun” neq palabrakunata Jesus utilizanqanqa, sagrädu qellqashqakunallachö këkanqantam niyashqa. Juan libruchönö amen nishqan palabra ishkë kuti yuriptinqa, ‘rasumpa kaqllata’ nirmi traduciyan (Jn 1:51).

FÖTUKUNA Y VIDEUKUNA

Fötukuna, igualatsikïkuna, mana wiyakaq videukuna y dibüjukunawan videukunaqa, Biblia yachatsikunqantam mas shumaq entienditsimantsik.

Betfaguë, Olïvus jirka y Jerusalen

Kë videuqa, inti yarqamunan lädupa Jerusalenman chätsikoq nänitam rikätsikun, et-Tur markapita hasta Olïvus jirkayaq. Et-Tur markaqa, itsapis Biblia willakunqan Betfaguë marka karqan. Y Betania markaqa Betfaguë markapa inti yarqamunan kaq läduchömi këkan, Olïvus jirka urëchö. Jerusalenman ëwarmi Jesuswan qateqninkunaqa, Betaniachö quedakuyaq. Y kanan witsanqa el-Ázariyeh (El Éizariya) nishqan markam tsëchö këkan, y ärabe idiömachöqa “Läzarupa sitiun” ninanmi. Tsëmi rikätsimantsik Jesuswan qateqninkunaqa Martapa, Marïapa y Läzarupa wayinchö quedakuyanqanta (Mt 21:17; Mr 11:11; Lü 21:37; Jn 11:1). Jesusqa pëkunapa wayinkunapitam Jerusalenyaq ëwarqan, itsapis kë videuchö rikanqantsik sitiukunapa pasar. 33 wata 9 de nisan killam, Jesusqa ashnun montarishqa Olïvus jirkapa ëwarnin Jerusalenman chärirqan. Itsapis Betfaguë markapita Jerusalenyaq ëwarqan.

Betaniapita Betfaguë markayaq näni
Betfaguë
Olïvus jirka
Cedron nishqan pampa
Templu jirka

Atakachö këkaq tullupa pasashqa clävu

Kë fötuchöqa, 4.5 pulgädas clävum ataka tulluchö clavarëkan. Kë tullutaqa Jerusalenpa ura kaq lädumampam 1968 watachö tariyarqan, tsëqa Röma nunakuna kawayanqan witsampitanam. Kë tulluta tariyanqanqa itsapis rikätsikun, nunakunata qeruman warkuyaptin mana jeqakurkunampaq clävuta utilizäyanqanta. Y këqa, itsapis unë witsan Röma soldädukuna Jesusta qeruman clavayänampaq utilizäyanqan clävunö karqan. Kë tullutaqa, rumipita rurashqa jatun cäja rurinchö wakin tullukunatawanmi tariyashqa. Tsëmi qeruchö wanutsiyanqan nunakunatapis pampayanqanta rikätsikun (Mt 27:35).