Creikoqkunapa dirigeqninkuna

1. ¿Imanirtan Jehoväpa familianchöqa juknölla kantsik?

JEHOVÄPA familianchö kanqantsikpitaqa alläpam kushikuntsik. Yamë y juk familianöllaqa kawakuntsik, dirigimänantsikpaq Jehovä churanqankunata respetanapaq llapantsik kallpachakurmi. Dirigimaqnintsikkunata Jehovä imanir churanqanta entiendirmi, juknölla y kushishqa kawakuntsik.

2. ¿Ima tapukuykunapitatan këchöqa yachakushun?

² Këchöqa, congregacionchö dirigimaqnintsikkunapaqmi parlashun. Kë tapukuykunapitam yachakushun: congregacionchöqa, ¿ima rurëyoqtan panikuna kayan?, ¿llapan wawqikunaku panikunapa dirigeqninkuna kayan? y creikoqkunata rikaq wawqikunaqa, ¿familianta dirigeq nunanöku wawqi panikunata rikäyanman? Tsepaqqa, congregacionchö panikuna yanapakuyanqanta imanö rikänapaq kaqta yachakurishun.

PANINTSIKKUNA RURAYANQANTA VALORASHUN

3. ¿Imatan yanapamäshun panintsikkuna rurayanqanta masraq valoranapaq?

³ Familiankunata cuidayanqampita, Diospita yachatsikuyanqampita y congregacionchö wawqi panikunata yanapayanqampitam, panintsikkunataqa valoranantsik. Jehoväwan Jesus imanö rikäyanqanman pensanqantsik y apostol Pablu imanö tratanqanta yachakunqantsikmi, panikunata mas valoranapaq yanapamäshun.

4. ¿Imatatan Bibliachö nin warmitawan ollquta Jehovä igual rikanqampaq?

⁴ Warmikunawan ollqukunaqa Jehoväpaq igual-lla väliyanqantam Bibliachöqa nin. Punta cristiänukuna kawayanqan witsanqa, warmita y ollqutapis tukuy idiömakunachömi Jehoväqa parlatsirqan (Hëch. 2:1-4, 15-18). Cristuwan gobernayämunampaq akrashqakunachöqa warmipis y ollqupis kayanmi (Gäl. 3:26-29). Jehoväqa, sirweqninkuna warmipis ollqupis Mushoq Patsachö kawayänampaqmi permitinqa (Rev. 7:9, 10, 13-15). Jesusqa, warmipis y ollqupis alli willakuykunata willakuyänampaqmi mandashqa (Mat. 28:19, 20). Këman yarpärishun, Hëchus libruchömi Priscïla jutiyoq cristiänapaq parlan. Pëwan nunan Äquilam, alli yachaq Apölus cristiänuta ‘Diospa nänimpaq alleq cläru willayarqan’ (Hëch. 18:24-26).

5. Lücas 10:38, 39 y 42 ninqannö, ¿imanötan Jesusqa warmikunata rikaq?

⁵ Jesusqa warmikunata respetarqanmi. Fariseukunaqa manam warmikunata respetayaqtsu, tsëmi nunakuna rikëkäyaptinqa parlapäyaqtsu y Bibliapitanäqa yachatsiyaqtsu. Peru Jesusqa manam tsënötsu karqan, peqa warmitapis y ollqutapis Diospitam yachatsirqan (leyi Lücas 10:38, 39, 42).b Y yachatsikoq ëwanqanchöpis warmikuna yanaqayänantam permitirqan (Lüc. 8:1-3). Y kawarimushqa kanqanta apostolninkunata musyatsiyänampaqmi wakin warmikunata permitirqan (Juan 20:16-18).

6. ¿Imanötan apostol Pabluqa rikätsikurqan warmikunata respetanqanta?

⁶ Apostol Pabluqa warmikunata respetanampaqmi Timoteuta consejarqan. Mayor warmikunata mamantanö y shipashkunata paninkunatanö rikänampaqmi nirqan (1 Tim. 5:1, 2). Diosman mas markäkoq o yärakoq kanampaq Timoteuta Pablu yanapashqa kaptimpis, mamanwan awilan Diospita yachatsiyanqantam nirqan (2 Tim. 1:5; 3:14, 15). Jina Römachö këkaq cristiänukunaman cartakunqanchöpis, mëtsikaq panikunatam jutimpa saludarqan. Tsë panikuna imëkata rurayanqantam rikaq, y tsëkunata rurayanqampita valoranqantam pëkunata nirqan (Rom. 16:1-4, 6, 12; Filip. 4:3).

7. ¿Ima tapukuykunapitatan yachakushun?

⁷ Yachakunqantsiknöpis, Bibliachöqa manam nintsu panintsikkunaqa wawqintsikkunapita mënus kayanqanta. Kuyakoq kar y wakinkunapaq imëkata rurarmi panintsikkunaqa congregacionchö yanapakuyan. Y congregacionta rikaqkunaqa, yamë y juknölla kanapaq yanapakuyanqantam musyayan. Peru kë tapukuykunapitaraq yachakushun: ¿imanirtan höraqa Jehovä mandakun panikuna peqankunata o umankunata imawampis tsapäkuyänampaq? Y ollqukunalla creikoqkunata rikaq y creikoqkunata rikaqkunapa yanapaqnin kayaptinqa, ¿llapan wawqikunaku panikunapa dirigeqnin kayan?

¿LLAPAN WAWQIKUNAKU PANIKUNAPA DIRIGEQNINKUNA KAYAN?

8. Efesius 5:23 ninqannöpis, ¿imanirtan llapan wawqikunaqa panikunapa dirigeqninkunatsu kayan?

⁸ Manam. Llapan panikunapa dirigeqninqa Jesusllam (leyi Efesius 5:23). Juk familiachöqa, warmipa dirigeqninqa nunanmi, y bautizakushqa ollqu wamranqa manam mamänimpa dirigeqnintsu (Efes. 6:1, 2). Creikoqkunata rikaqkunapis, congregacionchöqa manam llapanchötsu wawqi panikunapa dirigeqninkuna kayan (1 Tes. 5:12; Heb. 13:17). Teytankunawan manana täkoq panitaqa, ¿pinatan dirigin? Manam teytannatsu, peru pëtaqa respetëkanllam. Y wakin wawqikunanöllam creikoqkunata rikaqkunataqa respetan. Tsënö kaptimpis, Jesusllam dirigeqninqa.

9. ¿Ima cäsu kaptintan warmikunaqa peqankunata o umankunata tsapäkuyanman?

⁹ Jehoväqa, congregacionkunata dirigiyänampaqmi ollqu kaqkunata churashqa (1 Tim. 2:12). ¿Imanir? Congregacionchö imapis alli rurakänampaqmi, ollqukunata diriginampaq Jesusta churashqa. Ima cäsu kaptimpis, juk ollqu ruranampaq kaqta warmi ruraptinqa, Jehoväqa peqanta o umanta tsapakunampaqmi mandakun (1 Cor. 11:4-7).c Tsëtaqa mandakun, manam warmikunata mënuspaq churartsu, sinöqa Jehovä churanqan dirigeqkunata respetayanqanta rikätsikuyänampaqmi. Kananqa kë tapukuypita yachakurishun: ¿familiayoq kaq ollqukuna y creikoqkunata rikaqkunaqa llapanchö dirigeqku kayan?

FAMILIATA DIRIGEQKUNA Y CREIKOQKUNATA RIKAQKUNA

10. ¿Imanirtan congregacionta rikaqkunaqa wawqi panikunapaq imatapis patsätsita puëdiyanqanta pensayanman?

¹⁰ Creikoqkunata rikaqqa, Jesustam kuyan y Jehoväwan Jesus cargunman churayanqan wawqi panikunatapis kuyarninmi cuidan (Juan 21:15-17). Y tsënö kuyarnin itsa wawqi panikunapa teytannö kanqanta pensanman. Itsa kënö ninman: “Familianta dirigeq nuna familianta cuidanampaq imatapis patsëkätsiptinqa, creikoqkunata rikaq karmi, Diospa sirweqninkunata cuidanäpaq imëkatapis patsätsipakuyta puëdï”. Itsa wakin wawqi panikunaqa creikoqkunata rikaqkunata tsënö pensatsiyanman, imata rurayänampaqpis pëkuna decidiyänampaq mañakurnin. Peru creikoqkunata rikaqkuna y familianta dirigeqqa, ¿igual autoridäyoqllaku kayan?

11. Familiata dirigeqkunaqa y creikoqkunata rikaqkunaqa, ¿imachötan igual kayan?

¹¹ Familiata dirigeq y congregacionta rikaqqa, wakin wakinchö igual-lla kayanqantam apostol Pabluqa rikätsikurqan (1 Tim. 3:4, 5). Këllaman pensarishun, familiakuna teyta kaqta y wawqi panikuna creikoqkunata rikaqkunata cäsukuyänantam Jehoväqa shuyaran (Col. 3:20). Jehoväqa, familiata dirigeqkuna y creikoqkunata rikaqkunaqa, cuidädunchö këkaqkunata kuyayänampaq, valorayänampaq y pëman markäkuyänampaq o yärakuyänampaq mas yanapayänantam munan. Y familiata alli dirigeq nunanömi, creikoqkunata rikaqkunaqa wawqi panikuna imatapis necesitäyanqanchö yanapayan (Sant. 2:15-17). Cargunkunachö këkaqkuna Bibliachö ninqankunata cäsukuyänampaq, y ‘qellqashqa këkaqkunapita masta mana rurayänampaq’ yanapayänantam, creikoqkunata rikaqkunapita y familiata dirigeqkunapita Jehoväqa shuyaran (1 Cor. 4:6).

12, 13. Romänus 7:2 ninqannöpis, ¿imachötan familianta dirigeqkuna y creikoqkunata rikaqkunaqa jukläya kayan?

¹² Tsënö kaptimpis, creikoqkunata rikaqkunapa y familiata rikaqkunapa autoridäninqa wakin wakinchöqa jukläyam kayan. Tsënö kaptinmi, jutsallakoqkunata juzgayänampaq y mana arrepentikoqkunata congregacionpita qarquyänampaq, creikoqkunata rikaqkunataqa Jehovä churashqa (1 Cor. 5:11-13).

¹³ Jehoväqa, creikoqkunata rikaqkuna decidita mana puëdiyanqanmanmi familiata dirigeqkunata churashqa. Y tsëqa kanman familian imata ruranampaq decidinqankunam (leyi Romänus 7:2). Familiata dirigeqllam, wamrankuna imë höra wayiman chäyänampaq kaqta patsätsita y mana wiyakuyaptin corregita puëdin (Efes. 6:1). Peru imatapis manaraq patsätsirmi, familianta alli dirigeq nunaqa warminwanran puntata parlanan. Biblia ninqannöpis, “juk ëtsallanam” kayan (Mat. 19:6).d

CONGREGACIONTA DIRIGEQ CRISTUTA RESPETASHUN

14. (1) Marcus 10:45 ninqannö, ¿imanirtan Jehoväqa congregacionpa dirigeqnin kanampaq Cristuta churashqa? (2) ¿Ima rurëyoqtan Testïgukunata Pushaqkunaqa kayan? (Rikäri “Testïgukunata Pushaqkuna rurayanqankuna” neqta).

¹⁴ Jehoväqa Jesus wanunqanrëkurmi, congregacionchö kaqkunata y Jesusman markäkoq o yärakoq kaqkunata salvanqa (leyi Marcus 10:45; Hëch. 20:28; 1 Cor. 15:21, 22). Noqantsikrëkur Cristu wanushqa kaptinmi, Jehoväqa congregacionta dirigeq kanampaq churashqa. Tsëmi Jesusqa, nunakunapaq, familiakunapaq y congregacionchö kaqkunapaq imatapis patsätsin y cumpliyänampaq segurakun (Gäl. 6:2). Peru pëqa manam imatapis ruranallapaqtsu nimantsik, sinöqa Diospitam yachatsimantsik y cada ünutam cuidamantsik (Efes. 5:29).

15, 16. ¿Imatatan yachakunki Marley y Benjamin niyanqampita?

¹⁵ Panikunaqa Cristuta respetayanqanta rikätsikuyan, congregacionta diriginampaq churanqan wawqikunata respetarninmi. Estädus Unïduschö täraq Marley jutiyoq panim kënö nin: “Casäda kar rurënïkunapita congregacionchö imanö rikäyämanqampitam kushikü. Jehovä churanqan dirigeqkunata respetakunäpaqmi kallpachakunä. Peru qowä y congregacionta dirigeqkuna ruranqäta valorayaptinmi, pëkunata respetëqa fäcil-lla”. Marleynöchi wakin panikunapis pensayan.

¹⁶ Panikunata respetar y rurayanqankunata valorarmi, wawqikunaqa dirigeqkuna kanampaq Jehovä patsätsinqanta respetayan. Inglatërra nacionchö täraq wawqi Benjaminmi kënö nin: “Reunionkunachö parlakuyanqampita, Bibliata imanö estudianapaq niyanqampita y Diospita mas alli imanö yachatsikunapaq niyanqampitaqa, imëkatam panikunapita yachakurqö. Y pëkunaqa imëkata rurarmi yanapakuyan”.

17. ¿Imanirtan Jehovä patsätsinqan dirigeqkunata respetanantsik?

¹⁷ Sitsun congregacionchö kaq ollqukuna, warmikuna, familianta dirigeqkuna y creikoqkunata rikaqkuna, dirigeqkuna kanampaq imanir Jehovä patsätsinqanta alli entiendintsik y respetantsik, tsëqa llapantsikmi kushishqa kawakushun. Y masqa kuyamaqnintsik Teytantsik Jehovätam alabashun (Sal. 150:6).