¿Pitaq Jesus karqan?
“Jesuspaqqa tukïtam nunakuna pensayan. Pëman creir o mana creirpis, llapantsikmi tapukushqantsik tsë nuna pï kanqanta.” (STAN GUTHRIE, QELLQAQ.)
JESUS pï kanqantaqa llapankunam musyëta munayan. Tsëmi pëpaq parlaq librokunata y pelïculakunatapis alläpa rantiyan. Tsënö karpis, Jesus pï kanqantaqa tapukïkäyanllam y tukïtam nikäyan.
Qepa watakunallataran ishkë periodistakuna “¿Pitaq Jesus karqan?” nir Internetpa nunakunata tapuyarqan. Wakinkunaqa kënömi niyarqan:
● “Itsachi kawëninwan llakipäkog [ankupäkoq] këta yachatsikoq nuna karqan.”
● “Lluta nunalla këkarpis mana ni pï ruranqankunata ruraq nunam karqan.”
● “Rasumpa kawanqantaqa manam imapis rikätsikuntsu.”
● “Diospa Tsurinmi karqan, jutsantsikpita salvamänapaqmi yurirqan, wanurqan y kawarimurqan. Jesusqa kanampis kawëkanmi y yapëmi Patsaman kutimunqa.”
● “Diospa japallan Tsurinmi, nuna y Diosmi.”
● “Jesuspaq willakïqa wamrakunapaq cuentonöllam.”
¿Kë niyanqankunapita mëqan kaqtaq rasun kaq? Clärom këkan, manam llapan niyanqantsu rasumpa kanman. Tsëqa, ¿mëchötaq Jesuspita rasun kaq yachatsikïta tarishwan? Kë revistata jorqamoqkunaqa, Biblia Diospa Palabran kanqanta y tsë librolla Jesus pï kanqanta willakunqantam creiyä (2 Timoteu 3:16).a
Qateqnin yachatsikïchömi rikäshun nunakuna Jesuspaq tapukuyanqampita y Biblia imata yachatsikunqanta. Kikin Jesusmi nirqan salvacionta tarinapaqqa ‘peman marcäcunantsic’ o yärakunantsik alläpa precisanqanta (Juan 3:16). Tsëmi Jesuspaq Biblia imata yachatsikunqanta musyarinëkita munayä. Tsëpitaqa kikikinam akrakunki Jesuspita más yachakïta y pëman markäkïtapis.
[Päginapa ura kuchunchö willakï]
a Masta musyëta munarqa, rikäri Rasumpëpaqa, ¿imatataq Biblia yachatsikun?, libropa 2 kaq capïtulonta, tïtulonqa, “Jehová Diospitam Bibliaqa shamun” ninmi. Kë librotaqa Jehoväpa testïgonkunam rurayämushqa.