Noëqa juk arcatam rurarqan

Tiempu pasariptinqa mëtsika nunakunam Patsachö kawayarqan, y cäsi llapankunam mana allita rurayaq. Wakin angelkunapis mana allim tikrakuriyarqan, y ciëlupitam Patsaman shayämurqan. ¿Musyankiku imaq shayämunqanta? Nunaman tikrayänampaq y warmikunawan casakuyänampaqmi.

Nunaman tikrashqa angelkunapa wamrankunaqa, jatunyärirqa alläpa kallpasapa y lïsu karmi nunakunata alläpa sufritsiyaq. Peru Jehoväqa manam rikaräkurqantsu, tsëmi llapan mana alli nunakunata diluviuchö ushakätsinampaq decidirqan.

Peru juk nunallam llapankunapita jukläya karqan. Pëpa jutinqa Noëmi karqan y Jehovätam alläpa kuyaq. Pëwan warminqa kima o kimsa wamrayoqmi kayarqan y jutinkunaqa karqan Sem, Cam y Jafetmi. Y kimanmi warmiyoq kayarqan. Jehoväqa juk arcata ruranampaqmi Noëta mandarqan, tsënöpa diluviu kaptin pëwan familian tsëchö salvakuyänampaq. Tsë arcaqa qerupita rurashqa jatun cäjam karqan, y manam yakuchö hundikarqantsu. Y mëtsika animalkunata tsëman yëkatsinampaqmi Jehoväqa Noëta mandarqan, tsënöpa salvakuyänampaq.

Noëqa jinan höram tsë arcata rurar qallëkurqan. Familianwan yanapanakurmi cäsi 50 watataraq rurar ushayarqan, y Jehovä ninqannöllam rurayarqan. Tsë tiempuchömi Noëqa diluviu kanampaq kaqta nunakunata willarqan, peru manam pipis creirqantsu.

Tsëpitaqa arcaman yëkuyänan tiempum chärirqan. ¿Musyëta munankiku tsëpita ima pasakunqanta?