Lotbu huarmida yuyarichi

Lotga Canaán ladobimi paibu tío Abrahanhun causarca. Paigunabu animalguna mirarish catishcamundami, suficiente allpaga ña na tiyarca. Chaimi Abrahán Lotmunga cashna nirca: “Ishquindipura caibi causash catidaga ña na pudishunllu. Chaimunda maimun rrinada agllabailla. Can alli ladomun rrinada munajpi, ñucaga lluqui ladomunmi rrisha”. Abrahanga alli jarimi garca.

Lotga, jihua pambada y yacuda charij allpadami agllarca. Chashnami Lotga paibu familiaun Sodoma ciudad mayallabi causangabu rrirca.

Sodoma ciudadbi y chai mayallabi saquirij Gomorra ciudadbi causaj gentegunaga malogunami garca. Genteguna demas malo gashcada rricushmi, Jehová Diosga chai ishqui ciudadta tucuchinada decidirca. Pero Taita Diosga Lotda y paibu familiada salvasha nishcamundami, ishqui angelgunada cashna huillallun cacharca: “Caimunda ucta llujshish rrichi, Jehová Diosmi cai ciudadta tucuchinga”.

Pero Lot chai ciudadmunda na enseguida llujshishcamundami, angelgunaga, Lotda, paibu huarmida y ushushigunadaga maquimunda aisash llujchinajurca. Shinalladi angelgunaga chashnami ninajurca: “Corrichi, na huañusha nishaga caimunda mitijuichi, huashada vueltash ama rricunguichillu. Vueltash rricushaga huañunguichimi”.

Zóar ciudadmun chayanajujpimi Jehová Diosga, Sodoma y Gomorra llactada ninaun y azufre nishcaun tucuchirca. Sodoma y Gomorra ciudadgunaga amin tucuchishcami saquirirca. Lotbu huarmiga Jehová Diosda na cazush huashada vueltash rricushcamundami cachi rrumi tucush saquirirca. Pero Lot y paibu ishqui ushushigunaga cazushcamundami salvarinajurca. Lotbu huarmi na cazushcamundaga llaquillami sintirinajushca ganga. Pero Lot y paibu ishqui ushushiguna, Jehová Diosda cazushcamundaga tranquilomi sintirinajushca ganga.