Job
2 Jipa shuj funchami, verdadero Diosbu churigunaga paigunabu puestoda ocupangabu Jehová Diosbu ñaupujbi shayarinajurca y Satanasbish paibu puestoda ocupangabu Jehová Diosbu ñaupujbi shayarirca. 2 Chaimi Jehová Diosga Satanasda tapurca: “¿Maimundadi shamungui?”. Jehová shina nijpimi Satanasga: “Cai allpada rricush muyushmi shamuni” nirca. 3 Y Jehová Diosmi Satanasdaga: “¿Nallu ñucada sirvij Jobda rricushcangui? Allpabiga pai shina nipi na tiyanllu. Paiga allida rrurraj, Taita Diosda manchaj y malo cosasgunada na rrurrajmi. Can paida yangamunda huañuchillun munajpish, paiga ñucada cazushmi catin” nirca. 4 Pero Satanasga Jehová Diosdaga cashnami contestarca: “Jariga pai causash catingabuga tucui ima charishcadami cunga. 5 Shinaga cununlladi canbu maquiun paibu aichabi, paibu tullubi tuparijpiga, seguro paiga canbu ñahuillabidi rrimanga”. 6 Chaimi Jehová Diosga Satanasda nirca: “Rricui, paiga canbu maquibimi. ¡Pero paibu causaidaga ama quichunguillu!”. 7 Chaimi Satanasga Jehová Diosbu ñaupujmunda llujshish Jobdaga chaquimunda umagama cuerpo carada ismuchish llaquichirca. 8 Chaimi Jobga ushpa ladobi tiyarish, paibu cuerpoda aspingabu barromunda manga faquishcada japirca. 9 Jipaga, paibu huarmi cashna nirca: “Chashna tucushash ¿Diosdallu cazush catingui? ¡Taita Diosda rrimash, de una vez huañui!”. 10 Pero Jobga cashna contestarca: “Canga yuyai illaj huarmi shinami parrlajungui. Taita Diosmunda alli cosasgunada chasquishaga, ¿nallu malo cosasgunadash chasquina ganchi?”. Job tucui chaida nishash, paibu shimiunga na pantarircallu.