6 KAQ YACHAKUNËKIPAQ
Puwaq nunakunallam salvakuyarqan
Noëqa familianwan y animalkunawanmi arcaman yëkuyarqan. Y punkuta Jehovä wichqariptinmi tamyar qallëkurqan. Alläpa tamyaptinmi arcaqa yakuwan pallarikar qallëkurqan, y ichikllapa ichikllapam yakuqa Patsata tsaparirqan. Mana alli nunakunaqa manam arcaman yëkuyarqantsu, tsëmi llapankuna wanuyarqan. Peru Noëtawan familiantaqa manam ni imapis pasarqantsu. Pëkunaqa alläpachi kushikuyarqan Jehoväta cäsukuyanqampita.
40 junaq y 40 paqasmi alläpa tamyarqan. Tsëpitanam ichikllapa ichikllapa yaku tsakir qallëkurqan, y arcaqa juk jirka jananchömi quedarirqan. Peru waqtachöqa mëtsikaraqmi yaku karqan, tsëmi Noëwan familianqa juk tiempuparaq arcachö quedakuyarqan.
Peru tiempu pasanqanmannömi yakuqa tsakirirqan. Tamyar qallanqampitaqa juk watapitapis masran Noëwan familianqa arca rurinchö kayarqan. Tsëpitaran Jehoväqa nirqan arcapita yarquyänampaq. ¡Patsachöqa llapanmi mushoqnöna rikakurqan! Pëkunaqa Jehovä salvanqampita alläpa kushikurmi, juk qarëta Jehoväpaq rurayarqan.
Jehovätaqa alläpam tsë qarë gustarqan, tsëmi änikurqan tsënö alläpa tamyawanqa Patsachö llapan kaqkunata manana imëpis ushakätsinampaq kaqta. Tsë änikunqanta nunakuna yarpäyänampaqmi juk turmanyëta rikätsirqan. Y qamqa, ¿imëllapis juk turmanyëta rikarqunkiku?
Wamrankuna kanampaq y Patsa juntanqanyaq mirayänampaqmi Jehoväqa Noëta y familianta nirqan.
“Arcaman Noë yëkunqan junaqyaqmi nunakunaqa mikur upur kakuyarqan,[...] y Alläpa Tamya shamur llapankunata ushakätsinqan junaqyaqmi ichikllapis cäsukuyarqantsu” (Mateu 24:38, 39).