Diospa Palabrampita yachatsikïkuna
¿Imanirtaq cristiänokuna bautizakuyan?
Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi respuestanta más yachakurinëkipaq.
1. ¿Ima ninantaq cristiano bautizakïqa?
Bautizakurqa mañakïkantsik Dioswan alli kanapaqmi. Tsëmi cristiänokunaqa alläpa llullullaraq këkarqa bautizakuyanmantsu, sinöqa Diospita y Jesuspita yachakuyänampaq edadninkunachö kar-raqmi, tsënöpa Jesuspa qateqninkuna kayänampaq (Hechos 8:12; 1 Pedro 3:21). Y Jesuspa qateqninkuna kayänampaqqa yachakuyänan y rurayänan mandakunqantam. (Lei Mateo 28:19, 20.)
Apostolkuna kawayanqan witsankunachömi, atskaq nunakuna Diospita y Jesuspita yachakur qallëkuyarqan parlapäriyaptinlla. Tsëmi pasakurqan juk nunawan, Jesus wanunqanrëkur salvakïta puëdenqanta musyarirmi jinan höra yachakur qallëkurqan y Jesuspa qateqninmi tikrarirqan. Kanan witsankunapis atskaq nunakunam tsënölla rurëkäyan. (Lei Hechos 8:26-31, 35-38.)
2. ¿Imanirtaq Jesus bautizakurqan?
Jesusqa 30 watayoqnönam karqan Bautizaq Juan Jordan mayuchö bautizanqan witsan. Pëqa bautizakurqan Dios munanqanta ruranampaqmi (Hebreus 10:7). Bautizakurmi rikätsikurqan nunakunapa jutsanrëkur wanunampaq listo këkanqanta. Y manaraq Patsaman shamurninmi rikätsikushqana karqan Teytanta kuyanqanta y llapanchö wiyakoq kanqanta. (Lei Marcos 1:9-11 y Juan 8:29; 17:5.)
3. ¿Imanirtaq cristiänokuna bautizakuyan?
Jutsayoqna yurikurmi noqantsikqa Jesusnötsu kantsik. Pero wanunqanrëkurmi Dioswan alli këta tarintsik (Romanos 5:10, 12; 12:1, 2). Tsënö kanqanrëkurmi familian këmampis chëta puëdentsik (2 Corintios 6:18). ¿Imatataq ruranantsik tsëchö kushishqa kanapaq? Japallantsik mañakurmi pëllapaqna kanapaq y llapan kawënintsikchö pë munanqanllatana ruranapaq awninantsik. Y tsënö mañakurirninnam, Diosllapaqna kanapaq awnikunqantsikta llapan nunakuna musyayänampaq bautizakuntsik. (Lei Mateo 16:24 y 1 Pedru 4:2.)
4. ¿Imanötaq alistakunkiman bautizakunëkipaq?
Jehoväpa testïgonkunaqa, Diospita yachakïta munaq nunakunata kushishqam Bibliapita yachatsiyan. Bibliapita yachakunqëki y reunionkunaman ëwanqëkim yanapashunki Diosta más kuyanëkipaq y markäkïniki o yärakuyniki más kanampaq. Jina portakïniki y costumbrekikuna alli kanampaqmi yanapashunki. Jinamampis kuyakoq kanqëki y markäkoq kanqëkim yanapashunki Jehoväta awninqëkita imëpis cumplinëkipaq. (Lei Juan 17:3 y Hebreus 10:24, 25.)
Más yachakïta munarqa, Rasumpëpaqa, ¿imatataq Biblia yachatsikun? libropa 18 kaq capïtulonta ashiri, kë librotaqa Jehoväpa testïgonkunam rurayämushqa.