Diosman witi

“Jehovämi mitsimaqnï”

KË PÄGINACHÖ dibüjota rikäri. ¿Manaku kë üsha mitseqnimpa mellqaninchö imatapis mana mantsakushpa këkan? Salmo 23 capïtulochömi rikätsikun huk mitsikoq y üshampaq, tsëwanqa rikätsikïta munan Jehová sirveqninkunata tsënölla kuyanqantam. Pëqa munan, Davidnöpis markäkurnin kushishqa “Jehovämi mitsimaqnï” niyänantam (versículo 1).a

Davidqa joven këninchömi mitsikoq karqan. Tsëmi alli musyaq üshakuna imata wanayanqanta y mitsikoq imata ruranampaq kaqtapis. Hinamampis, rikarqanmi Jehová kuyëpa cuidanqanta, tsëmi qellqarqan kë versokunata, kananqa reqintsik “markäkunapaq salmo” nishpam. Jehoväpa shutinqa kë salmopa qallananchö y ushananchömi yurin (1 y 6 versïculokuna). Chowpin kaq versïculokunanam, rikätsikun Jehová sirveqninkunata huk mitsikoq üshankunata rikanqannö cuidanqanta (Salmo 100:3). Kimata rikärishun.

Jehoväqa üshankunatam pushan. Mitseqnin mana kaptinqa üshakunaqa oqrakäriyanmi. Tsënöllam noqantsikpis alli nänipa pushamänata wanantsik (Jeremías 10:23). Diosnintsik sirveqninkunata, ‘llullu qewakunapa y atska yakuyoq sitiokunapa hamarinampaq pushanqantam’ Davidqa nirqan. Hina “imëpitapis reqishqa nänikunapa’ pushanqantam nirqan (2 y 3 versïculokuna). Huk mitsikoq üshankunata imanö cuidanqanmi Jehoväman markäkïnintsikta más sinchiyätsin. Biblia ninqanta wiyakur Dios munanqanta rurarqa kushishqa, yamë y imatapis mana mantsakushpam kawakushun.

Jehoväqa üshankunatam tsapan. Mitseqnin lädonkunachö mana këkaptinqa, üshakunaqa mantsaq mantsaqllam puriyan, y imapis apakunmanmi. Jehoväqa sirveqninkunatam nin, ‘pasëpa paqaschö purir’ o alläpa aja o sasa kawëkunata pasar, ni imapitapis mana mantsapakuyänampaq (versículo  4). Imëpis rikëkanmi yanaparkunampaq. Awmi, ima pruëbakunapa pasayänampaqpis yachëninkuna y kallpankunapis qoyta puëdenmi (Filipenses 4:13; Santiagu 1:2-5).

Jehoväqa üshakunatam mikutsin. Üshakuna mikïta tariyänampaqqa imëpis mitseqnintaran wanayan. Noqantsikqa espiritual mikïtam wanantsik y tsëtaqa Jehovällam qomënintsikta puëden (Mateo 5:3). Alläpam kushikuntsik atska mikïnintsik Jehová qomanqantsikpita (versículo 5). Biblia, y makikichö revista këkatsinqëkinö publicacionkunam yanapamantsik imapaq kawanqantsikta y Diospa munëninkunata musyanapaq.

Davidqa markäkoq o yärakogmi Jehoväwan imëpis këkaptinqa kuyëpa “llapan kawëninchö” cuidanampaq kaqta (versículo 6). ¿Qamtapis Jehová tsënö cuidashunëkita munankimantsuraq? Tsëqa, Jehoväman imanö witinëkipaq kaqta yachakïta tïrë. Tsëta rurarllam tsapäkoq, pushakoq y sirveqninkunata mikutseq Alli Mitsikoqpa mellqaninchö imëpis këkanki (Isaías 40:11).

[Päginapa ura kuchunchö willakï]