3 Mana rasun kaq yachatsikï: Alli nunakunaqa ciëlomanmi ëwayan
¿Imanötaq tsë yachatsikï yurimushqa? Jesuspa apostolninkuna wanur ushakäriyaptinmi, 100 watakunapita witsëpa atskaq teólogo nishqan nunakuna más reqishqa tikrariyarqan, pëkunatam punta Iglesiata Patsätseqkuna nir kanan reqiyan. “Nuna wanuriptenqa mana rikakoq alman hutsapita perdonta chaskirirlla ciëloman yëkunqantam [pëkunaqa] yachatsikuyaq” ninmi huk reqishqa libro (New Catholic Encyclopedia, 2003).
¿Imatataq Bibliaqa yachatsikun? “Cushicuyanqam qollmi shonquyoqcuna, porqui pecunapam que patsaqa.” (Mateo 5:5.)
Apostolninkunapaq ciëlochö huk sitiota alistanampaq Jesus parlarpis, manam llapan alli nunakuna ciëloman ëwayänampaqtsu nikarqan (Juan 3:13; 14:2, 3). Yarpärishun, Jesusqa manam “Sielucho” Diospa munënin rurakänanllapaqtsu mañakorqan, hina “que patsachopis” rurakänampaqwanmi (Mateo 6:9, 10). Rasun kaqchöqa wallkaqllam ciëloman ëwayanqa Cristuwan gobernayänampaq, y wakin kaq nunakunaqa Patsachömi imëyaqpis kawakuyanqa (Apocalipsis 5:10).
Pero punta kaq Iglesiachöqa rasumpa kaqta yachatsikuyänampa rantinmi hukläyapana yachatsikur qallëkuyarqan. Y ¿imataq pasarqan tsënö yachatsikuyaptin? “Ichikllapa ichikllapam nunakuna Diospa Gobiernonta shuyarëkäyanqan gobiernoman [tsë religión] tikrarirqan” ninmi huk libro (The New Encyclopædia Britannica). Qateqninkunata Jesus “noqapa mandaquinïqa manam que patsacho nunacunapa mandaquininnotsu” nishqa këkaptimpis, më tsëchö mandaq religión kayänanrëkurmi gobiernokunawan takukar qallëkuyarqan (Juan 15:19; 17:14-16; 18:36). Tsëmi Roma nacionta gobernaq Constantino nenqanta cäsur, punta religionchöqa mana rasun kaq yachatsikïkunatawan wakin alli yachatsikïkunata takur qallëkuyarqan. Tsënöpam Dios imanö kanqantapis llutampa yachatsikuyarqan, y tsëtam qateqninchö rikärishun.
Kë versïculokunata rikäri: Salmo 37:10, 11, 29; Juan 17:3; 2 Timoteu 2:11, 12.
RASUN KAQ:
Casi llapan alli nunakunam Patsachö imëyaqpis kawakuyanqa, manam ciëlochötsu.
[6 kaq päginachö pikunapa kanqan]
Art Resource, NY