Lucas

14 Jatunyashcagunaga pingaibimi saquiringa, pero humilde gentegunaga valishcami gan. 35 Jesús Jericó llactamun cuchuyajushaga, ñan ladobi na rricuj jari caridadta mañash tiyajurca. 36 Ashca genteguna pasajujta uyashaga, gentegunada ima tucujushcada tapui callarirca. 37 Paigunaga: “Nazaret llactamunda Jesusmi pasajun” contestanajurca. 38 Chaida yachashaga: “¡Jesús! ¡Davidbu churi, ñucamunda llaquihuayari!” nishmi caparirca. 39 Chaimunda ñaupujbi rrij gentegunaga upalli nish rrimanajurca. Pero paiga: “¡Davidbu Churi, ñucamunda llaquihuayari!” nish más shinchida caparirca. 40 Chaimi Jesusga shayarish, chai jarida apamullun mandarca. Chai jari mayayajpimi Jesusga cashna tapurca: 41 “¿Canmundaga imadadi rrurrallun ningui?”. Shina nijpi na rricujga: “Señor, cutin rricusha nini, ayudahuai” contestarca. 42 Chaimi Jesusga nirca: “Cutin rricuilla”; shinchi feda charishcamunda sanoyashcangui”. 43 Y chai rratobi rricui pudirca, chaimundami Taita Diosda alabash Jesusda cati callarirca. Paida rricush tucui pueblomi Taita Diosda alabanajurca.