¿Imakunachötaq yanapamantsik?

DIOSMAN mañakï ni imachö mana yanapakunqantam wakin nunakunaqa pensayan. Pero Bibliaqa manam tsënötsu yachatsikun (Lucas 22:40; Santiagu 5:13). Mañakunqantsikqa manam Diospa kaqchö alli kanallapaqtsu yanapamantsik, hina yamë këta tarinapaq y alli saludyoq kanapaqwanmi. ¿Imanötaq tsëqa?

Këman pensarishun: Wambrakunata imatapis qarëkuyaptinqa, ¿imatataq teytankuna yachatsiyan? Manam kushishqa chaskikïllatatsu, sinöqa agradecikuyänampaqwanmi. Y musyanqantsiknöpis, palabrantsikwan agradecikurqa más kushishqam kantsik. Tsaq tsënöllam Diosnintsikta agradecikushqapis pasamantsik. Rikärishun imëkapaq mañakunqantsik imakunachö yanapamanqantsikta.

Agradecikur mañakunqantsik. Tukï bendicionkunata chaskinqantsikpita agradecikur mañakunqantsikqa, Diosnintsik qomanqantsikkunata mana qonqanapaqmi yanapamantsik. Tsënö mañakurmi más kushishqa y agradecido kantsik, hinamampis, ima ruranqantsikpis alli yarqapamänapaq kaqman pensanapaqmi yanapamantsik (Filipenses 4:6).

Jesusmi, Teytan wiyanqampita agradecikur mañakurqan (Juan 11:41).

Perdonta chaskinapaq mañakunqantsik. Mana alli ruranqantsikpita Dios perdonamänapaq mañakunqantsikqa, manam más alli sientekunallapaqtsu yanapamantsik. Hina alli concienciayoq karnin hutsa ruranqantsik alläpa mana alli kanqanta cuentata qokunapaq, y ruranqantsikpita paqwë wanakunapaqpis yanapamantsikmi.

Davidmi, hutsallakïkur perdonta mañakurqa (Salmo 51).

Alli kaqta akranapaq y yachaq kanapaq mañakunqantsik. Tsëqa yanapamantsik humilde kanapaq, kikintsikllapita ima rurëta mana puëdenqantsikta yarpänapaq y Kamakoq Teytantsikman markakunapaq o yärakunapämi (Proverbios 3:5, 6).

Salomonmi, alli kaqta akranampaq y Israelta nacionta shumaq gobernanampaq yachëyoq këta Diosman mañakurqan (1 Reyes 3:5-12).

Alläpa hipakïkunapa pasar mañakunqantsik. Alläpa yarpachakurnin Diosman mañakunqantsiknöqa manam imapis kantsu. Y tsënö rurarqa, imëkachöpis Jehoväman markäkïtam yachakuntsik (Salmo 62:8).

Rey Asami, mantsëpaq chikeqnimpita Jehová salvëkunampaq mañakurqan (2 Crónicas 14:11).

Yanapëta wanaqkunapaq mañakunqantsik. Kikintsikllapaq imatapis munanapa rantin, wakinkunatapis kuyanapaq y llakipänapä o ankupänapaqmi yanapamantsik.

Jesusmi, qateqninkunapaq Teytanman mañakurqan (Juan 17:9-17).

Diosnintsikta alabanapaq mañakunqantsik. Jehová imanö kanqampita y imëkata kamanqampita mañakïnintsikchö alabarninqa, masmi pëta respetantsik y kuyantsikpis. Hina tsënö ruranqantsikmi Dioswan alli kanapaq yanapamäshun.

Davidmi, Dios llapan kamanqampita alabarqan (Salmo 8).

Pero manam tsëkunallachötsu mañakunqantsikqa yanapamantsik, hina “juclaya shonquta, y yarpeta” Diosnintsik qomänapaqpis yanapamantsikmi (Filipenses 4:7). Kë mana alli mundochö yamë kawakïta tarinqantsiknöqa, manam ni imapis kantsu. ¡Hasta alli saludyoq kanapaqpis yanapamantsikmi! (Proverbios 14:30.) Pero ¿imanötaq tsë yamë këta tarintsik? ¿Kallpachakurllatsuraq tarishun, o imatapis mastaraqtsuraq wanantsik?