Isaías
11 Jesebu troncomunda shuj uchilla yurami huiñanga, chai tronco sapimundaga mushuj frutomi llujshinga. 2 Y Jehová Diosbu espirituga paiunmi ganga, shinalladi yachaisapa y entendimientoda cuj espíritu, alli consejo y poderta cuj espíritu, alli yachaida y Jehová Diosda manchana cuj espiritumi paiunmi ganga. 3 Y paiga Jehová Diosda manchashmi contentaringa. Paiga ñahuigunada rricushallaga na juzgangallu. O shujtajguna nishcada uyashcamundallaga na rrimangallu. 4 Paiga pobre gentegunadaga justiciaunmi juzganga y cai allpabi causaj alli gentegunadaga paigunabu allimundami corrijinga. Cai allpabi causajgunadaga paibu rrimashcaunmi llaquichinga y malo gentegunadaga fucushmi tucuchinga. 5 Justiciaga paibu cinturabi cinturonda huatajuj shinami, y na engañanaga paibu caderabi cinturonda huatajuj shinami ganga. 6 Loboga malta llamaunmi causanga, leopardoga huahua billiunmi tandalla siringa, leonga jatun animalgunaunmi tandalla purinajunga; y paigunadaga uchilla huahuami michinga. 7 Vacaga mama osounmi tandalla micunajunga y paigunabu huahuagunaga tandallami sirinajunga. Leonga huagra shinami ujshada micunga. 8 Uchilla huahuaga culebrabu ujtu jahuabi llancanga, y shuj huahuaga huañuchi culebrabu ujtubimi maquida satinga. 9 Ñuca urcubiga nipi na dañangallu, nimada na tucuchingallu, imashinami cai allpabi mama cucha yacu jundami gan. Chashnalladi Jehová Diosbu yachaiga cai allpabi jundami ganga. 10 Chai funchami Jesebu sapiga tucui pueblogunabu shuj señal shina jataringa. Tucui gentegunami paibu consejogunada mascanajunga, paibu samana huasiga juilami ganga.