Génesis

7 Chai jipaga, Jehová Dios Noemun nirca: “Can y canbu familiandi arcamun yaicui, cai gentegunapuramundaga can justo gashcadami rricushcani. 2 Limpio animalgunapuramundaga cada unomunda sietedami japina gangui: jari y huarmimi gana gan. Pero na limpio animalgunapuramundaga cada unomunda ishquillada aglli: jari y huarmimi gana gan. 3 Jahua cielobi vuelaj animalgunapuramundaga sietedami agllana gangui —jariguna y huarmigunami— gana gan, shinami paigunaga cai allpabi causash catinga. 4 Porque siete funchaguna jipami 40 funchagunada y 40 tutagunada tamiachisha, shinami cai allpabi ñuca rrurrashca tucui causaida charijgunada chingachisha”. 5 Shinami, Noega Jehová Dios tucui mandashcada rrurrarca. 6 Cai allpa pachabi Juillu Tamia tiyajpiga, Noega 600 huatagunadami charirca. 7 Shinaga, narij Juillu Tamia shamujpimi Noega paibu huarmiun, churigunaun y nueragunaun arcamun yaicurca. 8 Y limpio animalguna, na limpio animalguna, vuelaj animalguna y allpabi causaj animalgunashmi 9 Noé maibi gajushcamun rrishmi ishqui ishqui jari y huarmi, Dios Noemun mandashca shina arcamun yaicunajurca. 10 Siete funchaguna jipami cai allpabi Juillu Tamia callarirca. 11 Noé 600 huatagunada charijpimi, ishqui quillamunda 17 funchabi, allpa ucumunda illita yacuguna llujshirca y jahua pachabu pungugunash pascarirca. 12 Shinami, 40 funchada y 40 tutada cai allpabi demas shinchi tamiarca. 13 Chai funchalladimi Noega paibu churigunaun —Sem, Cam y Jafet—, paibu huarmiun y paibu quimsa nueragunaun arcamun yaicurca. 14 Paigunaga sachabi causaj tucui laya animalgunaun, gentegunaun causaj tucui laya animalgunaun, allpabi llucaj tucui laya animalgunaun, vuelaj tucui laya avegunaun y alasgunada charij tucui animalgunaunmi yaicunajurca. 15 Y samida charij tucui laya animalgunaga Noé maibi gajushcamun rrishmi arcabi ishqui ishqui yaicunajurca. 16 Shinaga, Taita Dios Noemun mandashca shinami tucui laya animalgunapuramunda jariguna y huarmiguna yaicunajurca. Chai jipami, Jehová Diosga punguda huishcarca. 17 Y cai allpabiga 40 funchagunadami juilluda tamiash catijurca. Shinami, yacu jundari callarish arcada cuyuchish allpamunda yacu jahuamun huichiyachirca. 18 Yacuga jundarishmi allpa pachada taparca, pero arcaga yacu jahuabimi nadajurca. 19 Yacuga demas jundarishmi cai allpabi tiyaj tucui jatun urcugunadash taparca. 20 Urcugunabu puntamundami 6 metros altogama chayarca. 21 Shinaga allpabi causaida charij tucuigunami huañurca: vuelaj animalguna, gentegunaun causaj animalguna, sachabi causaj animalguna, uchilla animalguna y tucui genteguna. 22 Cai allpabi tucui causaj y singabi samida charijgunami huañurca. 23 Diosga allpabi causaida charijgunada, gentegunadash, llucaj y vuelaj animalgunadash tucuidami tucuchirca. Solo Noé y paiun arcabi tiyajgunallami salvarirca. 24 Y yacuga, allpada 150 funchagunadami tapajurca.